NeverForget2425

2) ਡੇਰੇ ਅਤੇ ਬਾਦਲ ਵਲੋਂ ਅਪੀਲਾਂ, ਪਰ ਕਿਸ ਚੀਜ਼ ਲਈ?

ਤੁਸੀਂ ਸ਼ਾਤੀ ਲਈ ਪ੍ਰੇਰਿਤ ਹੁੰਦੇ ਹੋ? ਜਾਂ ਅਸ਼ਾਤੀ ਕਰਨ ਲਈ?

1) ਸਾੜ-ਫੂਕ ਹਿੰਸਕ ਘਟਨਾਵਾਂ ਤੋਂ ਬਾਅਦ ਜਲੰਧਰ ‘ਚ ਕਰਫਿਊ

ਜਲੰਧਰ, ਫਗਵਾੜਾ, ਗੁਰਾਇਆ ਤੇ ਹੋਰ ਥਾਵਾਂ ‘ਤੇ ਸਾੜ-ਫੂਕ ਹਿੰਸਕ ਘਟਨਾਵਾਂ ਤੋਂ ਬਾਅਦ ਜਲੰਧਰ ‘ਚ ਅਣਮਿੱਥੇ ਸਮੇਂ ਲਈ ਕਰਫਿਊ

ਜਲੰਧਰ 24 ਮਈ (ਸ਼ਿਵ, ਪਵਨ ਖਰਬੰਦਾ)-ਵਿਆਨਾ ਵਿਚ ਵਾਪਰੀ ਘਟਨਾ ਤੋਂ ਬਾਅਦ ਵੱਡੇ ਪੱਧਰ ‘ਤੇ ਹੋਈਆਂ ਹਿੰਸਕ ਘਟਨਾਵਾਂ ਤੋਂ ਬਾਅਦ ਜਲੰਧਰ ਵਿਚ ਦੇਰ ਰਾਤ ਕਰਫਿਊ ਲਗਾ ਦਿੱਤਾ ਗਿਆ ਤੇ ਸਾੜਫੂਕ ਕਰਨ ਵਾਲਿਆਂ ਨੂੰ ਦੇਖਦੇ ਹੀ ਗੋਲੀ ਮਾਰਨ ਦੇ ਹੁਕਮ ਜਾਰੀ ਕਰ ਦਿੱਤੇ ਗਏ ਹਨ। ਕਰਫਿਊ ਲੱਗਣ ਤੋਂ ਬਾਅਦ ਬੀ. ਐਸ. ਐਫ. ਨੇ ਸ਼ਹਿਰ ਵਿਚ ਫਲੈਗ ਮਾਰਚ ਕੀਤਾ। ਜ਼ਿਲ੍ਹਾ ਮੈਜਿਸਟਰੇਟ ਸ: ਅਜੀਤ ਸਿੰਘ ਪਨੂੰ ਨੇ ਦੱਸਿਆ ਕਿ ਸ਼ਹਿਰ ਵਿਚ ਹੋਈਆਂ ਹਿੰਸਕ ਘਟਨਾਵਾਂ ਨੂੰ ਰੋਕਣ ਲਈ ਕਰਫਿਊ ਲਗਾਉਣਾ ਪਿਆ ਹੈ ਤੇ ਇਹ ਅਗਲੇ ਹੁਕਮਾਂ ਤੱਕ ਜਾਰੀ ਰਹੇਗਾ। ਇਸ ਤੋਂ ਇਲਾਵਾ ਗੁਰਾਇਆ, ਕਰਤਾਰਪੁਰ, ਫਿਲੌਰ ਤੇ ਕਈ ਹੋਰ ਥਾਂਵਾਂ ‘ਤੇ ਵੀ ਪ੍ਰਦਰਸ਼ਨ ਹੋਏ। ਗੁਰਾਇਆ ਵਿਖੇ ਵੱਡੀ ਗਿਣਤੀ ‘ਚ ਇੱਕਠੇ ਹੋਏ ਪ੍ਰਦਰਸ਼ਨਕਾਰੀਆਂ ਨੇ ਦਿੱਲੀ ਪ੍ਰਵਾਹਨ ਨਿਗਮ ਦੀ ਇਕ ਬੱਸ ਡੀ. ਐਲ. ਆਈ. ਪੀ. ਏ. 2886 ਦੇ ਸ਼ੀਸ਼ੇ ਭੰਨ ਦਿੱਤੇ ਅਤੇ ਟਰੈਕਟਰ-ਟਰਾਲੀ ਦੀ ਵੀ ਭੰਨ-ਤੋੜ ਕੀਤੀ। ਫਗਵਾੜਾ ‘ਚ ਵੀ ਜੀ. ਟੀ. ਰੋਡ, ਖੰਡ ਮਿਲ ਚੌਕ, ਪਿੰਡ ਸਪਰੋੜ ਤੇ ਬਾਈਪਾਸ ‘ਤੇ ਵੀ ਧਰਨਾ ਲਗਾਇਆ। ਇਸ ਤੋਂ ਪਹਿਲਾਂ ਵਿਆਨਾ ਵਿਚ ਧਾਰਮਿਕ ਆਗੂਆਂ ‘ਤੇ ਹੋਏ ਹਮਲੇ ਨੂੰ ਲੈ ਕੇ ਅੱਜ ਜਲੰਧਰ ਦੇ ਰਵੀਦਾਸ ਚੌਕ ਲਾਗੇ ਵੀ ਤਨਾਅ ਫੈਲ ਗਿਆ ਸੀ ਤੇ ਉਕਤ ਘਟਨਾ ਬਾਰੇ ਪਤਾ ਲੱਗਣ ‘ਤੇ ਭੜਕੇ ਲੋਕਾਂ ਨੇ ਲੰਘ ਰਹੇ ਟਰੱਕ ਤੇ ਬੈਂਕ ਦੇ ਏ. ਟੀ. ਐਮ. ਨੂੰ ਅੱਗ ਲਗਾ ਦਿੱਤੀ।

ਇਸ ਤੋਂ ਇਲਾਵਾ ਸ਼ਹਿਰ ਦੇ ਹੋਰਾਂ ਖੇਤਰਾਂ ਵਿਚ ਵੀ ਮਾਹੌਲ ਵਿਗੜ ਗਿਆ ਤੇ ਪਠਾਨਕੋਟ ਚੌਕ, ਫੋਕਲ ਪੁਅਇੰਟ ਚੌਕ, ਮਿਲਕ ਪਲਾਂਟ ਚੌਕ, ਵਰਕਸ਼ਾਪ ਚੌਕ ਲਾਗੇ ਵੀ ਕਈ ਬੱਸਾਂ ਤੇ ਆਟੋਆਂ ‘ਤੇ ਪਥਰਾਅ ਕੀਤਾ। ਖੇਤਰ ਵਿਚ ਉਕਤ ਘਟਨਾ ਨੂੰ ਲੈ ਕੇ ਭਾਰੀ ਤਨਾਅ ਹੈ। ਮੌਕੇ ਤੋਂ ਮਿਲੀ ਜਾਣਕਾਰੀ ਮੁਤਾਬਿਕ ਅੱਜ ਇਸ ਘਟਨਾ ਦੇ ਵਿਰੋਧ ਵਿਚ ਸਮਰਥਕ ਭੜਕ ਗਏ ਤੇ ਭੜਕੇ ਲੋਕਾਂ ਨੇ ਫਲ-ਸਬਜ਼ੀ ਲੈ ਕੇ ਲੰਘ ਰਹੇ ਟਰੱਕ ਨੰਬਰ ਪੀ. ਬੀ. 08-9587 ਨੂੰ ਅੱਗ ਲਗਾ ਕੇ ਸਾੜ ਦਿੱਤਾ। ਭੜਕੇ ਲੋਕਾਂ ਨੇ ਰਵੀਦਾਸ ਚੌਕ ਵਿਚ ਸਥਿਤ ਭਾਰਤੀ ਸਟੇਟ ਬੈਂਕ ਦੇ ਏ. ਟੀ. ਐਮ. ਨੂੰ ਵੀ ਅੱਗ ਲਗਾ ਦਿੱਤੀ ਤੇ ਜਦੋਂ ਫਾਇਰ ਸੇਵਾ ਦੀ ਗੱਡੀ ਅੱਗ ਬੁਝਾਉਣ ਲਈ ਪੁੱਜੀ ਤਾਂ ਭੜਕੇ ਲੋਕਾਂ ਨੇ ਗੱਡੀ ਨੂੰ ਵੀ ਜਾਣ ਨਹੀਂ ਦਿੱਤਾ। ਬੈਂਕ ਦਾ ਏ. ਟੀ. ਐਮ. ਸੜ ਕੇ ਸੁਆਹ ਹੋ ਗਿਆ। ਜਾਣਕਾਰੀ ਮੁਤਾਬਿਕ ਭੜਕੇ ਲੋਕਾਂ ਨੇ ਕਈ ਦੁਕਾਨਾਂ ‘ਤੇ ਪਥਰਾਅਬਾਜ਼ੀ ਵੀ ਕੀਤੀ। ਲੋਕਾਂ ਨੇ ਰਵਿਦਾਸ ਚੌਕ ਲਾਗੇ ਸੜਕ ‘ਤੇ ਟਾਇਰਾਂ ਨੂੰ ਅੱਗ ਲਗਾ ਕੇ ਰਸਤਾ ਜਾਮ ਕਰ ਦਿੱਤਾ ਤੇ ਭਾਰੀ ਨਾਅਰੇਬਾਜ਼ੀ ਕੀਤੀ। ਲੋਕ ਸੰਤਾਂ ‘ਤੇ ਹਮਲਾ ਕਰਨ ਵਾਲਿਆਂ ਖਿਲਾਫ਼ ਸਖਤ ਕਾਰਵਾਈ ਦੀ ਮੰਗ ਕਰ ਰਹੇ ਸਨ। ਮਿਲੀ ਜਾਣਕਾਰੀ ਅਨੁਸਾਰ ਭੜਕੇ ਲੋਕਾਂ ਨੇ ਜਲੰਧਰ ਛਾਉਣੀ ਰੇਲਵੇ ਸਟੇਸ਼ਨ ‘ਤੇ ਆਉਣ ਵਾਲੀਆਂ ਕੁਝ ਗੱਡੀਆਂ ਦੀ ਵੀ ਭੰਨ-ਤੋੜ ਕੀਤੀ।

ਸਾੜਫੂਕ ਦੀ ਜਾਣਕਾਰੀ ਮਿਲਣ ਤੋਂ ਬਾਅਦ ਐਸ. ਐਸ. ਪੀ. ਆਰ. ਕੇ. ਜਾਇਸਵਾਲ, ਐਸ. ਪੀ. ਡੀ. ਸ: ਪਰਮਵੀਰ ਸਿੰਘ ਪ੍ਰਮਾਰ, ਐਸ. ਪੀ. ਸਿਟੀ-2 ਸਰਬਜੀਤ ਸਿੰਘ ਤੇ ਹੋਰ ਵੀ ਸੀਨੀਅਰ ਅਧਿਕਾਰੀ ਮੌਕੇ ‘ਤੇ ਪੁੱਜੇ ਅਤੇ ਉਨ੍ਹਾਂ ਭੜਕੇ ਲੋਕਾਂ ਨੂੰ ਸਮਝਾਉਣ ਦਾ ਯਤਨ ਕੀਤਾ ਪਰ ਪ੍ਰਦਰਸ਼ਨ ਜਾਰੀ ਰਿਹਾ। ਸੜਕ ਜਾਮ ਹੋਣ ਕਰਕੇ ਨਕੋਦਰ ਚੌਕ ਤੋਂ ਲੈ ਕੇ ਰਵੀਦਾਸ ਚੌਕ ਬੰਦ ਹੋ ਗਿਆ ਸੀ। ਘਟਨਾ ਨੂੰ ਲੈ ਕੇ ਜਲੰਧਰ ਪੁਲਿਸ ਨੇ ਖੇਤਰ ਤੋਂ ਇਲਾਵਾ ਹੋਰ ਵੀ ਖੇਤਰਾਂ ਵਿਚ ਚੌਕਸੀ ਵਧਾ ਦਿੱਤੀ ਹੈ। ਮੁਤਾਬਿਕ ਪਠਾਨਕੋਟ ਚੌਕ ਤੋਂ ਲੈ ਕੇ ਦੁਆਬਾ ਚੌਕ ਤੱਕ ਵੀ ਦੇਰ ਸ਼ਾਮ ਕਿਸੇ ਅਣਸੁਖਾਵੀਂ ਘਟਨਾ ਦੀ ਸ਼ੰਕਾ ਨੂੰ ਦੇਖਦੇ ਹੋਏ ਦੁਕਾਨਾਂ ਬੰਦ ਕਰਨ ਲਈ ਕਹਿ ਦਿੱਤਾ ਗਿਆ ਸੀ। ਪਠਾਨਕੋਟ ਚੌਕ ਵਿਚ ਵੀ ਭੜਕੇ ਲੋਕਾਂ ਨੇ ਜਾਮ ਲਗਾ ਦਿੱਤਾ ਤੇ ਲੰਘਦੀ ਫੌਜ ਦੀ ਗੱਡੀ ਤੋਂ ਇਲਾਵਾ 2 ਬੱਸਾਂ ਤੋਂ ਇਲਾਵਾ 2 ਆਲਟੋ ਕਾਰਾਂ ਵੀ ਅੱਗ ਦੇ ਹਵਾਲੇ ਕਰ ਦਿੱਤੀਆਂ। ਗੱਡੀਆਂ ਨੂੰ ਲੱਗੀ ਅੱਗ ਨੂੰ ਫਾਇਰ ਸੇਵਾ ਦੇ ਬੁਝਾ ਨਹੀਂ ਸਕੇ। ਲੋਕਾਂ ਨੇ ਰਸਤਾ ਰੋਕ ਕੇ ਭਾਰੀ ਨਾਅਰੇਬਾਜ਼ੀ ਕੀਤੀ। ਚੌਕ ਵਿਚ ਲਗਾਏ ਜਾਮ ਕਰਕੇ ਪਠਾਨਕੋਟ ਚੌਕ ਤੋਂ ਲੈ ਕੇ ਵਿਧੀਪੁਰ ਫਾਟਕ ਤੱਕ ਰਸਤਾ ਜਾਮ ਰਿਹਾ। ਹੋਰ ਮਿਲੀ ਜਾਣਕਾਰੀ ਮੁਤਾਬਿਕ ਫੋਕਲ ਪੁਆਇੰਟ ਚੌਕ ਤੇ ਮਿਲਕ ਪਲਾਂਟ ਚੌਕ ਲਾਗੇ ਵੀ ਲੋਕਾਂ ਨੇ ਜਾਮ ਲਗਾ ਕੇ ਵਾਹਨਾਂ ਨੂੰ ਨੁਕਸਾਨ ਪਹੁਚਾਇਆ। ਫੋਕਲ ਪੁਆਇੰਟ ਕੋਲ ਚਾਰ ਬੱਸਾਂ ਨੂੰ ਅੱਗ ਲਗਾ ਦਿੱਤੀ ਗਈ ਜਿਸ ਵਿਚ ਸਿਟੀ ਬੱਸ ਵੀ ਸ਼ਾਮਿਲ ਸੀ। ਵਰਕਸ਼ਾਪ ਚੌਕ ਵਿਚ ਵੀ ਆਟੋ ‘ਤੇ ਪਥਰਾਅ ਕੀਤਾ ਗਿਆ ਤੇ ਦੇਰ ਰਾਤ ਡੀ. ਏ. ਵੀ. ਕਾਲਜ ਫਾਟਕ ਲਾਗੇ ਵੀ ਭੜਕੇ ਲੋਕਾਂ ਨੇ ਇਸ ਘਟਨਾ ਦਾ ਵਿਰੋਧ ਕਰਦੇ ਹੋਏ ਜਾਮ ਲਗਾ ਦਿੱਤਾ ਤੇ ਆਉਣ ਜਾਣ ਵਾਲੇ ਲੋਕਾਂ ਨੂੰ ਰੋਕ ਦਿੱਤਾ ਤੇ ਵਾਪਸ ਭੇਜ ਦਿੱਤਾ। ਮਿਲੀ ਜਾਣਕਾਰੀ ਮੁਤਾਬਿਕ ਗੁਰੂ ਤੇਗ ਬਹਾਦੁਰ ਨਗਰ ਲਾਗੇ ਇਕ ਹੋਟਲ ਪ੍ਰਿਥਵੀ ਪਲੈਨੇਟ ਹੋਟਲ ਦੇ ਬਾਹਰ ਪਹਿਲਾਂ ਟਾਇਰਾਂ ਨੂੰ ਅੱਗ ਲਗਾਈ ਗਈ ਤੇ ਬਾਅਦ ਵਿਚ ਕੁਝ ਲੋਕਾਂ ਨੇ ਹੋਟਲ ਦੇ ਅੰਦਰ ਜਾ ਕੇ ਭੰਨਤੋੜ ਵੀ ਕੀਤੀ।

ਦੁਕਾਨ ਨੂੰ ਅੱਗ
ਜਲੰਧਰ ਛਾਉਣੀ ਵਿਚ ਵੀ ਇਕ ਦੁਕਾਨ ਨੂੰ ਭੜਕੇ ਲੋਕਾਂ ਨੇ ਅੱਗ ਲਗਾ ਦਿੱਤੀ। ਮਿਲੀ ਜਾਣਕਾਰੀ ਮੁਤਾਬਿਕ ਗਨੇਸ਼ ਸਵੀਟ ਸ਼ਾਪ ਲਾਗੇ ਕੁਝ ਲੋਕ ਆਏ ਤੇ ਉਨ੍ਹਾਂ ਨੇ ਭੰਨਤੋੜ ਕਰਦੇ ਹੋਏ ਅੱਗ ਲਗਾ ਦਿੱਤੀ।

ਲੋਕ ਫੋਨ ਕਰਦੇ ਰਹੇ
ਜਲੰਧਰ ਸ਼ਹਿਰ ਵਿਚ ਵਾਪਰੀਆਂ ਹਿੰਸਕ ਘਟਨਾਵਾਂ ਨੂੰ ਲੈ ਕੇ ਅੱਜ ਦਹਿਸ਼ਤ ਰਹੀ ਤੇ ਸਾੜਫੂਕ ਦੀਆਂ ਸੂਚਨਾਵਾਂ ਮਿਲਣ ‘ਤੇ ਸ਼ਹਿਰ ਵਿਚ ਇਕ ਦਮ ਦਹਿਸ਼ਤ ਫੈਲ ਗਈ ਤੇ ਦੇਰ ਰਾਤ ਤੱਕ ਖੁੱਲ੍ਹੀਆਂ ਰਹਿਣ ਵਾਲੀਆਂ ਵੀ ਦੁਕਾਨਾਂ ਬੰਦ ਨੁਕਸਾਨ ਦੀ ਸ਼ੰਕਾ ਤੋਂ ਬੰਦ ਕਰ ਦਿੱਤੀਆਂ ਗਈਆਂ। ਲੋਕ ਹੋਈਆਂ ਘਟਨਾ ਬਾਰੇ ਵੀ ਫੋਨ ਕਰਕੇ ਪਤਾ ਕਰ ਰਹੇ ਸੀ ਕਿ ਸ਼ਹਿਰ ਵਿਚ ਹਿੰਸਕ ਘਟਨਾਵਾਂ ਕਿਉਂ ਹੋ ਰਹੀਆਂ ਹਨ।

ਪੁਲਿਸ ਫੌਰਨ ਹਰਕਤ ‘ਚ
ਹਿੰਸਕ ਘਟਨਾਵਾਂ ਦੀ ਸੂਚਨਾ ਮਿਲਦੇ ਸਾਰ ਹੀ ਜਲੰਧਰ ਦਾ ਪੁਲਿਸ ਪ੍ਰਸ਼ਾਸਨ ਵੀ ਹਰਕਤ ਵਿਚ ਆ ਗਿਆ ਤੇ ਐਸ. ਐਸ. ਪੀ. ਸ੍ਰੀ ਆਰ. ਕੇ. ਜਾਇਸਵਾਲ ਰਵਿਦਾਸ ਚੌਕ ਲਾਗੇ ਹਿੰਸਕ ਘਟਨਾਵਾਂ ਦੀ ਸੂਚਨਾ ਮਿਲਦੇ ਸਾਰ ਹੀ ਕੁਝ ਦੇਰ ਬਾਅਦ ਵੱਡੀ ਗਿਣਤੀ ਵਿਚ ਪੁਲਿਸ ਦੇ ਮੁਲਾਜ਼ਮ ਨਾਲ ਮੌਕੇ ‘ਤੇ ਪੁੱਜ ਗਏ ਜਿਨ੍ਹਾਂ ਹਿੰਸਕ ਘਟਨਾਵਾਂ ਨੂੰ ਰੋਕਣ ਲਈ ਕਾਫੀ ਯਤਨ ਕੀਤਾ। ਸ੍ਰੀ ਜਾਇਸਵਾਲ ਆਪ ਸਾਰੇ ਸ਼ਹਿਰ ਵਿਚ ਫੈਲੀਆਂ ਹਿੰਸਕ ਘਟਨਾਵਾਂ ਦੀ ਪਲ-ਪਲ ਮੋਬਾਈਲ ‘ਤੇ ਜਾਣਕਾਰੀ ਲੈ ਰਹੇ ਸਨ।

ਮੀਡੀਆ ਕਰਮੀਆਂ ਨੂੰ ਰੋਕਿਆ
ਨਕੋਦਰ ਚੌਕ ਵਿਚ ਜਦੋਂ ਭੜਕੇ ਲੋਕਾਂ ਨੇ ਸੜਕ ਜਾਮ ਕੀਤੀ ਸੀ ਤਾਂ ਮੀਡੀਆ ਕਰਮੀ ਵੀ ਭੜਕੇ ਲੋਕਾਂ ਦੇ ਗੁੱਸੇ ਦਾ ਸ਼ਿਕਾਰ ਹੋ ਗਏ ਤੇ ਤਸਵੀਰਾਂ ਲੈ ਰਹੇ ਇਕ ਫੋਟੋਗਰਾਫਰ ਦੇ ਕੈਮਰੇ ਨੂੰ ਵੀ ਨੁਕਸਾਨ ਪੁੱਜਾ ਜਦਕਿ ਬਿਜਲਈ ਮੀਡੀਆ ਦੇ ਲੋਕਾਂ ਨੂੰ ਵੀ ਗੁੱਸੇ ਦਾ ਸਾਹਮਣਾ ਕਰਨਾ ਪਿਆ। ਮੀਡੀਆ ਕਰਮੀ ਮੌਕੇ ‘ਤੇ ਘਟਨਾ ਦੀ ਕਵਰੇਜ ਕਰਨ ਲਈ ਗਏ ਸਨ।

ਗੱਡੀਆਂ ਸਾੜੀਆਂ
ਮਕਸੂਦਾਂ ਥਾਣੇ ਦੇ ਅਧੀਨ ਆਉਂਦੇ ਖੇਤਰ ਨੂਰਪੁਰ ਵਿਖੇ ਕੁਝ ਗੱਡੀਆਂ ਨੂੰ ਅੱਗ ਦੇ ਹਵਾਲੇ ਕਰ ਦਿੱਤਾ। ਜਿਸ ਕਾਰਨ ਕਾਫੀ ਮਾਲੀ ਨੁਕਸਾਨ ਦੀ ਸੂਚਨਾ ਪ੍ਰਾਪਤ ਹੋਈ ਹੈ। ਇਸੇ ਤਰ੍ਹਾਂ ਹੀ ਭੜਕੇ ਹੋਏ ਲੋਕਾਂ ਨੇ ਜਲੰਧਰ ਛਾਉਣੀ ਸਥਿਤ ਇਕ ਚੂੰਗੀ ਦੇ ਖੋਖੇ ਨੂੰ ਅੱਗ ਲਗਾ ਦਿੱਤੀ ਤੇ ਕੁਝ ਰੇਲ ਗੱਡੀਆਂ ਨੂੰ ਵੀ ਨੁਕਸਾਨ ਪਹੁੰਚਾਇਆ। ਇਹ ਵੀ ਜਾਣਕਾਰੀ ਮਿਲੀ ਹੈ ਕਿ ਭਾਰਗੋ ਕੈਂਪ ਚੌਕੀ ਦੇ ਨੇੜੇ ਸਥਿਤ ਇਕ ਸ਼ਰਾਬ ਦੇ ਠੇਕੇ ਦਾ ਸ਼ਟਰ ਤੋੜ ਕੇ ਚੰਗੀ ਭੰਨਤੋੜ ਕੀਤੀ ਗਈ ਤੇ ਕੁਝ ਦੂਰੀ ‘ਤੇ ਹੀ ਸਥਿਤ ਪ੍ਰਿਥਵੀ ਪਲੈਨਟ ਨਾਂਅ ਦੇ ਇਕ ਰੈਸਟੋਰੈਂਟ ਦੇ ਬਾਹਰ ਖੜੀਆਂ ਕੁਝ ਗੱਡੀਆਂ ਨੂੰ ਵੀ ਭੜਕੇ ਹੋਏ ਲੋਕਾਂ ਵੱਲੋਂ ਅੱਗ ਦੇ ਹਵਾਲੇ ਕਰ ਦਿੱਤਾ ਗਿਆ। ਇਸੇ ਤਰ੍ਹਾਂ ਹੀ ਪਠਾਨਕੋਟ ਰੋਡ ‘ਤੇ ਸਥਿਤ ਜਨਤਾ ਹਸਪਤਾਲ ‘ਤੇ ਪੱਥਰਾਓ ਕਰਦੇ ਹੋਏ ਕਾਫੀ ਨੁਕਸਾਨ ਪਹੁੰਚਾਇਆ ਗਿਆ। ਦੇਰ ਰਾਤ ਤੱਕ ਪੂਰੇ ਸ਼ਹਿਰ ਵਿਚ ਕਰਫਿਊ ਲੱਗਾ ਹੋਣ ਕਾਰਨ ਹਾਲਾਤ ਕਾਫੀ ਤਣਾਅਪੂਰਨ ਬਣੇ ਹੋਏ ਸਨ ਤੇ ਪੁਲਿਸ ਪਾਰਟੀਆਂ ਲਗਾਤਾਰ ਸਾਰੇ ਸ਼ਹਿਰ ‘ਚ ਗਸ਼ਤ ਕਰ ਰਹੀਆਂ ਸਨ। ਇਹ ਵੀ ਜਾਣਕਾਰੀ ਮਿਲੀ ਹੈ ਕਿ ਕਰਫਿਊ ਦੀ ਸੂਚਨਾ ਤੋਂ ਬਾਅਦ ਬੀ. ਐਸ. ਐਫ. ਦੇ ਜਵਾਨਾਂ ਵੱਲੋਂ ਨਕੋਦਰ ਚੌਕ ਤੋਂ ਲੈ ਕੇ ਰਵਿਦਾਸ ਚੌਕ ਤੱਕ ਫਲੈਗ ਮਾਰਚ ਕੀਤਾ ਗਿਆ।

ਨਕੋਦਰ ਰੋਡ ‘ਤੇ ਰੋਸ ਧਰਨਾ ਦਿੱਤਾ
ਜਲੰਧਰ ਤੋਂ ਪ੍ਰਿਤਪਾਲ ਸਿੰਘ ਅਨੁਸਾਰ ਜਿਊਂ ਹੀ ਅਸਟਰੀਆ ਦੀ ਰਾਜਧਾਨੀ ਵਿਆਨਾ ਵਿਚ ਡੇਰਾ ਸੱਚਖੰਡ ਬੱਲਾਂ ਦੇ ਮਹਾਂਪੁਰਸ਼ਾਂ ਸੰਤ ਨਿਰੰਜਨ ਦਾਸ ਤੇ ਸੰਤ ਰਾਮਾਨੰਦ ‘ਤੇ ਹਮਲੇ ਦੀ ਖ਼ਬਰ ਆਈ ਜਲੰਧਰ ਵਿਚ ਉਨ੍ਹਾਂ ਦੇ ਸ਼ਰਧਾਲੂਆਂ ਨੇ ਰੋਸ ਵਜੋਂ ਸੜਕਾਂ ‘ਤੇ ਧਰਨੇ ਮਾਰ ਕੇ ਆਵਾਜਾਈ ਠੱਪ ਕਰ ਦਿੱਤੀ। ਭਾਰਗਵ ਚੌਕ ਵਿਚ ਬਸਪਾ ਨੇਤਾ ਸ੍ਰੀ ਅਸ਼ੋਕ ਚਾਂਦਲਾ ਅਤੇ ਪੀ. ਡੀ. ਸ਼ਾਂਤ ਦੀ ਅਗਵਾਈ ਵਿਚ ਸੰਗਤਾਂ ਨੇ ਰੋਸ ਵਜੋਂ ਧਰਨਾ ਦਿੱਤਾ। ਉਹ ਦੋਸ਼ੀਆਂ ਦੀ ਗ੍ਰਿਫ਼ਤਾਰੀ ਦੀ ਮੰਗ ਕਰ ਰਹੇ ਸਨ। ਉਨ੍ਹਾਂ ਸੰਗਤਾਂ ਨੂੰ ਸ਼ਾਂਤੀ ਬਣਾਈ ਰੱਖਣ ਦੀ ਅਪੀਲ ਕੀਤੀ। ਪੁਲਿਸ ਨੇ ਗਸ਼ਤ ਵਧਾ ਦਿੱਤੀ ਹੈ। ਰਾਤ ਨੂੰ ਚਹੇੜੂ ਲਾਗੇ ਵਾਹਨਾਂ ‘ਚ ਫਸੇ ਲੋਕਾਂ ‘ਚੋਂ ਕਿਸੇ ਦੇ ਆਏ ‘ਅਜੀਤ’ ‘ਚ ਟੈਲੀਫੋਨ ਤੋਂ ਇਹ ਦੱਸਿਆ ਗਿਆ ਕਿ ਉਥੇ 20-25 ਤੋਂ ਵੱਧ ਵਾਹਨ ਸੜਕਾਂ ‘ਤੇ ਫਸੇ ਹੋਏ ਹਨ ਤੇ ਗੁੱਸੇ ‘ਚ ਆਏ ਲੋਕਾਂ ਨੇ ਕਈ ਵਾਹਨਾਂ ਦੀ ਭੰਨਤੋੜ ਕੀਤੀ ਹੈ। ਅੱਧੀ ਰਾਤ ਦੀ ਸੂਚਨਾ ਅਨੁਸਾਰ ਚਹੇੜੂ ਕੋਲ ਖੜ੍ਹੀ ਇਕ ਬੱਸ ਨੂੰ ਅੱਗ ਲਗਾ ਦਿੱਤੀ ਗਈ। ਬਹੁਤ ਸਾਰੀਆਂ ਕਾਰਾਂ ਦੀ ਵੀ ਭੰਨਤੋੜ ਕੀਤੀ ਗਈ। ਇਹ ਪਤਾ ਲੱਗਾ ਹੈ ਕਿ ਲਗਭਗ 80 ਯਾਤਰੀਆਂ ਨੇ ਗੁਰਦੁਆਰਾ ਸਿੰਘ ਸਭਾ ਕੈਂਟ (ਛਾਉਣੀ) ਵਿਖੇ ਪਨਾਹ ਲੈ ਲਈ ਹੈ। ਇਸ ਦੌਰਾਨ ਜਦੋਂ ਰਾਮਾਂ ਮੰਡੀ ਚੌਕ ਲਾਗੇ ਪਠਾਨਕੋਟ ਰੋਡਵੇਜ਼ ਦੇ ਜੀ. ਐਮ. ਨੂੰ ਯਾਤਰੀਆਂ ਲਈ ਟਰੈਫਿਕ ਖੁੱਲ੍ਹਣ ‘ਤੇ ਬੱਸ ਮੁਹੱਈਆ ਕਰਵਾਉਣ ਲਈ ਕਿਹਾ ਤਾਂ ਉਨ੍ਹਾਂ ਕੋਈ ਹੁੰਗਾਰਾ ਨਾ ਭਰਿਆ।

ਗੱਡੀਆਂ ਰਸਤੇ ‘ਚ ਰੋਕੀਆਂ
ਜਲੰਧਰ, 24 ਮਈ (ਮਦਨ ਭਾਰਦਵਾਜ)-ਰਾਮ ਨਗਰ ਰੇਲਵੇ ਫਾਟਕ ‘ਤੇ ਭੜਕੇ ਲੋਕਾਂ ਨੇ ਜਲੰਧਰ-ਅੰਮ੍ਰਿਤਸਰ ਲਾਈਨ ‘ਤੇ ਟਾਇਰ ਸਾੜ ਕੇ ਸੁੱਟ ਦਿੱਤਾ ਤੇ ਕੁਝ ਲੋਕਾਂ ਦੀ ਮਾਰਕੁੱਟ ਵੀ ਕੀਤੀ। ਸਟੇਸ਼ਨ ਸੁਪਰਡੈਂਟ, ਅਸ਼ੋਕ ਕੁਮਾਰ ਅਨੁਸਾਰ ਦਿੱਲੀ ਤੋਂ ਅੰਮ੍ਰਿਤਸਰ ਜਾਣ ਵਾਲੀ ਸ਼ਤਾਬਦੀ, ਜੋ ਕਿ ਜਲੰਧਰ ਸ਼ਾਮ 9.30 ਵਜੇ ਪਹੁੰਚਦੀ ਹੈ, ਨੂੰ ਹਾਲਾਤ ਦੇਖਦੇ ਹੋਏ ਜਲੰਧਰ ਸਟੇਸ਼ਨ ‘ਤੇ ਰੋਕਿਆ ਗਿਆ ਹੈ। ਜੰਮੂ ਮੇਲ ਨੂੰ ਵੀ ਜਲੰਧਰ ਸਟੇਸ਼ਨ ‘ਤੇ ਹੀ ਰੋਕ ਲਿਆ ਗਿਆ ਹੈ। ਜਲੰਧਰ ਕੈਂਟ ਸਟੇਸ਼ਨ ‘ਤੇ ਭੜਕੀ ਭੀੜ ਨੇ ਡੀ. ਐਮ. ਯੂ. ‘ਤੇ ਪਥਰਾਓ ਕੀਤਾ ਅਤੇ ਸਟਾਲਾਂ ਨੂੰ ਵੀ ਨੁਕਸਾਨ ਪਹੁੰਚਾਇਆ। ਇਸ ਤੋਂ ਇਲਾਵਾ ਹੋਰ ਵੀ ਗੱਡੀਆਂ ਰੋਕੀਆਂ ਜਾ ਸਕਦੀਆਂ ਹਨ। ਇਸੇ ਦੌਰਾਨ ਅੰਮ੍ਰਿਤਸਰ ਤੋਂ ਆਉਣ ਵਾਲੀ ਬਿਆਸ ਸਪੈਸ਼ਲ ਗੱਡੀ ਨੂੰ ਸੂਰਾਨੁੱਸੀ ਰੋਕ ਲਿਆ ਗਿਆ ਹੈ। ਅੰਮ੍ਰਿਤਸਰ ਤੋਂ ਚੱਲਣ ਵਾਲੀ ਫਰੰਟੀਅਰ ਮੇਲ ਬਿਆਸ ਰੋਕ ਲਈ ਗਈ ਹੈ। ਅੰਮ੍ਰਿਤਸਰ ਤੋਂ ਜਲੰਧਰ 2 ਜੇ. ਏ. ਗੱਡੀ ਮਾਨਾਂਵਾਲਾ ਖੜ੍ਹੀ ਕਰ ਦਿੱਤੀ ਗਈ ਹੈ। ਅੰਮ੍ਰਿਤਸਰ ਤੋਂ ਦਿੱਲੀ ਤੋਂ ਅੰਮ੍ਰਿਤਸਰ ਆਉਣ ਵਾਲੀਆਂ ਸਾਰੀਆਂ ਗੱਡੀਆਂ ਰਸਤੇ ‘ਚ ਹੀ ਰੋਕ ਲਈਆਂ ਗਈਆਂ ਹਨ ਅਤੇ ਹਾਲਾਤ ਸੁਖਾਵੇਂ ਹੋਣ ਤੋਂ ਬਾਅਦ ਹੀ ਚਲਾਈਆਂ ਜਾਣਗੀਆਂ।

ਪੁਲਿਸ ਦੀ ਗੱਡੀ ਤੇ ਮੋਟਰ ਸਾਈਕਲ ਸਾੜੇ
ਜਲੰਧਰ ਛਾਉਣੀ ਤੋਂ ਜਸਪਾਲ ਸਿੰਘ ਅਨੁਸਾਰ ਅਸਟਰੀਆ ਵਿਖੇ ਵਾਪਰੀ ਗੋਲੀ ਚੱਲਣ ਦੀ ਘਟਨਾ ਦੇ ਵਿਰੋਧ ‘ਚ ਇਕ ਸਮੁਦਾਏ ਦੇ ਭੜਕੇ ਹੋਏ ਨੌਜਵਾਨਾਂ ਦੀ ਭੀੜ ਨੇ ਰਾਮਾਮੰਡੀ ਚੌਕ ਵਿਖੇ ਪੁਲਿਸ ਦੀ ਇਕ ਨੀਲੀ ਬੱਤੀ ਲੱਗੀ ਸਰਕਾਰੀ ਗੱਡੀ, ਪੀ.ਸੀ.ਆਰ. ਦੇ ਮੋਟਰ ਸਾਈਕਲਾਂ ਅਤੇ ਇਕ ਸਕੂਟਰ ਨੂੰ ਸਾੜਨ ਤੋਂ ਇਲਾਵਾ ਜਲੰਧਰ ਛਾਉਣੀ ਰੇਲਵੇ ਸਟੇਸ਼ਨ ਦੇ ਬੁਕਿੰਗ ਕਾਊਂਟਰ, ਚੌਕੀ ਜੀ.ਆਰ.ਪੀ. ਅਤੇ ਪਲੇਟ ਫਾਰਮਾਂ ‘ਤੇ ਲੱਗੀਆਂ ਦੁਕਾਨਾਂ ਦੀ ਭਾਰੀ ਤੋੜ-ਭੰਨ ਕੀਤੀ ਗਈ। ਇਸ ਮੌਕੇ ਭੀੜ ਨੇ ਸਟੇਸ਼ਨ ‘ਤੇ ਡੀ.ਐਮ.ਯੂ. ਅਤੇ ਫਲਾਇੰਗ ਮੇਲ ਗੱਡੀ ‘ਤੇ ਵੀ ਪਥਰਾਓ ਕੀਤਾ ਤੇ ਤੋੜ-ਭੰਨ੍ਹ ਕੀਤੀ। ਇਸੇ ਤਰ੍ਹਾਂ ਸਟੇਸ਼ਨ ਦੇ ਬਾਹਰ ਸਥਿਤ ਕੈਂਟ ਬੋਰਡ ਦੇ ਚੁੰਗੀ ਨਾਕੇ ਅਤੇ ਰਾਮਾ ਮੰਡੀ ਚੌਕ ‘ਚ ਬਣੇ ਪੁਲਿਸ ਦੇ ਬੀਟ ਬੋਕਸ ਨੂੰ ਵੀ ਭੀੜ ਵੱਲੋਂ ਤਹਿਸ-ਨਹਿਸ ਕਰ ਦਿੱਤਾ ਗਿਆ। ਇਹ ਭੀੜ ਰਾਮਾ ਮੰਡੀ (ਕਾਕੀ ਪਿੰਡ) ਤੋਂ ਇਕੱਠੀ ਹੋ ਕੇ ਦੁਕਾਨਾਂ ਤੇ ਰੇਹੜੀਆਂ ਦੀ ਭੰਨ-ਤੋੜ ਕਰਦੀ ਹੋਈ ਰਾਮਾ ਮੰਡੀ ਚੌਕ ਵਿਖੇ ਪੁੱਜੀ, ਜਿਥੇ ਉਨ੍ਹਾਂ ਸਭ ਤੋਂ ਪਹਿਲਾਂ ਥਾਣਾ ਮੁਖੀ ਧਰਮਪਾਲ ਦੀ ਗੱਡੀ ਨੂੰ ਅੱਗ ਲਗਾਈ, ਉਸ ਤੋਂ ਬਾਅਦ ਉਨ੍ਹਾਂ ਪੀ.ਸੀ.ਆਰ. ਦੇ ਦੋ ਮੋਟਰ ਸਾਈਕਲ ਤੇ ਇਕ ਸਕੂਟਰ ਨੂੰ ਅੱਗ ‘ਚ ਭੇਟ ਕਰ ਦਿੱਤਾ। ਭੀੜ ਨੇ ਸਟੇਸ਼ਨ ਦੀ ਭਾਰੀ ਤੋੜ-ਫੋੜ ਕਰਕੇ ਤਹਿਸ-ਨਹਿਸ ਕਰ ਦਿੱਤਾ। ਚੌਕੀ ਜੀ.ਆਰ.ਪੀ. ਦੇ ਮੁਲਾਜ਼ਮ ਚੌਕੀ ਛੱਡ ਕੇ ਭੱਜ ਗਏ ਤੇ ਭੀੜ ਨੇ ਚੌਕੀ ਨੂੰ ਵੀ ਆਪਣਾ ਨਿਸ਼ਾਨਾ ਬਣਾਇਆ।

ਫਿਲੌਰ ‘ਚ ਜਾਮ
ਫਿਲੌਰ ਤੋਂ ਸਤਿੰਦਰ ਸ਼ਰਮਾ ਅਨੁਸਾਰ ਇਥੇ ਲੋਕਾਂ ਨੇ ਵਿਆਨਾ ‘ਚ ਬੱਲਾਂ ਵਾਲੇ ਸੰਤਾਂ ‘ਤੇ ਕੀਤੇ ਹਮਲੇ ਵਿਰੁੱਧ ਰੋਸ ਮਾਰਚ ਕੀਤਾ। ਇਸ ਮੌਕੇ ਪਹੁੰਚੀ ਪੁਲਿਸ ਫੋਰਸ ਨੇ ਸਥਿਤੀ ‘ਤੇ ਕਾਬੂ ਪਾਉਣ ਲਈ ਪੁਖ਼ਤਾ ਇੰਤਜ਼ਾਮ ਕੀਤੇ।

ਲੁਧਿਆਣਾ ‘ਚ ਬੱਸ ਸਾੜੀ
ਲੁਧਿਆਣਾ ਤੋਂ ਪਰਮਿੰਦਰ ਸਿੰਘ ਆਹੂਜਾ ਅਨੁਸਾਰ ਬਸਤੀ ਜੋਧੇਵਾਲ ਚੌਕ ਵਿਚ ਧਰਨਾ ਦੇ ਕੇ ਸੜਕ ‘ਤੇ ਜਾਮ ਲੱਗਾ ਦਿੱਤਾ। ਅੱਜ ਰਾਤ 10.30 ਵਜੇ ਦੇ ਕਰੀਬ ਰੋਹ ਵਿਚ ਆਏ ਲੋਕ ਬਸਤੀ ਜੋਧੇਵਾਲ ਚੌਕ ਵਿਚ ਇਕੱਠੇ ਹੋਏ ਅਤੇ ਉਥੇ ਧਰਨਾ ਦੇ ਕੇ ਸੜਕ ‘ਤੇ ਜਾਮ ਲਗਾ ਦਿੱਤਾ। ਇਹ ਪ੍ਰਦਰਸ਼ਨਕਾਰੀ ਪੰਜਾਬ ਸਰਕਾਰ ਖਿਲਾਫ ਨਾਅਰੇਬਾਜ਼ੀ ਕਰ ਰਹੇ ਹਨ। ਸੜਕ ‘ਤੇ ਦਿੱਤੇ ਇਸ ਧਰਨੇ ਕਾਰਨ ਦਿੱਲੀ ਤੋਂ ਲੁਧਿਆਣਾ ਜਾਣ ਵਾਲੇ ਵਾਹਨਾਂ ਦੀ ਲੰਬੀ ਕਤਾਰ ਸੜਕ ‘ਤੇ ਲੱਗ ਗਈ ਜਿਸ ਕਾਰਨ ਪੁਲਿਸ ਵੱਲੋਂ ਜਲੰਧਰ ਬਾਈਪਾਸ ਤੋਂ ਆਵਾਜਾਈ ਬੰਦ ਕਰ ਦਿੱਤੀ ਸੀ। ਇਸ ਤੋਂ ਕੁਝ ਸਮਾਂ ਪਹਿਲਾਂ ਪੁਲਿਸ ਨੇ ਸਲੇਮ ਟਾਬਰੀ, ਜੋਧੇਵਾਲ ਬਸਤੀ ਅਤੇ ਆਸਪਾਸ ਦੇ ਇਲਾਕਿਆਂ ਵਿਚ ਫਲੈਗ ਮਾਰਚ ਕੀਤਾ। ਭੜਕੇ ਹੋਏ ਇਨ੍ਹਾਂ ਲੋਕਾਂ ਨੇ ਸੜਕ ‘ਤੇ ਟਾਇਰ ਸਾੜ ਕੇ ਪ੍ਰਦਰਸ਼ਨ ਕੀਤਾ। ਸੂਚਨਾ ਮਿਲਦੇ ਸਾਰ ਹੀ ਭਾਰੀ ਪੁਲਿਸ ਫੋਰਸ ਉਥੇ ਤਾਇਨਾਤ ਕੀਤੀ ਗਈ ਸੀ। ਜਲੰਧਰ ਬਾਈਪਾਸ ‘ਤੇ ਭੜਕੀ ਭੀੜ ਨੇ ਰੋਡਵੇਜ਼ ਦੀ ਬੱਸ ਸਾੜ ਦਿੱਤੀ।

ਆਵਾਜਾਈ ਰੋਕੀ
ਕਰਤਾਰਪੁਰ ਤੋਂ ਕਾਹਲੋਂ ਅਨੁਸਾਰ ਵਿਆਨਾ ਘਟਨਾ ਵਿਰੁੱਧ ਰੋਸ ਪ੍ਰਗਟਾਉਂਦੇ ਹੋਏ ਕੌਮੀ ਮਾਰਗ ਦੇ ਵੱਖ ਵੱਖ ਥਾਂਵਾਂ ‘ਤੇ ਜਾਮ ਲਾ ਕੇ ਆਵਾਜਾਈ ਰੋਕੀ ਗਈ ਗੱਡੀਆਂ ਦੀ ਭੰਨ ਤੋੜ ਵੀ ਕੀਤੀ ਗਈ। ਕਰਤਾਰਪੁਰ ਦੇ ਮੁੱਖ ਚੌਕ ‘ਚ ਪੌਣੇ ਅੱਠ ਵਜੇ ਲਾਇਆ ਗਿਆ ਜਾਮ ਕਰੀਬ ਦੋ ਘੰਟੇ ਰਿਹਾ ਤੇ ਡੇਰਾ ਬੱਲਾਂ ਦੇ ਸ਼ਰਧਾਲੂਆਂ ਵੱਲੋਂ ਚੌਕ ‘ਚ ਅੱਗ ਬਾਲ ਕੇ ਗੋਲੀ ਕਾਂਡ ਵਿਰੁੱਧ ਸਖਤ ਨਾਅਰੇਬਾਜ਼ੀ ਕੀਤੀ ਗਈ। ਕਰੀਬ ਦੋ ਘੰਟੇ ਬਾਅਦ ਥਾਣਾ ਮੁਖੀ ਸੁਖਜੀਤ ਸਿੰਘ ਨੇ ਰੋਸ ਵਿਖਾਵਾ ਕਾਰੀਆਂ ਨੂੰ ਸਮਝਾ ਬੁੱਝਾ ਕੇ ਰਸਤਾ ਖੁਲਵਾਇਆ।

ਬੱਸ ਸਾੜੀ
ਹੁਸ਼ਿਆਰਪੁਰ ਤੋਂ ਹਰਪ੍ਰੀਤ ਅਨੁਸਾਰ ਵਿਆਨਾ ਵਿਖੇ ਹੋਈ ਘਟਨਾ ਦੇ ਰੋਸ ਵਿਚ ਭੜਕੇ ਹੋਏ ਲੋਕਾਂ ਨੇ ਰਾਤ ਇਕ ਬੱਸ ਨੂੰ ਅੱਗ ਲਗਾ ਦਿੱਤੀ ਅਤੇ ਸ਼ਹਿਰ ਦੇ ਕਈ ਥਾਵਾਂ ‘ਤੇ ਮੁਜ਼ਾਹਰੇ ਕੀਤੇ। ਐਸ. ਐਸ. ਪੀ. ਪ੍ਰਮੋਦ ਬਾਨ ਅਤੇ ਹੋਰ ਅਧਿਕਾਰੀ ਲਗਾਤਾਰ ਹਾਲਾਤ ‘ਤੇ ਨਜ਼ਰ ਰੱਖ ਰਹੇ ਸਨ।

ਚੱਕਾ ਜਾਮ ਕੀਤਾ
ਮੇਹਲੀ ਤੋਂ ਮਨਦੀਪ ਸਿੰਘ ਅਨੁਸਾਰ ਕੁਝ ਵਿਅਕਤੀਆਂ ਨੇ ਇਕ ਪੰਜਾਬ ਰੋਡਵੇਜ਼ ਦੀ ਬੱਸ ਨੰਬਰ ਪੀ. ਬੀ. 32 ਐਫ 0382 ਜੋ ਕਿ ਚੰਡੀਗੜ੍ਹ ਤੋਂ ਜਲੰਧਰ ਨੂੰ ਜਾ ਰਹੀ ਸੀ, ਦੇ ਸ਼ੀਸ਼ੇ ਵੀ ਭੰਨ ਦਿੱਤੇ ਪਰ ਸਵਾਰੀਆਂ ਦੇ ਸੱਟ ਚੋਟ ਨਹੀਂ ਲੱਗੀ।

ਅਜੀਤ ਜਲੰਧਰ 20090525

2) ਡੇਰੇ ਅਤੇ ਬਾਦਲ ਵਲੋਂ ਅਪੀਲਾਂ, ਪਰ ਕਿਸ ਚੀਜ਼ ਲਈ?

... ਅੱਗੇ ਪੜ੍ਹੋ

ਬਲਵਿੰਦਰਪਾਲ ਅਤੇ ਉਸ ਦੇ ਸਮਰਥਕਾਂ ਵਲੋਂ ਦੋਗਲੀਆਂ ਚਾਲਾਂ

ਲੇਖ - ਕਮਲੇਸ਼ ਅਹੀਰ ਦੀ ਸਿੱਖ ਧਰਮ ਬਾਰੇ ਅਧੂਰੀ ਸਮਝ

ਅਖੇ; ਸਿੱਖ ਧਰਮ ਦੇ ਅਸੂਲ ਬੁੱਧ ਧਰਮ ਤੋਂ ਲਏ ਗਏ ਨੇ
ਬਾਬਾ ਸਾਹਿਬ ਬੀ ਆਰ ਅੰਬੇਡਕਰ ਵੈਲਫੇਅਰ ਐਸੋਸੀਏਸ਼ਨ ਦੀ ਚਿੰਤਕ ਬੀਬੀ ਕਮਲੇਸ਼ ਅਹੀਰ ਦੁਆਰਾ ਪਿਛਲੇ ਦਿਨੀਂ ਇਟਲੀ ‘ਚ ਬੁੱਧ ਧਰਮ ਦੇ ਪ੍ਰਚਾਰ ਦੌਰਾਨ ਸਿੱਖ ਧਰਮ, ਖਾਲਸੇ ਦੀ ਸਿਰਜਣਾ ਤੇ ਸਿੱਖ ਕੌਮ ਦੇ ਜੁਝਾਰੂਪਣ ਨੂੰ ਲੈ ਕੇ ਟਿੱਪਣੀਆਂ ਕੀਤੀਆਂ ਗਈਆਂ। ਇਹ ਟਿੱਪਣੀਆਂ ਯੂ ਟਿਊਬ ‘ਚ ਦੇਖੀਆਂ ਜਾ ਸਕਦੀਆਂ ਹਨ। ਇਸ ‘ਚ ਬੀਬੀ ਅਹੀਰ ਨੇ ਜਾਤ-ਪਾਤ ਰਹਿਤ ਸਮਾਜ ਸਿਰਜਣ, ਗਿਆਨਵਾਨ ਹੋਣ ਦੀ ਜਿੱਥੇ ਗੱਲ ਕੀਤੀ, ਉੱਥੇ ਬਿਪਰਨਵਾਦ ਦਾ ਸ਼ਿਕਾਰ ਹੋਏ ਸਿੱਖ ਸਮਾਜ ‘ਤੇ ਟਿੱਪਣੀਆਂ ਕੀਤੀਆਂ, ਪਰ ਸਿੱਖ ਧਰਮ ਬਾਰੇ ਅਧੂਰੀ ਸਮਝ ਹੋਣ ਕਰਕੇ ਅਹੀਰ ਨੇ ਇਹ ਮਤ ਪੇਸ਼ ਕੀਤਾ ਕਿ ਸਿੱਖ ਧਰਮ ਕੋਈ ਵੱਖਰਾ ਧਰਮ ਨਹੀਂ ਹੈ। ਸਿੱਖ ਧਰਮ ਦੀ ਫਿਲਾਸਫ਼ੀ ਬੁੱਧ ਧਰਮ ਤੋਂ ਲਈ ਗਈ ਹੈ। ਉਹ ਗੁਰਬਾਣੀ ਦੇ ਸੰਤਾਂ ਨੂੰ ਬੋਧੀ ਦੱਸਦੀ ਹੈ।

ਜਦ ਕਿ ਇਤਿਹਾਸਕ ਸੱਚ ਇਹ ਹੈ ਕਿ ਸਿੱਖ ਧਰਮ ਤੇ ਬੁੱਧ ਧਰਮ ‘ਚ ਜਾਤ-ਪਾਤ ਰਹਿਤ ਸਰਬੱਤ ਦੇ ਭਲੇ ਦੇ ਸਮਾਜ ਸਿਰਜਣ ਦੀ ਸਾਂਝ ਹੈ, ਬੁੱਧ ਧਰਮ ਅਕਾਲ ਪੁਰਖ ਦੀ ਹੋਂਦ ਤੋਂ ਇਨਕਾਰੀ ਹੋਣ ਕਰਕੇ ਸਿੱਖ ਧਰਮ ਨਾਲੋਂ ਨਿਖੇੜਾ ਹੈ। ਬਾਬਾ ਨਾਮਦੇਵ, ਸੰਤ ਕਬੀਰ, ਸੰਤ ਰਵੀਦਾਸ ਮਹਾਰਾਜ ਨੂੰ ਬੀਬੀ ਅਹੀਰ ਬੋਧੀ ਸੰਤ ਦੱਸਦੀ ਹੈ, ਉਹ ਵੀ ਬੋਧੀ ਵਿਚਾਰਧਾਰਾ ਦੇ ਉਲਟ ਅਕਾਲ ਪੁਰਖ ਦੀ ਹੋਂਦ ਨੂੰ ਸਵੀਕਾਰ ਕਰਦੇ ਹਨ। ਫਿਰ ਉਨ੍ਹਾਂ ਨੂੰ ਬੋਧੀ ਸੰਤ ਕਿਵੇਂ ਕਿਹਾ ਜਾ ਸਕਦਾ ਹੈ? ਸੰਤ ਰਵਿਦਾਸ ਮਹਾਰਾਜ ਨੇ ਆਪਣੀ ਬਾਣੀ ਵਿੱਚ ਨਿਰੰਜਨ ਸ਼ਬਦ ਦੀ ਵਰਤੋ ਅਕਾਲ ਪੁਰਖ ਲਈ ਕੀਤੀ ਹੈ;

ਤਨੁ ਮਨੁ ਅਰਪਉ ਪੂਜ ਚਰਾਵਉ॥

ਗੁਰ ਪਰਸਾਦਿ ਨਿਰੰਜਨੁ ਪਾਵਉ॥ (ਪੰਨਾ 521)

ਸਿੱਖ ਧਰਮ ਵੀ ਆਦਿ ਜੁਗਾਦਿ ਤੇ ਭਵਿੱਖ, ਅਕਾਲ ਪੁਰਖ ਦੀ ਅਗੰਮੀ ਸ਼ਕਤੀ ਵਿੱਚ ਵਿਸ਼ਵਾਸ ਦਾ ਪੱਕਾ ਧਾਰਨੀ ਹੈ।

ਬੀਬੀ ਅਹੀਰ ਇੱਥੋਂ ਤੱਕ ਕਹਿ ਗਈ ਕਿ ਗੁਰੂ ਗੋਬਿੰਦ ਸਿੰਘ ਨੇ ‘ਸਿੱਖ’ ਸ਼ਬਦ ਬੁੱਧ ਦੇ ਉਚਾਰਨਾਂ ‘ਚੋਂ ਲਿਆ ਹੈ। ਆਪਣੇ ਤਰਕ ਨੂੰ ਤਕੜਾ ਕਰਨ ਲਈ ਉਹ ਕਹਿੰਦੀ ਹੈ ਕਿ ਗੁਰੂ ਗੋਬਿੰਦ ਸਿੰਘ ਪਟਨਾ ਵਿੱਚ ਪੈਦਾ ਹੋਏ ਸਨ, ਬੁੱਧ ਗਯਾ ਗਏ ਸਨ, ਇਸ ਲਈ ਗੁਰੂ ਗੋਬਿੰਦ ਸਿੰਘ ਬੁੱਧ ਧਰਮ ਤੋਂ ਪ੍ਰਭਾਵਿਤ ਸਨ। ਗੁਰੂ ਗੋਬਿੰਦ ਸਿੰਘ ਦੁਆਰਾ ਪੰਜ ਪਿਆਰੇ ਸਾਜਣ ਦੀ ਪਰੰਪਰਾ ਨੂੰ ਵੀ ਉਹ ਬੁੱਧ ਧਰਮ ਦੇ ਪੰਚਸ਼ੀਲ ਨਾਲ ਜੋੜਦੀ ਹੈ। ਇਹ ਠੀਕ ਹੈ ਕਿ ਗੁਰੂ ਗੋਬਿੰਦ ਸਿੰਘ ਜੀ ਪਟਨਾ ‘ਚ ਪੈਦਾ ਹੋਏ ਸਨ, ਪਰ ਇਹ ਕਿਤੇ ਜ਼ਿਕਰ ਨਹੀਂ ਮਿਲਦਾ ਕਿ ਉਹ ਬੁੱਧ ਗਯਾ ਗਏ ਸਨ। ਗੁਰੂ ਗੋਬਿੰਦ ਸਿੰਘ ਜੀ ਦੇ ਸਮੇਂ ਤਾਂ ਬੁੱਧ ਧਰਮ ਤੇ ਉਨ੍ਹਾਂ ਦੇ ਧਾਰਮਿਕ ਸਥਾਨਾਂ ਦੀ ਹੋਂਦ ਮਿਟਾ ਦਿੱਤੀ ਹੋਈ ਸੀ। ਫਿਰ ਇਤਿਹਾਸ ਤੋਂ ਉਲਟ ਅਜਿਹੀਆਂ ਗੱਲਾਂ ਕੀ ਅਰਥ ਰੱਖਦੀਆਂ ਹਨ? ਮਹਾਤਮਾ ਬੁੱਧ ਨੇ ਵਰੁਣ ਆਸ਼ਰਮ ਦੀ ਪਰਵਾਹ ਨਾ ਕਰਦਿਆਂ ਹੋਇਆਂ ਸਾਰਨਾਥ ਵਿੱਚ ਆਪਣੇ ਪੰਜ ਚੇਲੇ ਬਣਾਏ। ਇਹ ਮਹਾਤਮਾ ਬੁੱਧ ਦੇ ਸਦਾ ਲਈ ਨਿਕਟਵਰਤੀ ਸਨ। ਇਨ੍ਹਾਂ ਚੇਲਿਆਂ ਵਿੱਚੋਂ ਸਾਰਸਵਤ ਤੇ ਮੌਗਾਲਿਕ ਦੋ ਬ੍ਰਾਹਮਣ ਸਨ। ਅਨੰਦ ਖੱਤਰੀ, ਉਪਾਲੀ ਨਾਈ ਤੇ ਸੁਨੀਤ ਭੰਗੀ ਸੀ। ਇਨ੍ਹਾਂ ਨੂੰ ਬੁੱਧ ਨੇ ਇੱਕੋ ਪੰਗਤ ਵਿੱਚ ਬਿਠਾ ਕੇ ਲੋਹੇ ਦੇ ਬਰਤਨਾਂ ਵਿੱਚ ਪ੍ਰਸ਼ਾਦਿ ਛਕਾਇਆ ਸੀ, ਪਰ ਗੁਰੂ ਗੋਬਿੰਦ ਸਿੰਘ ਜੀ ਦੀ ਖਾਲਸਾ ਪੰਥ ਦੀ ਸਿਰਜਣਾ ਨੂੰ ਬੁੱਧ ਦੇ ਪੰਜ ਚੇਲਿਆਂ ਨਾਲ ਨਹੀਂ ਮੇਲਿਆ ਜਾ ਸਕਦਾ।

ਬੁੱਧ ਦਾ ਸਿਧਾਂਤ ਸ਼ਾਂਤਮਈ ਪ੍ਰਕਿਰਿਆ ਨਾਲ ਜੁੜਦਾ ਹੈ ਅਤੇ ਗੁਰੂ ਗੋਬਿੰਦ ਸਿੰਘ ਜੀ ਦੀ ਪੰਜ ਪਿਆਰਿਆਂ ਤੇ ਖ਼ਾਲਸਾ ਪੰਥ ਦੀ ਸਿਰਜਣਾ ਸਿਰ ਭੇਟ ਕਰਨ ਨਾਲ ਅਤੇ ਦੁਸ਼ਟ ਸੰਘਾਰਨ ਨਾਲ ਜੁੜਦੀ ਹੈ। ਇਹ ਉਸ ਫ਼ੌਜ ਦੀ ਤਿਆਰੀ ਹੈ, ਜੋ ਸਿੱਧੀ ਅਕਾਲ ਪੁਰਖ ਦੇ ਅਧੀਨ ਹੈ, ਜਿਸ ਨੇ ‘ਬੇਗਮਪੁਰਾ’ ਅਤੇ ਹਲੇਮੀ ਰਾਜ ਸਿਰਜਣਾ ਹੈ। ਗੁਰੂ ਨੂੰ ਅਹਿਸਾਸ ਹੈ ਕਿ ਅਜਿਹਾ ਕਰਨ ਨਾਲ ਉਨ੍ਹਾਂ ਦੀ ਟੱਕਰ ਉੱਚ ਜਾਤੀ ਦੇ ਜਾਤੀਵਾਦੀ ਪਹਾੜੀ ਰਾਜਿਆਂ ਅਤੇ ਦਿੱਲੀ ਹਕੂਮਤ ਨਾਲ ਹੋਣੀ ਨਿਸ਼ਚਿਤ ਹੈ, ਜਿਸ ਲਈ ਗੁਰੂ ਤਿਆਰ ਵੀ ਹੈ, ਪਰ ਬੁੱਧ ਦੇ ਪੰਜ ਚੇਲਿਆਂ ਦੀ ਸਿਰਜਣਾ ਪਿੱਛੇ ਹਥਿਆਰਬੰਦ ਇਨਕਲਾਬ ਅਤੇ ਆਦਰਸ਼ਵਾਦੀ ਰਾਜ ਦਾ ਸੰਕਲਪ ‘ਇਨ ਗ਼ਰੀਬ ਸਿੰਘਨ ਕੋ ਦੈਹੋ ਪਾਤਿਸ਼ਾਹੀ, ਯਾਦ ਰਖੇ ਹਮਰੀ ਗੁਰਿਆਈ’ ਕਿਤੇ ਨਹੀਂ ਹੈ। ਇਸ ਲਈ ਦੋਹਾਂ ਵਿਚਾਰਧਾਰਾਵਾਂ ਵਿੱਚ ਬਹੁਤ ਵੱਡਾ ਅੰਤਰ ਹੈ। ਜੇਕਰ ਪੰਜ ਦੀ ਚੋਣ ਦਾ ਇਤਿਹਾਸ ਦੇਖਿਆ ਜਾਵੇ, ਤਾਂ ਬੁੱਧ ਧਰਮ ਤੋਂ ਪਹਿਲਾਂ ਹਿੰਦੂ ਧਰਮ ‘ਚ ਪੰਜ ਬ੍ਰਾਹਮਣਾਂ ਨੂੰ ਸਰਵਸ੍ਰੇਸ਼ਟ ਗਿਣਿਆ ਜਾਂਦਾ ਹੈ। ਪੰਜ ਬ੍ਰਾਹਮਣਾਂ ਨੂੰ ਭੋਜਨ ਛਕਾਉਣਾ ਅੱਜ ਵੀ ਹਿੰਦੂ ਧਰਮ ਵਿੱਚ ਪਵਿੱਤਰ ਸਮਝਿਆ ਜਾਂਦਾ ਹੈ। ਇਸ ਤੋਂ ਸਪੱਸ਼ਟ ਹੈ ਕਿ ਪੰਜ ਵਿਅਕਤੀਆਂ ਦੀ ਚੋਣ ਦਾ ਅਧਿਕਾਰ ਪਹਿਲਾਂ ਹੀ ਭਾਰਤੀ ਸੱਭਿਆਚਾਰ ਵਿੱਚ ਮੌਜੂਦ ਹੈ।

ਇਸੇ ਦੌਰਾਨ ਉਹ ਗੁਰੂ ਨਾਨਕ ਸਾਹਿਬ ਨੂੰ ਗੁਰੂ ਰਵਿਦਾਸ ਤੋਂ ਪ੍ਰਭਾਵਿਤ ਦੱਸਦੀ ਹੈ, ਜਦ ਕਿ ਸੱਚੇ ਸੌਦੇ ਦੌਰਾਨ ਸੰਤ ਰਵੀਦਾਸ ਮਹਾਰਾਜ ਤੇ ਗੁਰੂ ਨਾਨਕ ਸਾਹਿਬ ਦੀ ਮੁਲਾਕਾਤ ਤੋਂ ਪਹਿਲਾਂ ਗੁਰੂ ਨਾਨਕ ਸਾਹਿਬ ਨੇ ਜੰਜੂ ਵਿਰੁੱਧ ਬਗਾਵਤ ਕਰ ਦਿੱਤੀ ਸੀ। ਉਦੋਂ ਨਾ ਸਿੱਖ ਧਰਮ ਦੀ ਸਥਾਪਨਾ ਹੋਈ ਸੀ ਤੇ ਨਾ ਹੀ ਉਹ ਸੰਤ ਰਵੀਦਾਸ ਨੂੰ ਮਿਲੇ ਸਨ। ਇਹ ਤਾਂ ਕਿਹਾ ਜਾ ਸਕਦਾ ਹੈ ਕਿ ਸੰਤ ਗੁਰੂ ਰਵੀਦਾਸ ਤੇ ਗੁਰੂ ਨਾਨਕ ਸਾਹਿਬ ਦੇ ਵਿਚਾਰ ਆਪਸ ‘ਚ ਮਿਲਦੇ ਸਨ, ਤਾਂ ਹੀ ਸੱਚਾ ਸੌਦਾ ਹੋਇਆ ਸੀ, ਪਰ ਇਹ ਕਹਿਣਾ ਕਿ ਗੁਰੂ ਨਾਨਕ ਸਾਹਿਬ ਨੇ ਸੰਤ ਰਵੀਦਾਸ ਤੋਂ ਸਿੱਖਿਆ ਲਈ, ਇਹ ਇਤਿਹਾਸਕ ਤੱਥਾਂ ਤੋਂ ਉਲਟ ਗੱਲ ਹੈ।

ਇਸੇ ਤਰ੍ਹਾਂ ਬੀਬੀ ਅਹੀਰ ਨੇ ਸਿੱਖਾਂ ਦੇ ਕੇਸਰੀ ਰੰਗ ਤੇ ਗਤਕੇ ਨੂੰ ਬੁੱਧ ਧਰਮ ਤੋਂ ਉਧਾਰ ਲਿਆ ਕਹਿੰਦੀ ਹੈ ਤੇ ਗਤਕੇ ਨੂੰ ਕੂੰਗ-ਫੂ ਨਾਲ ਜੋੜਦੀ ਹੈ। ਉਹ ਸਿੱਖ ਧਰਮ ‘ਤੇ ਸਖ਼ਤ ਟਿੱਪਣੀਆਂ ਕਰਦੀ ਹੋਈ ਆਖਦੀ ਹੈ ਕਿ ਅੱਜ ਕੱਲ੍ਹ ਕਿਰਪਾਨ ਪਹਿਨਣ ਦੀ ਕੀ ਲੋੜ ਹੈ? ਅਜੋਕਾ ਯੁੱਗ ਤਾਂ ਮਿਜ਼ਾਇਲਾਂ ਦਾ ਯੁੱਗ ਹੈ ਤੇ ਸਿੱਖ ਕਮਲੇ ਕਿਰਪਾਨਾਂ ਪਾਈ ਫਿਰਦੇ ਨੇ। ਉਸ ਨੇ ਇਹ ਵੀ ਕਿਹਾ ਕਿ ਅੱਜ ਮੀਡੀਏ ਦੇ ਰਾਹੀਂ ਜੰਗ ਲੜੀ ਜਾ ਸਕਦੀ ਹੈ। ਕਿਰਪਾਨਾਂ ਦੀ ਲੋੜ ਨਹੀਂ।

ਬੀਬੀ ਜੀ ਨੂੰ ਇਹ ਗਿਆਨ ਹੋਣਾ ਚਾਹੀਦਾ ਹੈ ਕਿ ਕਿਰਪਾਨ ਦਾ ਅਰਥ ਕਿਰਪਾ ਹੈ। ਇਹ ਕਕਾਰ ਕ੍ਰਿਪਾ ਦਾ ਪ੍ਰਤੀਕ ਹੈ। ਇਹ ਸਿੱਖ ਨੂੰ ਯਾਦ ਕਰਾਉਂਦਾ ਹੈ ਕਿ ਜ਼ਾਲਮ ਵਿਰੁੱਧ ਜੂਝਣਾ ਅਤੇ ਨਿਮਾਣੇ ਨਿਤਾਣੇ ਦੀ ਰਾਖੀ ਕਰਨੀ। ਖ਼ਾਲਸਾ ਗੁਰੂ ਗੋਬਿੰਦ ਸਿੰਘ ਦਾ ਫ਼ੌਜੀ ਹੈ। ਇਸ ਲਈ ਪੰਜ ਕਕਾਰ ਉਸ ਦੀ ਵਰਦੀ ਹਨ, ਜੋ ਸਦਾ ਜਿਊਣ ਤੋਂ ਲੈ ਕੇ ਮਰਨ ਤੱਕ ਉਸ ਦੇ ਨਾਲ ਰਹਿਣੇ ਹਨ। ਇਹ ਦਸਮ ਪਾਤਸ਼ਾਹ ਗੁਰੂ ਗੋਬਿੰਦ ਸਿੰਘ ਜੀ ਦਾ ਉਦੇਸ਼ ਹੈ। ਇਸ ਨੂੰ ਹਰੇਕ ਖ਼ਾਲਸਾ ਸਤਿ ਕਰਕੇ ਮੰਨਦਾ ਹੈ। ਸਿੱਖ ਅਰਦਾਸ ਸਮੇਂ ਭਗੌਤੀ ਨੂੰ ਧਿਆਉਂਦੇ ਨੇ। ਇੱਥੇ ਭਗੌਤੀ ਦਾ ਅਰਥ ਕਿਰਪਾਨ ਹੈ, ਜੋ ਸ਼ਕਤੀ ਦੀ ਪ੍ਰਤੀਕ ਹੈ। ਸਿੱਖਾਂ ਦੇ ‘ਚ ਭਗਤੀ ਤੇ ਸ਼ਕਤੀ ਇਕੱਠੀ ਹੈ। ਸਿੱਖ ਸੰਤ ਸਿਪਾਹੀ ਹੈ। ਦਸਮ ਪਾਤਸ਼ਾਹ ‘ਜੈ ਤੇਗੰ’ ਵਾਲੇ ਸ਼ਬਦ ‘ਚ ਤੇਗ ਦਾ ਇਹੋ ਅਰਥ ਹੈ। ‘ਕਬਯੋ ਬਾਚ ਬੇਨਤੀ ਚੌਪਈ’ ਵਿੱਚ ਗੁਰੂ ਗੋਬਿੰਦ ਸਿੰਘ ਜੀ ਨੇ ਅਕਾਲ ਪੁਰਖ ਨੂੰ ‘ਸ੍ਰੀ ਅਸਿਧੁਜ’ ਅਤੇ ‘ਖੜਗ ਕੇਤ’ ਕਹਿ ਕੇ ਸੰਬੋਧਿਤ ਕੀਤਾ ਹੈ। ਮੁੱਢ ਕਦੀਮ ਤੋਂ ਚੱਲੀ ਆਉਂਦੀ ਖ਼ਾਲਸਾ ਰਾਜ ਦੀ ਮੋਹਰ ‘ਚ ‘ਤੇਗੇ’ ਨਾਨਕ ਸ਼ਬਦਾਂ ਨੂੰ ਇਸੇ ਸੰਕੇਤ ਲਈ ਵਰਤਿਆ ਗਿਆ ਹੈ। ਕਿਰਪਾਨ ਧਾਰ ਕੇ ਸਿੱਖ ਸੰਕਲਪ ਲੈਂਦਾ ਹੈ ਕਿ ਉਹ ਬਦੀ ਨਾਲ ਜੰਗ ਲਈ ਹਰ ਵਕਤ ਤਿਆਰ ਹੈ ਤੇ ਉਹ ਸਰਬੱਤ ਦੇ ਭਲੇ ਲਈ ਸਿਰ ਦੇਣ ਨੂੰ ਵੀ ਤਿਆਰ ਹੈ, ਜੋ ਕਿਰਪਾਨਧਾਰੀ ਬਦੀ ਲਈ ਜੂਝਦੇ ਨਹੀਂ, ਧੜੇਬੰਦੀਆਂ ‘ਚ ਪੈ ਕੇ ਇਕ ਦੂਜੇ ਦੀ ਲਾਹਪਾਹ ਕਰਦੇ ਹਨ, ਉਹ ਗੁਰੂ ਦੇ ਸਿੱਖ ਨਹੀਂ।

ਬੀਬੀ ਜੀ ਨੂੰ ਇਹ ਚੇਤਾ ਹੋਣਾ ਚਾਹੀਦਾ ਹੈ ਕਿ ਗੁਰੂ ਗੋਬਿੰਦ ਸਿੰਘ ਜੀ ਵੇਲੇ ਤੋੜੇਦਾਰ ਬੰਦੂਕਾਂ ਤੇ ਤੋਪਾਂ ਤੱਕ ਆ ਗਈਆਂ ਸਨ, ਪਰ ਕਿਰਪਾਨ ਦੀ ਮਹੱਤਤਾ ਉਸ ਵੇਲੇ ਵੀ ਸੀ ਤੇ ਹੁਣ ਵੀ ਹੈ। ਇਸ ਸੰਬੰਧੀ ਬੀਬੀ ਜੀ ਨੇ ਟਿੱਪਣੀ ਕਰਨ ਤੋਂ ਪਹਿਲਾਂ ਸਿੱਖਾਂ ਦਾ ਇਤਿਹਾਸ ਅਤੇ ਫਿਲਾਸਫੀ ਨੂੰ ਵਾਚ ਲੈਣਾ ਚਾਹੀਦਾ ਸੀ। ਅਧੂਰੀ ਸਮਝ ਰੱਖ ਕੇ ਸਿੱਖ ਪੰਥ ‘ਤੇ ਟਿੱਪਣੀਆਂ ਕਰਨ ਤੋਂ ਗੁਰੇਜ਼ ਕਰਨਾ ਚਾਹੀਦਾ ਹੈ।

ਜਿੱਥੋਂ ਤੱਕ ਸਿੱਖ ਸਮਾਜ ਵਿੱਚ ਆਈਆਂ ਕੁਰੀਤੀਆਂ ਦਾ ਸੁਆਲ ਹੈ, ਉਸ ਬਾਰੇ ਬੀਬੀ ਅਹੀਰ ਨਾਲ ਸਹਿਮਤੀ ਪ੍ਰਗਟਾਈ ਜਾ ਸਕਦੀ ਹੈ ਕਿ ਸਿੱਖ ਜਾਤਾ-ਪਾਤਾਂ ‘ਚ ਫਸੇ ਬ੍ਰਾਹਮਣਵਾਦ ਦਾ ਸ਼ਿਕਾਰ ਹਨ। ਦਰਬਾਰ ਸਾਹਿਬ ‘ਚ ਬੀਬੀਆਂ ਨੂੰ ਕੀਰਤਨ ਨਹੀਂ ਕਰਨ ਦਿੱਤਾ ਜਾਂਦਾ, ਅੰਮ੍ਰਿਤ ਛਕਾਉਣ ‘ਚ ਸ਼ਾਮਲ ਨਹੀਂ ਕੀਤਾ ਜਾਂਦਾ, ਜਦ ਕਿ ਗੁਰਬਾਣੀ ‘ਚ ਇਸਤਰੀ ਨੂੰ ਬਰਾਬਰੀ ਦਾ ਦਰਜਾ ਦਿੱਤਾ ਗਿਆ ਹੈ। ਬੀਬੀ ਜੀ ਇਹ ਵੀ ਠੀਕ ਸੋਚਦੇ ਹਨ ਕਿ ਬੁੱਧ ਧਰਮ ਤੇ ਸਿੱਖ ਧਰਮ ਦੀ ਸਿਰਜਣਾ ਜਾਤ-ਪਾਤ ਨੂੰ ਮਿਟਾਉਣ ਤੇ ਜਾਤੀਵਾਦ ਰਹਿਤ ਸਮਾਜ ਸਿਰਜਣਾ ਲਈ ਹੋਈ ਸੀ।

ਬੁੱਧ ਧਰਮ ਗ੍ਰਹਿਸਥ ਪ੍ਰਾਪਤੀ ਨਾਲੋਂ ਨਿਰਵਾਣ ਪ੍ਰਾਪਤੀ ਉੱਪਰ ਬਲ ਦਿੰਦਾ ਹੈ। ਬੁੱਧ ਅਨੁਸਾਰ ਜੀਵ ਦਾ ਮੂਲ ਉਦੇਸ਼ ਸੰਸਾਰਕ ਦੁੱਖਾਂ ਤੋਂ ਛੁਟਕਾਰਾ ਪਾਉਣਾ ਹੈ। ਉਹ ਜੀਵ ਦੀ ਮੂਲ ਸਮੱਸਿਆ ਦੁੱਖਾਂ ਨੂੰ ਮੰਨਦਾ ਹੈ। ਦੁੱਖਾਂ ਦੀ ਪ੍ਰਵਿਰਤੀ ਨੂੰ ਨਿਰਵਾਣ ਕਹਿੰਦਾ ਹੈ। ਬੁੱਧ ਅਨੁਸਾਰ ਅਸ਼ਟਾਂਗ ਮਾਰਗ ‘ਤੇ ਚੱਲਣ ਵਾਲਾ ਇਸੇ ਜੀਵਨ ‘ਚ ਹੀ ਨਿਰਵਾਣ ਪ੍ਰਾਪਤ ਕਰ ਲੈਂਦਾ ਹੈ। ਨਿਰਵਾਣ ਜਾਂ ਨਿਰਬਾਣ ਪਦ ਗੁਰਬਾਣੀ ‘ਚ ਕਈ ਵਾਰ ਆਇਆ ਹੈ, ਪਰ ਗੁਰਮਤਿ ਦੇ ਨਿਰਬਾਣ ਪਦ ਦਾ ਬੁੱਧ ਨਿਰਵਾਣ ਸੰਕਲਪ ਨਾਲੋਂ ਅੰਤਰ ਹੈ। ਬੁੱਧ ਅਕਾਲ ਪੁਰਖ ਬਾਰੇ ਚੁੱਪ ਹੋਣ ਕਰਕੇ ਇਸ ਦਾ ਗੁਰਮਤਿ ਨਾਲ ਅੰਤਰ ਹੈ। ਗੁਰਮਤਿ ਅਨੁਸਾਰ ਮਾਇਆ ਦੇ ਬੰਧਨ ਤੋਂ ਮੁਕਤ ਹੋ ਕੇ ਉਸ ਦੀ ਕਿਰਪਾ ਨਾਲ ਆਤਮਾ ਦਾ ਪਰਮਾਤਮਾ ਦਾ ਸੰਯੋਗ ਹੋ ਜਾਂਦਾ ਹੈ। ਇਹ ਨਿਰਬਾਣ ਪਦ ਹੈ।

ਤਬ ਲਗੁ ਮਹਲ ਨ ਪਾਈਐ ਜਬਲਗੁ ਸਾਚੁ ਨ ਚੀਤਿ॥

ਸਬਦ ਰਪੈ ਘਰੁ ਪਾਈਐ ਨਿਰਬਾਣੀ ਪਦੁ ਨੀਤਿ॥ (ਗੁਰੂ ਗ੍ਰੰਥ ਸਾਹਿਬ, ਪੰਨਾ 58)

ਗੁਰੂ ਅਰਜਨ ਦੇਵ ਜੀ ਨੇ ਗ੍ਰਹਿਸਥ ਵਿੱਚ ਹੀ ਮਨੁੱਖ ਨੂੰ ਨਿਰਬਾਣ ਪ੍ਰਾਪਤ ਕਰਨ ਨੂੰ ਕਿਹਾ ਹੈ।

ਗ੍ਰਿਹਸਤ ਮਹਿ ਸੋਈ ਨਿਰਬਾਨੁ। (ਸੁਖਮਨੀ ਸਾਹਿਬ)

ਹੁਣ ਨਿਰਵਾਣ ਦਾ ਸੰਕਲਪ ਗੀਤਾ ਵਿੱਚ ਵੀ ਮਿਲਦਾ ਹੈ। ਕੀ ਬੁੱਧ ਧਰਮ ਨੇ ਨਿਰਵਾਣ ਗੀਤਾ ਤੋਂ ਉਧਾਰਾ ਸ਼ਬਦ ਲਿਆ ਹੈ? ਅਜਿਹਾ ਕਹਿਣਾ ਇਤਿਹਾਸ ਨਾਲ ਮਜ਼ਾਕ ਹੋਵੇਗਾ। ਇਸੇ ਤਰ੍ਹਾਂ ਸਿੱਖ ਧਰਮ ਨੇ ਵੀ ਕੋਈ ਸ਼ਬਦ ਕਿਸੇ ਧਰਮ ਤੋਂ ਉਧਾਰਾ ਨਹੀਂ ਲਿਆ। ਇਹ ਸ਼ਬਦ ਕਲਚਰ ਤੇ ਸਮਾਜ ਵਿੱਚ ਪਏ ਹੁੰਦੇ ਹਨ। ਜੇ ਨਵੇਂ ਸ਼ਬਦ ਘੜੇ ਜਾਣ, ਤਾਂ ਲੋਕਾਂ ਨੂੰ ਸਮਝ ਨਹੀਂ ਪੈਂਦੀ। ਇਸੇ ਲਈ ਕਿਸੇ ਨਵੇਂ ਧਰਮ ਵੱਲੋਂ ਉਨ੍ਹਾਂ ਸ਼ਬਦਾਂ ਦੀ ਜ਼ਿਆਦਾ ਚੋਣ ਕੀਤੀ ਜਾਂਦੀ ਹੈ, ਜੋ ਕਲਚਰ ਨਾਲ ਜੁੜੇ ਹੋਣ ਜਾਂ ਜਿਸ ‘ਸ਼ਬਦ’ ਨੂੰ ਲੋਕ ਪ੍ਰਵਾਨਗੀ ਹਾਸਲ ਹੋਵੇ, ਪਰ ਅੱਗੋਂ ਧਰਮ ‘ਤੇ ਨਿਰਭਰ ਕਰਦਾ ਹੈ ਕਿ ਉਸ ਦਾ ਸੰਕਲਪ ਲੋਕ ਹਿੱਤ, ਸਰਬੱਤ ਦੀ ਅਜ਼ਾਦੀ ਵਿੱਚ ਹੈ ਜਾਂ ਜਾਤੀਵਾਦ ਨਾਲ ਜੁੜਿਆ ਹੈ।

ਬੀਬੀ ਅਹੀਰ ਨੂੰ ਅਸੀਂ ਯਾਦ ਕਰਵਾਉਣਾ ਚਾਹੁੰਦੇ ਹਨ ਕਿ ਮਹਾਤਮਾ ਬੁੱਧ ਦੇ ਦਿਹਾਂਤ ਤੋਂ ਬਾਅਦ ਇਹ ਮਤ ਤੋਂ ਸੰਪਰਦਾਵਾਂ ਹੀਨਯਾਨ ਅਤੇ ਮਹਾਯਾਨ ਵਿੱਚ ਵੰਡਿਆ ਗਿਆ। ਮਹਾਯਾਨੀਆ ਨੇ ਬੁੱਧ ਦੀ ਮੂਰਤੀ ਬਣਾ ਕੇ ਪੂਜਾ ਸ਼ੁਰੂ ਕਰ ਦਿੱਤੀ ਅਤੇ ਕਈ ਪੂਜਾ ਵਿਧੀਆਂ ਨੇ ਇਸ ਮੱਤ ਨੂੰ ਫੇਰ ਗੁੰਝਲਦਾਰ ਬਣਾ ਦਿੱਤਾ। ਮਹਾਯਾਨੀ ਦੇਵੀ-ਦੇਵਤਿਆਂ ਦੀ ਪੂਜਾ ਵਿੱਚ ਵੀ ਨਿਸ਼ਚਾ ਰੱਖਣ ਲੱਗ ਪਏ। ਇਨ੍ਹਾਂ ਪਾਲੀ ਦੀ ਥਾਂ ਭਾਸ਼ਾ ਸੰਸਕ੍ਰਿਤ ਵਰਤਣੀ ਸ਼ੁਰੂ ਕਰ ਦਿੱਤੀ। ਇਨ੍ਹਾਂ ਨੇ ਬੁੱਧ ਨੂੰ ਵਿਸ਼ਨੂੰ ਦਾ ਅਵਤਾਰ ਘੋਸ਼ਿਤ ਕਰ ਦਿੱਤਾ। ਇਸ ਨਾਲ ਬੁੱਧ ਧਰਮ ਨੂੰ ਧੱਕਾ ਲੱਗਾ ਤੇ ਅਨੇਕਾਂ ਬੋਧੀ ਹਿੰਦੂ ਧਰਮ ‘ਚ ਸ਼ਾਮਲ ਹੋ ਗਏ, ਜਦ ਕਿ ਹੀਨਯਾਨ ਬੁੱਧ ਦੀ ਮੂਰਤੀ ਦੀ ਥਾਂ ਬੁੱਧ ਦੇ ਸ਼ਬਦ ‘ਚ ਵਿਸ਼ਵਾਸ ਰੱਖਦੇ ਸਨ ਤੇ ਉਨ੍ਹਾਂ ਨੇ ਬੁੱਧ ਦੇ ਸ਼ਬਦ ਨੂੰ ਹੀ ਗੁਰੂ ਕਰਕੇ ਮੰਨਿਆ।

ਬਾਬਾ ਸਾਹਿਬ ਅੰਬੇਡਕਰ ਨੇ ਹੀਨਯਾਨ ਸੰਪਰਦਾ ‘ਚ ਸੁਧਾਰ ਕਰਕੇ ਨਵ ਬੁੱਧ ਧਰਮ ਦੀ ਲਹਿਰ ਚਲਾਈ, ਪਰ ਅੱਜ ਬਾਬਾ ਸਾਹਿਬ ਦੇ ਬੁੱਤਾਂ ਦੀ ਪੂਜਾ ਹੋ ਰਹੀ ਹੈ, ਤੇ ਉਨ੍ਹਾਂ ਦੇ ਸਿਧਾਂਤ ਨੂੰ ਮੰਨਿਆ ਨਹੀਂ ਜਾ ਰਿਹਾ। ਇਹ ਬੁੱਧ ਧਰਮ ਤੇ ਸਿੱਖ ਧਰਮ ਦਾ ਦੁਖਾਂਤ ਹੈ ਕਿ ਉਨ੍ਹਾਂ ਦੇ ਅਨੁਯਾਈ ਇਕ ਵਾਰ ਫਿਰ ਬ੍ਰਾਹਮਣਵਾਦ ਦੇ ਖਾਰੇ ਸਮੁੰਦਰ ‘ਚ ਡੁੱਬਦੇ ਜਾ ਰਹੇ ਹਨ। ਦੋਹਾਂ ਧਰਮਾਂ ਦੇ ਅਨੁਯਾਈਆਂ ਨੂੰ ਮਿਲ ਕੇ ਚੰਗੇ ਸਮਾਜ ਦੀ ਸਿਰਜਣਾ ਦੇ ਲਈ ਲਹਿਰ ਚਲਾਉਣੀ ਚਾਹੀਦੀ ਹੈ ਅਤੇ ਬੁੱਧ ਤੇ ਗੁਰਬਾਣੀ ਦੇ ਰਹਿਬਰਾਂ ਦੇ ਸੰਦੇਸ਼ ਨੂੰ ਸਮਾਜ ‘ਤੇ ਅਮਲੀ ਰੂਪ ‘ਚ ਲਾਗੂ ਕਰਨਾ ਚਾਹੀਦਾ ਹੈ। ਗੁਰਬਾਣੀ ਦੇ ਗਿਆਨ ਸੰਦੇਸ਼ ਤੇ ਬਾਬਾ ਸਾਹਿਬ ਵਿਦਿਆ ਨਾਲ ਜੁੜਨ ਦੇ ਸੁਨੇਹੇ ਨੂੰ ਸਮਾਜ ਨਾਲ ਜੋੜਨਾ ਚਾਹੀਦਾ ਹੈ, ਤਾਂ ਜੋ ਬਿਪਰਨਵਾਦ ਦੇ ਖਾਰੇ ਸਮੁੰਦਰ ਵਿੱਚੋਂ ਨਿਕਲਿਆ ਜਾ ਸਕੇ।

ਇਸ ਦੇ ਬਾਵਜੂਦ ਮੈਂ ਬੀਬੀ ਅਹੀਰ ਦਾ ਧੰਨਵਾਦੀ ਹਾਂ, ਜੋ ਜਾਤ-ਪਾਤ ਰਹਿਤ ਸਮਾਜ ਸਿਰਜਣ ਦੀ ਗੱਲ ਕਰ ਰਹੇ ਹਨ ਤੇ ਆਪਣੇ ਭਾਈਚਾਰੇ ‘ਚ ਬਾਬਾ ਸਾਹਿਬ ਅੰਬੇਡਕਰ, ਸਿੱਖ ਧਰਮ, ਬੁੱਧ ਧਰਮ ਦੀਆਂ ਮਨੁੱਖੀ ਪੱਖੀ ਰਵਾਇਤਾਂ ਦਾ ਸੁਨੇਹਾ ਪਹੁੰਚਾ ਰਹੇ ਹਨ, ਪਰ ਅਸੀਂ ਉਨ੍ਹਾਂ ਨੂੰ ਇਹ ਬੇਨਤੀ ਜ਼ਰੂਰ ਕਰਾਂਗੇ ਕਿ ਉਹ ਸਿੱਖ ਧਰਮ ਬਾਰੇ ਇਹੋ ਜਿਹੇ ਸ਼ਬਦਾਂ ਦੀ ਵਰਤੋਂ ਨਾਲ ਕਰਨ, ਜਿਸ ਨਾਲ ਸਿੱਖ ਧਰਮ ਦੀਆਂ ਭਾਵਨਾਵਾਂ ਜ਼ਖ਼ਮੀ ਹੁੰਦੀਆਂ ਹੋਣ। ਲੋੜ ਇਸ ਗੱਲ ਦੀ ਹੈ ਕਿ ਅਸੀਂ ਰੱਲ ਕੇ ਚੱਲੀਏ, ਰੱਲ ਕੇ ਕਾਫ਼ਲਾ ਬਣਾਈਏ ਤੇ ਚੰਗੇ ਸਮਾਜ ਦੀ ਸਿਰਜਨਾ ਕਰੀਏ, ਜਿੱਥੇ ਬੁੱਧ, ਗੁਰਬਾਣੀ ਦੇ ਰਹਿਬਰ ਤੇ 20ਵੀਂ ਸਦੀ ‘ਚ ਬਾਬਾ ਸਾਹਿਬ ਅੰਬੇਡਕਰ ਖੜੇ ਸਨ, ਉੱਥੇ ਅੱਜ ਅਸੀਂ ਖੜੀਏ ਤੇ ਫਤਹਿ ਦਾ ਡੰਕਾ ਵਜਾਈਏ।

ਧੰਨਵਾਦ ਸਾਹਿਤ 2274 ਪੰਜਾਬ ਟਾਈਮਜ਼ ਯੂ. ਕੇ.30.07.09 ਪੰਨਾ 36 'ਚੋਂ

ਸਿੱਖ ਕੌਮ ਪ੍ਰਤੀ ਨਫਰਤ ਭਰੇ ਬੋਲ ਬੋਲਣ ਵਾਲੀ ਪ੍ਰਚਾਰਕਾ ਕਮਲੇਸ਼ ਅਹੀਰ ਨੇ ਮਾਫੀ ਮੰਗੀ - ਜੱਥੇਦਾਰ ਮੱਕੜ
ਪਾਇਲ, 22 ਅਗਸਤ (ਗੁਲਜ਼ਾਰ ਕਾਲੀਆਂ):- ਪਿਛਲੇ ਦਿਨੀਂ ਇਟਲੀ ਵਿਖੇ ਸਿੱਖ ਕੌਮ ਦੇ ਵਿਰੁੱਧ ਨਫ਼ਰਤ ਭਰੇ ਬੋਲ ਬੋਲਣ ਵਾਲੀ ਕਮਲੇਸ਼ ਅਹੀਰ ਨਾਂ ਦੀ ਪ੍ਰਚਾਰਕਾ ਨੇ ਸਿੱਖ ਕੌਮ ਪ੍ਰਤੀ ਬੋਲਣ ਤੇ ਮਾਫੀ ਮੰਗ ਲਈ ਹੈ ਇਨਾਂ ਗੱਲਾਂ ਦਾ ਪ੍ਰਗਟਾਵਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਜੱਥੇਦਾਰ ਅਵਤਾਰ ਸਿੰਘ ਮੱਕੜ ਨੇ ਪਿੰਡ ਪੰਧੇਰ ਖੇੜੀ ਵਿਖੇ ਗੁਰਦੁਆਰਾ ਸਾਹਿਬ ਦੀ ਬਿਲਡਿੰਗ ਦਾ ਨੀਂਹ ਪੱਥਰ ਰੱਖਣ ਉਪਰੰਤ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਕਹੇ । ਜੱਥੇਦਾਰ ਮੱਕੜ ਨੇ ਅੱਗੇ ਕਿਹਾ ਕਿ ਸਿੱਖ ਕੌਮ ਦੀ ਆਪਣੀ ਹੋਂਦ ਹੈ ਤੇ ਇਹ ਅਜ਼ਾਦ ਧਰਮ ਹੈ ਕਿਸੇ ਵਿਚੋ ਆਉਣ ਜਾ ਨਾਆਉਣ ਦਾ ਸਵਾਲ ਹੀ ਨਹੀਂ ਪੈਦਾ ਹੁੰਦਾ । ਉਨ੍ਹਾਂ ਨੇ ਅੱਗੇ ਕਿਹਾ ਕਿ ਕਮਲੇਸ਼ ਅਹੀਰ ਨੇ ਇਸ ਗੱਲ ਤੇ ਮਾਫੀ ਵੀ ਮੰਗੀ ਹੈ । ਇਸ ਮੌਕੇ ਸ:ਰਘਵੀਰ ਸਿੰਘ ਸਹਾਰਨਮਾਜਰਾ ਮੈਂਬਰ ਐਸ.ਜੀ.ਪੀ.ਸੀ,ਸਰਪੰਚ ਗੁਰਜੀਤ ਸਿੰਘ ਪੰਧੇਰ ਖੇੜੀ , ਸਰਪੰਚ ਪ੍ਰਿਤਪਾਲ ਸਿੰਘ ਝੱਮਟ, ਸਰਪੰਚ ਗੁਰਜੀਤ ਸਿੰਘ ਲਹਿਰਾ ਆਦਿ ਵਿਸ਼ੇਸ਼ ਤੋਰ ਤੇ ਹਾਜ਼ਰ ਸਨ ।

'ਮਾਫ਼ੀ ਮੰਗੀ' ਖ਼ਬਰ ਲਾਉਣ ਦਾ ਧੰਨਵਾਦ। 'ਮਾਫ਼ੀ ਸਵੀਕਾਰ ਕਰ ਲਈ ਗਈ' ਦੀ ਖ਼ਬਰ ਕਦੋਂ ਲੱਗ ਰਹੀ ਹੈ? ਅਗਲੀ ਬਾਰ ਮੱਕੜ ਮਿਲੇ ਤਾਂ ਜ਼ਰੂਰ ਪੁੱਛਣਾ! - ਜਾਗਰੂਕ ਜੱਟ

ਬੀਬੀ ਅਹੀਰ ਦੀ ਮੁਆਫੀ ਮੰਗਣ 'ਤੇ ਪੰਥਕ ਜਥੇਬੰਦੀਆਂ ਵੱਲੋਂ ਤਸੱਲੀ
ਸਿੱਖ ਸੇਵਕ ਸੁਸਾਇਟੀ ਤੇ ਸਿੱਖ ਯੂਥ ਕੌਂਸਲ ਨੇ ਸਾਂਝੇ ਤੌਰ 'ਤੇ ਬੁਲਾਈ ਮੀਟਿੰਗ,
ਅਨੇਕਾਂ ਪੰਥਕ ਜਥੇਬੰਦੀਆਂ ਸ਼ਾਮਲ ਹੋਈਆਂ

ਜਲੰਧਰ-ਵਿਆਨਾ ਵਿਖੇ ਡੇਰਾ ਬੱਲਾਂ ਦੇ ਸੰਤਾਂ 'ਤੇ ਹੋਏ ਕਾਤਲਾਨਾ ਹਮਲੇ ਤੋਂ ਬਾਅਦ ਦਲਿਤਾਂ ਤੇ ਸਿੱਖਾਂ 'ਚ ਸਾਂਝ ਪੈਦਾ ਕਰਨ ਲਈ ਬੀਤੇ ਦਿਨੀਂ ਗੁਰਦੁਆਰਾ ਗੁਰੂ ਨਾਨਕ ਮਿਸ਼ਨ ਹਸਪਤਾਲ ਜਲੰਧਰ ਵਿਚ ਵੱਖ-ਵੱਖ ਸਿੱਖ ਜਥੇਬੰਦੀਆਂ ਤੇ ਪੰਥ ਦਰਦੀਆਂ ਦੀ ਮੀਟਿੰਗ ਹੋਈ। ਇਹ ਮੀਟਿੰਗ ਸਿੱਖ ਯੂਥ ਕੌਂਸਲ ਦੇ ਸਰਪ੍ਰਸਤ ਤਜਿੰਦਰ ਸਿੰਘ ਪ੍ਰਦੇਸੀ ਤੇ ਸਿੱਖ ਸੇਵਕ ਸੁਸਾਇਟੀ ਇੰਟਰਨੈਸ਼ਨਲ ਦੇ ਸੂਬਾ ਪ੍ਰਧਾਨ ਜਥੇਦਾਰ ਪਰਮਿੰਦਰਪਾਲ ਸਿੰਘ ਖ਼ਾਲਸਾ ਨੇ ਬੁਲਾਈ। ਮੀਟਿੰਗ ਵਿਚ ਬੁਲਾਰਿਆਂ ਨੇ ਇਸ ਗੱਲ 'ਤੇ ਜ਼ੋਰ ਦਿੱਤਾ ਕਿ ਦਲਿਤ ਸਿੱਖ ਭਾਈਚਾਰੇ 'ਚ ਏਕਤਾ ਹੋਣੀ ਚਾਹੀਦੀ ਹੈ ਤੇ ਜਦੋਂ ਕੋਈ ਭੀੜ ਪਵੇ ਜਾਂ ਸੰਕਟ ਦੀ ਘੜੀ ਆਵੇ, ਸਾਰੇ ਇਕ ਪਲੇਟ ਫਾਰਮ 'ਤੇ ਇਕੱਠੇ ਹੋਣ। ਇਹ ਦੋਸ਼ ਲਗਾਇਆ ਕਿ ਪੰਜਾਬ ਵਿਚ ਧਰਮ ਦੇ ਨਾਂਅ 'ਤੇ ਦਲਿਤਾਂ ਤੇ ਸਿੱਖਾਂ ਨੂੰ ਲੜਾਉਣ ਤੇ ਵੰਡੀਆਂ ਪਾਉਣ ਦੇ ਪਿੱਛੇ ਕੁਝ ਬ੍ਰਾਹਮਣਵਾਦੀ ਤਾਕਤਾਂ ਕੰਮ ਕਰ ਰਹੀਆਂ ਹਨ।

ਉੱਘੇ ਚਿੰਤਕ ਪ੍ਰੋ. ਬਲਵਿੰਦਰਪਾਲ ਸਿੰਘ ਨੇ ਵਿੱਦਿਅਕ ਜਾਗ੍ਰਿਤੀ ਤੇ ਗਿਆਨ ਦੀ ਲਹਿਰ ਚਲਾਉਣ 'ਤੇ ਜ਼ੋਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਪੰਜਾਬ ਦਾ ਯੂਥ ਨਸ਼ਿਆਂ ਅਤੇ ਠੱਗ ਟਰੈਵਲ ਏਜੰਟਾਂ ਦੇ ਜੰਜਾਲ 'ਚ ਫਸ ਕੇ ਆਪਣੀਆਂ ਜਾਨਾਂ ਨਾਲ ਖੇਲ ਰਿਹਾ ਹੈ। ਜਦ ਰੁਜ਼ਗਾਰ ਹੀ ਨਹੀਂ ਮਿਲ ਰਿਹਾ, ਵਿੱਦਿਅਕ ਸਹੂਲਤਾਂ ਹੀ ਨਹੀਂ ਤਾਂ ਇਹੋ ਜਿਹਾ ਵਾਤਾਵਰਣ ਪੱਸਰਨਾ ਯਕੀਨੀ ਹੈ। ਉਨ੍ਹਾਂ ਕਿਹਾ ਕਿ ਸ਼੍ਰੋਮਣੀ ਕਮੇਟੀ ਨੂੰ ਇਸ ਮਾਮਲੇ 'ਤੇ ਪਹਿਲਕਦਮੀ ਕਰਨੀ ਚਾਹੀਦੀ ਹੈ। ਸਾਨੂੰ ਸਭ ਪੰਥਕ ਜਥੇਬੰਦੀਆਂ ਨੂੰ ਮਿਲ ਕੇ ਵਿੱਦਿਅਕ ਜਾਗ੍ਰਿਤੀ ਦਾ ਏਜੰਡਾ ਤੈਅ ਕਰਕੇ ਸ਼੍ਰੋਮਣੀ ਕਮੇਟੀ ਕੋਲ ਜਾਣਾ ਚਾਹੀਦਾ ਹੈ ਤੇ ਇਸ ਗੱਲ 'ਤੇ ਜ਼ੋਰ ਦੇਣਾ ਚਾਹੀਦਾ ਹੈ ਕਿ ਸ਼੍ਰੋਮਣੀ ਕਮੇਟੀ ਆਈ ਆਈ ਟੀ, ਆਈ ਏ ਐਸ, ਆਈ ਪੀ ਐਸ, ਪੀ ਸੀ ਐਸ ਅਤੇ ਅਫ਼ਸਰ ਕੈਡਰ ਦੀਆਂ ਪੋਸਟਾਂ ਦੇ ਮੁਕਾਬਲੇ ਦੀ ਤਿਆਰੀ ਲਈ ਅਕੈਡਮੀ ਖੋਲ੍ਹੇ ਤਾਂ ਜੋ ਸਿੱਖ ਪੰਥ ਨੂੰ ਪਰਨਾਏ ਅਫ਼ਸਰ ਪੈਦਾ ਕੀਤੇ ਜਾ ਸਕਣ, ਜਿਸ ਨਾਲ ਸਿੱਖੀ ਦਾ ਪ੍ਰਚਾਰ ਆਪਣੇ ਆਪ ਹੋ ਜਾਵੇ।

ਕਮਲੇਸ਼ ਅਹੀਰ ਵੱਲੋਂ ਪੰਥ ਵਿਰੁੱਧ ਵਿਵਾਦ ਪੈਦਾ ਕਰਨ 'ਤੇ ਉਨ੍ਹਾਂ ਦੱਸਿਆ ਕਿ ਦੋ ਹਫਤੇ ਪਹਿਲਾਂ ਇਸ ਬਾਰੇ ਉਨ੍ਹਾਂ ਨੇ ਇਸ ਦੇ ਪ੍ਰਤੀਕਰਮ ਵੱਜੋਂ ਜੁਆਬ ਦਿੱਤਾ ਗਿਆ ਸੀ। ਹੁਣ ਉਨ੍ਹਾਂ ਨੇ ਮੁਆਫ਼ੀ ਵੀ ਮੰਗ ਲਈ ਹੈ। ਇਸ ਲਈ ਇਹ ਮੁੱਦਾ ਹੁਣ ਨਾ ਛੇੜਿਆ ਜਾਵੇ। ਉਨ੍ਹਾਂ ਕਿਹਾ ਕਿ ਅਸੀਂ ਦਲਿਤਾਂ ਤੇ ਬੋਧੀ ਭਾਈਚਾਰੇ ਨੂੰ ਆਪਣੇ ਨੇੜੇ ਲਿਆਉਣਾ ਨਾ ਕਿ ਨਾ ਕਿ ਦੂਰ ਕਰਨਾ ਹੈ। ਜੇਕਰ ਅਸੀਂ ਉਸ ਦੇ ਮੁਆਫ਼ੀ ਮੰਗਣ ਤੋਂ ਬਾਅਦ ਜਲੂਸ ਜਲਸੇ ਕੱਢ ਕੇ ਆਪਣੀ ਹਊਮੈਂ ਦਾ ਪ੍ਰਗਟਾ ਕਰਾਂਗੇ ਤਾਂ ਇਹ ਗੁਰਮਤਿ ਵਿਰੋਧੀ ਗੱਲ ਹੋਵੇਗੀ, ਕਿਉਂਕਿ ਗੁਰਬਾਣੀ ਅਨੁਸਾਰ ਮਨੁੱਖ ਭੁੱਲਣਹਾਰ ਤੇ ਅਭੁੱਲ ਕਰਤਾਰ ਹੈ। ਉਨ੍ਹਾਂ ਕਿਹਾ ਮੁੱਖ ਮੰਤਰੀ ਪੰਜਾਬ ਸ. ਪ੍ਰਕਾਸ਼ ਸਿੰਘ ਬਾਦਲ ਆਪ ਗੁਰੂ ਗ੍ਰੰਥ ਸਾਹਿਬ ਦੀ ਹਜ਼ੂਰੀ 'ਚ ਬਰਾਬਰ ਕੁਰਸੀ ਡਾਹ ਕੇ ਬੈਠੇ ਰਹੇ, ਉਸ ਬਾਰੇ ਸਿੱਖ ਜਥੇਬੰਦੀਆਂ ਚੁੱਪ ਕਿਉਂ ਹਨ। ਜਦ ਬੀਬੀ ਅਹੀਰ ਨੇ ਮੁਆਫ਼ੀ ਮੰਗ ਲਈ ਤਾਂ ਅਸੀਂ ਬੇਵਜ੍ਹਾ ਇਹ ਮਸਲਾ ਕਿਉਂ ਉਲਝਾ ਰਹੇ ਹਾਂ? ਸਿੱਖ ਪੰਥਕ ਜਥੇਬੰਦੀਆਂ ਨੇ ਵੀ ਬੀਬੀ ਅਹੀਰ ਦੀ ਮੁਆਫ਼ੀ ਲਈ ਤਸੱਲੀ ਪ੍ਰਗਟਾਈ।

ਮੋਹਨ ਸਿੰਘ ਸਹਿਗਲ, ਯੂਥ ਨੇਤਾ ਸ: ਪਰਮਿੰਦਰਪਾਲ ਸਿੰਘ ਖਾਲਸਾ ਨੇ ਪ੍ਰੋ. ਬਲਵਿੰਦਰਪਾਲ ਸਿੰਘ ਦੇ ਵਿਚਾਰਾਂ ਦੀ ਪ੍ਰੋੜ੍ਹਤਾ ਕਰਦਿਆਂ ਸਿੱਖ ਵਿੱਦਿਅਕ ਏਜੰਡੇ 'ਤੇ ਜ਼ੋਰ ਦਿੱਤਾ ਅਤੇ ਪੰਥ 'ਚ ਏਕਤਾ ਉੱਕਦ ਬਲ ਦਿੱਤਾ। ਉਨ੍ਹਾਂ ਕਿਹਾ ਕਿ ਜਦੋਂ ਤੱਕ ਪੰਜਾਬ ਵਾਸੀ ਮਤਲਬੀ ਰਾਜਨੀਤਕਾਂ ਦੇ ਝਾਂਸੇ ਵਿੱਚੋਂ ਲਾਂਭੇ ਹੋ ਕੇ ਰਹਿਣਗੇ, ਤਾਂ ਪੰਜਾਬ ਵਿੱਚ ਆਪਸੀ ਭਾਈਚਾਰਕ ਸਾਂਝ ਮਜ਼ਬੂਤ ਹੋਵੇਗੀ। ਉਨ੍ਹਾਂ ਕਿਹਾ ਕਿ ਪਹਿਲਾਂ ਇਨ੍ਹਾਂ ਸਿਆਸੀ ਵਿਅਕਤੀਆਂ ਦੀ ਖ਼ਾਤਰ ਪੰਜਾਬ ਨੇ ਸੰਤਾਪ ਭੋਗਿਆ ਸੀ। ਇਸ ਮੌਕੇ ਮੋਹਨ ਸਿੰਘ, ਜਗਮੋਹਨ ਸਿੰਘ, ਸ: ਅਮਰਜੀਤ ਸਿੰਘ ਤੇ ਜਸਵਿੰਦਰ ਸਿੰਘ ਨੇ ਵੀ ਸੰਬੋਧਨ ਕੀਤਾ। ਰਣਜੀਤ ਸਿੰਘ ਗੋਲਡੀ, ਮਹਿੰਦਰ ਸਿੰਘ ਚਮਕ, ਮੋਹਨ ਸਿੰਘ ਨਿੱਧੜਕ, ਹਰਪ੍ਰੀਤ ਸਿੰਘ, ਰਮਿੰਦਰਪਾਲ ਸਿੰਘ ਤੇ ਚਰਨਪ੍ਰੀਤ ਸਿੰਘ ਵੀ ਹਾਜ਼ਰ ਸਨ। ਸਟੇਜ ਸਕੱਤਰ ਦੀ ਸੇਵਾ ਦਿਲਬਾਗ ਸਿੰਘ ਨੇ ਕੀਤੀ। ਪੰਜਾਬ ਵਾਸੀਆਂ ਨੂੰ ਅਪੀਲ ਕੀਤੀ ਗਈ ਕਿ ਉਹ ਆਪਸੀ ਭਾਈਚਾਰਾ ਬਣਾਈ ਰੱਖਣ ਅਤੇ ਧਰਮ ਦੇ ਨਾਂਅ 'ਤੇ ਰਾਜਨੀਤੀ ਕਰਨ ਵਾਲਿਆਂ ਤੋਂ ਸੁਚੇਤ ਰਹਿਣ। ਦਲਿਤ ਭਾਈਚਾਰੇ ਨੂੰ ਅਪੀਲ ਕੀਤੀ ਗਈ ਕਿ ਉਹ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਵਿਚੋਂ ਗੁਰੂ ਰਵਿਦਾਸ ਜੀ ਦੀ ਬਾਣੀ ਵੱਖਰੀ ਕਰਨ ਦੀ ਭੁੱਲ ਨਾ ਕਰਨ, ਕਿਉਂਕਿ ਗੁਰੂ ਰਵਿਦਾਸ ਨੂੰ ਗੁਰੂਆਂ ਨਾਲੋਂ ਨਹੀਂ ਤੋੜਿਆ ਜਾ ਸਕਦਾ।

ਧੰਨਵਾਦ ਸਾਹਿਤ ਇੰਟਰਨੈਸ਼ਨਲ ਅੰਬੇਡਕਰ ਲਹਿਰ, 22 ਅਗਸਤ 2009 ਪੰਨਾ 8 ‘ਚੋ

ਕਮਲ ਅਹੀਰ ਦੇ ਮਾਮਲੇ ‘ਤੇ ਅਕਾਲ ਤਖ਼ਤ ਦੇ ਜੱਥੇਦਾਰ ਨੂੰ ਮਿਲਾਂਗੇ - ਖਾਲਸਾ
ਜਲੰਧਰ - ਸਿੱਖ ਸੇਵਕ ਸੁਸਾਇਟੀ ਇੰਟਰਨੈਸ਼ਨਲ ਨੇ ਕਿਹਾ ਹੈ ਕਿ ਬੀਬੀ ਕਮਲੇਸ਼ ਅਹੀਰ ਵੱਲੋਂ ਦਿੱਤੇ ਉਨ੍ਹਾਂ ਦੇ ਇੰਟਰਨੈਟ ‘ਤੇ ਚੱਲ ਰਹੇ ਭਾਸ਼ਣਾਂ ਬਾਰੇ ਬੀਬੀ ਕਮਲੇਸ਼ ਅਹੀਰ ਨੇ ਮੁਆਫ਼ੀ ਮੰਗ ਲਈ ਹੋਈ ਹੈ ਇਸ ਲਈ ਸਿੱਖਾਂ ਨੂੰ ਸਿੱਖਾਂ ਅਤੇ ਦਲਿਤਾਂ ਵਿਚ ਪਾੜਾ ਪਾਉਣ ਵਾਲੀਆਂ ਏਜੰਸੀਆਂ ਅਤੇ ਅਨਸਰਾਂ ਤੋਂ ਸੁਚੇਤ ਹੋਣ ਦੀ ਲੋੜ ਹੈ। ਅੱਜ ਇੱਥੇ ਇਕ ਪੱਤਰਕਾਰ ਸੰਮੇਲਨ ਨੂੰ ਸੰਬੋਧਨ ਕਰਦਿਆਂ ਸੁਸਾਇਟੀ ਦੀ ਪੰਜਾਬ ਇਕਾਈ ਦੇ ਪ੍ਰਧਾਨ ਜ: ਪਰਮਿੰਦਰ ਪਾਲ ਸਿੰਘ ਖਾਲਸਾ, ਸੀ: ਮੀਤ ਪ੍ਰਧਾਨ ਸ: ਸੁਰਿੰਦਰ ਪਾਲ ਸਿੰਘ ਗੋਲਡੀ, ਸਕੱਤਰ ਜਨਰਲ ਪ੍ਰੋ: ਬਲਵਿੰਦਰ ਪਾਲ ਸਿੰਘ, ਕਮਲਚਰਨਜੀਤ ਸਿੰਘ ਹੈਪੀ, ਰਣਜੀਤ ਸਿੰਘ ਗੋਲਡੀ ਅਤੇ ਸ: ਜੋਗਿੰਦਰ ਸਿੰਘ ਗੁਲਾਟੀ ਆਦਿ ਨੇ ਕਿਹਾ ਕਿ ਬੀਬੀ ਕਮਲੇਸ਼ ਆਹੀਰ ਵੱਲੋਂ ਆਪਣੇ ਭਾਸ਼ਣ ਵਿਚ ਕ੍ਰਿਪਾਨ ਅਤੇ ਸਿੱਖ ਇਤਿਹਾਸ ਵਿਰੁੱਧ ਕੀਤੀਆਂ ਗੱਲਾਂ ਬਾਰੇ ਉਨਾਂ ਵੱਲੋਂ ਮੰਗੀ ਮੁਆਫ਼ੀ ਅਤੇ ਦਿੱਤੇ ਸਪੱਸ਼ਟੀਕਰਨ ਨੂੰ ਉਨ੍ਹਾਂ ਦੀ ਸੁਸਾਇਟੀ ਵੱਲੋਂ ਅਕਾਲ ਤਖ਼ਤ ਸਾਹਿਬ ਦੇ ਜੱਥੇਦਾਰ ਨੂੰ ਸੌਂਪਿਆ ਜਾ ਰਿਹਾ ਹੈ।

ਸ: ਖਾਲਸਾ ਨੇ ਕਿਹਾ ਕਿ ਫ਼ਗਵਾੜਾ ਵਿਚ ਇਸ ਮੁੱਦੇ ‘ਤੇ ਬੰਦ ਕਰਨ ਤੇ ਕੁਝ ਜਥੇਬੰਦੀਆਂ ਵੱਲੋਂ ਇਸ ਵਿਰੁੱਧ ਮੰਗ ਪੱਤਰ ਦੇਣ ਲੱਗਿਆਂ ਸ਼ਿਵ ਸੈਨਾ ਆਗੂਆਂ ਨੂੰ ਨਾਲ ਲਿਜਾਣ ਬਾਰੇ ਮੁੜ ਸੋਚਣ ਦੀ ਲੋੜ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਵਿਚ ਅਮਨ ਸ਼ਾਂਤੀ ਬਣਾਈ ਰੱਖਣ ਲਈ ਇਹ ਜ਼ਰੂਰੀ ਹੈ। ਮੀਟਿੰਗ ਵਿਚ ਸ: ਸਿਮਰਜੋਤ ਸਿੰਘ ਸ਼ੈਰੀ, ਸ: ਸੰਦੀਪ ਸਿੰਘ ਚਾਵਲਾ, ਸ: ਅਰਵਿੰਦਰਜੀਤ ਸ਼ਿ ਚੱਢਾ, ਸ: ਸਿਮਰਜੀਤ ਸਿੰਘ ਡਬਲ ਏ, ਸ: ਗਗਨਦੀਪ ਸਿੰਘ ਚੌਧਰੀ, ਸ: ਸਰਬਜੋਤ ਸਿੰਘ ਸਹਿਗਲ, ਸ: ਸੁਰਿੰਦਰ ਪਾਲ ਸਿੰਘ, ਸ: ਪ੍ਰਿਤਪਾਲ ਸਿੰਘ, ਸ: ਸੁਰਜੀਤ ਸਿੰਘ ਬਤਰਾ, ਸ: ਪ੍ਰੀਤ ਕਮਲ ਸਿਘ, ਡਾ: ਗੁਰਚਰਨ ਸਿੰਘ ਭੰਵਰਾ, ਸ: ਬਲਵਿੰਦਰ ਸਿੰਘ ਰਾਜੂ, ਸ: ਅੰਮ੍ਰਿਤਪਾਲ ਸਿੰਘ, ਸ: ਸੁਰਿੰਦਰ ਸਿੰਘ ਅਤੇ ਸ: ਰਜਿੰਦਰ ਸਿੰਘ ਆਦਿ ਹਾਜ਼ਰ ਸਨ।

ਪੰਜਾਬੀ ਇੰਟਰਨੈੱਟ ਅਖ਼ਬਾਰ ਵਿਚੋਂ

ਅੰਬੇਡਕਰੀ ਸੰਸਥਾਵਾਂ ਵੱਲੋਂ ਭੈਣ ਅਹੀਰ ਦਾ ਸਦਾ ਸਾਥ ਦੇਣ ਦਾ ਵਾਅਦਾ
ਨਿਊਯਾਰਕ - ਦੋ ਅਗਸਤ ਦਿਨ ਐਤਵਾਰ ਨੂੰ ਵੱਖਰੀਆਂ-ਵੱਖਰੀਆਂ ਅੰਬੇਡਕਰੀ ਸੰਸਥਾਵਾਂ ਦੀ ਇੱਕ ਸਾਂਝੀ ਮੀਟਿੰਗ ਕੀਤੀ ਗਈ, ਜਿਸ ਵਿੱਚ ਇੰਟਰਨੈਸ਼ਨਲ ਅੰਬੇਡਕਰ ਮਿਸ਼ਨ, ਇੰਟਰਨੈਸ਼ਨਲ ਬਹੁਜਨ ਆਰਗੇਨਾਈਜ਼ੇਸ਼ਨ, ਦਲਿਤੋ ਜਾਗੋ ਇੰਕ ਅਤੇ ਇੰਟਰਨੈਸ਼ਨਲ ਰਵਿਦਾਸ ਮਿਸ਼ਨ ਦੇ ਨੁਮਾਇੰਦਿਆਂ ਨੇ ਭਾਗ ਲਿਆ। ਸਭ ਤੋਂ ਪਹਿਲਾਂ ਜੋ ਭਾਣਾ ਆਸਟਰੀਆ ਦੇ ਸ਼ਹਿਰ ਵਿਆਨਾ ‘ਚ ਵਾਪਰਿਆ, ਉਸ ਉੱਤੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਗਿਆ ਅਤੇ ਇੱਕ ਮਿੰਟ ਵਾਸਤੇ ਮੌਨ ਧਾਰਿਆ ਗਿਆ। ਸਭਨਾਂ ਨੇ ਸਾਰੀਆਂ ਸੰਸਥਾਵਾਂ ਨੂੰ ਇਕੱਠੇ ਹੋਣ ਦੀ ਵਧਾਈ ਦਿੱਤੀ। ਫਿਰ ਥੋੜ੍ਹੀਆਂ ਵਿਚਾਰਾਂ ਤੋ ਬਾਅਦ ਮੀਟਿੰਗ ਦੇ ਮੁੱਖ ਏਜੰਡੇ ਉੱਤੇ ਆਇਆ ਗਿਆ।

ਸਾਰਿਆਂ ਦੀ ਮੀਟਿੰਗ ਦਾ ਮੁੱਖ ਏਜੰਡਾ ਭੈਣ ਕਮਲੇਸ਼ ਅਹੀਰ ਦੁਆਰਾ ਡੇਢ ਸਾਲ ਪਹਿਲਾਂ ਬਾਬਾ ਸਾਹਿਬ ਡਾ. ਬੀ ਆਰ ਅੰਬੇਡਕਰ ਜੀ ਦੇ ਜਨਮ ਦਿਵਸ ਉੱਕਦ ਇਟਲੀ ਵਿੱਚ ਕੀਤੀ ਹੋਈ ਸਪੀਚ ਉੱਕਦ ਸੀ। ਸਭ ਤੋਂ ਪਹਿਲੇ ਗੇੜ ਵਿੱਚ ਵੱਖਰੇ-ਵੱਖਰੇ ਥਾਵਾਂ ਤੋਂ ਆਏ ਅੰਬੇਡਕਰੀਆਂ ਨੇ ਇਸ ਗੱਲ ਉੱਤੇ ਵਿਚਾਰ ਕੀਤੀ ਕਿ ਭੈਣ ਕਮਲੇਸ਼ ਅਹੀਰ ਜੀ ਨੂੰ ਡੇਢ ਸਾਲ ਬਾਅਦ ਕਿਉਂ ਉਛਾਲਿਆ ਗਿਆ ਹੈ। ਫਿਲਾਡਲਫੀਆ ਤੋਂ ਆਏ ਇੱਕ ਅੰਬੇਡਕਰੀ ਨੇ ਦੱਸਿਆ ਕਿ ਇਹ ਇੱਕ ਸ਼ੈਤਾਨੀ ਦਿਮਾਗ਼ ਦੀ ਕਾਢ ਹੈ ਜੋ ਕਿ ਗਰੀਸ ਤੋਂ ਇੱਕ ਡੁਪਲੀਕੇਟ ਆਈ ਡੀ ਬਣਾ ਕੇ ਇੰਟਰਨੈੱਟ ਉੱਤੇ ਪਾਈ ਗਈ ਹੈ। ਉਸ ਦਾ ਪਤਾ ਵੀ ਲੱਗ ਚੁੱਕਾ ਹੈ। ਆਸ ਹੈ ਕਿ ਉਸ ਨੂੰ ਜਲਦੀ ਹੀ ਪੁਲੀਸ ਦੇ ਹਵਾਲੇ ਕਰ ਦਿੱਤਾ ਜਾਵੇਗਾ।

ਇੱਕ ਪਾਸੇ ਸੰਤ ਰਾਮਾਨੰਦ ਜੀ ਦੇ ਸ਼ਹੀਦ ਹੋਣ ਉੱਤੇ ਹਾਲੇ ਅੱਗ ਵੀ ਠੰਡੀ ਨਹੀਂ ਸੀ ਹੋਈ ਕਿ ਉਸ ਨੇ ਫਿਰ ਦੰਗੇ ਭੜਕਾਉਣ ਦੀ ਸਾਜ਼ਿਸ਼ ਰਚ ਦਿੱਤੀ। ਸਾਰਿਆਂ ਮੈਂਬਰਾਂ ਨੇ ਪਹਿਲਾਂ ਭੈਣ ਕਮਲੇਸ਼ ਦੁਆਰਾ ਕੀਤੀ ਹੋਈ ਸਪੀਚ ਨੂੰ ਧਿਆਨ ਨਾਲ ਸੁਣਿਆ ਫਿਰ ਜੋ ਉਸ ਦੇ ਵਿਰੋਧ ਵਿੱਚ ਟਿੱਪਣੀਆਂ ਕੀਤੀਆਂ ਹੋਈਆਂ ਸਨ, ਉਨ੍ਹਾਂ ਨੂੰ ਚੰਗੀ ਤਰ੍ਹਾਂ ਸੁਣਿਆ ਫਿਰ ਜੋ ਉਸ ਦੇ ਵਿਰੋਧ ਵਿੱਚ ਟਿੱਪਣੀਆਂ ਕੀਤੀਆਂ ਹੋਈਆਂ ਸਨ। ਉਨ੍ਹਾਂ ਨੂੰ ਚੰਗੀ ਤਰ੍ਹਾਂ ਸੁਣਿਆ ਤੇ ਫਿਰ ਜੋ ਟੋਰਾਂਟੋ ਤੋਂ ਰੇਡੀਓ ਉੱਤੇ ਇਸ ਵਿਸ਼ੇ ਉੱਪਰ ਹੀ ਟਾਕ ਸ਼ੋਅ ਕੀਤਾ ਗਿਆ, ਉਸ ਨੂੰ ਧਿਆਨ ਨਾਲ ਸੁਣਿਆ। ਭੈਣ ਕਮਲੇਸ਼ ਅਹੀਰ ਦੁਆਰਾ ਕੀਤੀ ਹੋਈ ਸਪੀਚ ਦਾ ਸਿੱਟਾ ਤਾਂ ਸਿਰਫ਼ ਭਾਰਤ ਅੰਦਰ ਬਰਾਬਰਤਾ ਲਿਆਉਣਾ ਅਤੇ ਗੁਰੂਆਂ ਦੁਆਰਾ ਦਿੱਤੀਆਂ ਸਿੱਖਿਆਵਾਂ ਨੂੰ ਲੋਕਾਂ ਵਿੱਚ ਪ੍ਰਚਾਰਨਾ ਹੈ। ਭਾਵੇਂ ਸਿੱਖਿਆ ਤਥਾਗਤ ਬੁੱਧ ਦੁਆਰਾ ਸਮਾਜ ਨੂੰ ਦਿੱਤੀ ਹੋਵੇ ਜਾਂ ਦਸਮ ਪਾਤਸ਼ਾਹੀ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਦੁਆਰਾ।

ਧੰਨਵਾਦ ਸਾਹਿਤ ਇੰਟਰਨੈਸ਼ਨਲ ਅੰਬੇਡਕਰ ਲਹਿਰ, 22 ਅਗਸਤ 2009 ਪੰਨਾ 9 ‘ਚੋ
... ਅੱਗੇ ਪੜ੍ਹੋ

ਕਮਲੇਸ਼ ਵਿਰੁੱਧ 5 ਰੋਸ ਪ੍ਰਦਰਸ਼ਨ, 1 ਖ਼ਬਰ ਵੀਡੀਓ ਜਵਾਬ

1) ਸਿੱਖ ਜਥੇਬੰਦੀਆਂ ਵੱਲੋਂ ਰੋਸ ਮੁਜ਼ਾਹਰਾ

ਕਮਲੇਸ਼ ਅਹੀਰ ਖਿਲਾਫ਼ ਕਾਰਵਾਈ ਕਰਨ ਦੀ ਮੰਗ

ਫਗਵਾੜਾ, 6 ਅਗਸਤ (ਹਰੀਪਾਲ ਸਿੰਘ)-ਫਗਵਾੜਾ ਦੀਆਂ ਸਿੱਖ ਜਥੇਬੰਦੀਆਂ ਨੇ ਅੱਜ ਵੈਨਕੂਵਰ ਕੈਨੇਡਾ ਵਾਸੀ ਕਮਲੇਸ਼ ਅਹੀਰ ਦੇ ਖਿਲਾਫ ਐਨ.ਐਸ.ਏ. ਤਹਿਤ ਕੇਸ ਦਰਜ ਕਰਨ ਦੀ ਮੰਗ ਨੂੰ ਲੈ ਕੇ ਸ਼ਹਿਰ ਵਿਚ ਰੋਸ ਮਾਰਚ ਕੱਢਿਆ ਅਤੇ ਐਸ.ਡੀ.ਐਮ ਫਗਵਾੜਾ ਨੂੰ ਮੰਗ ਪੱਤਰ ਦਿੱਤਾ। ਸਿੱਖ ਜਥੇਬੰਦੀਆਂ ਨੇ ਦੱਸਿਆ ਕਿ ਕੈਨੇਡਾ ਵਾਸੀ ਕਮਲੇਸ਼ ਅਹੀਰ ਨੇ ਕੁਝ ਮਹੀਨੇ ਪਹਿਲਾਂ ਇਟਲੀ ‘ਚ ਇਕ ਵਰਗ ਦੇ ਲੋਕਾਂ ਨੂੰ ਇਕੱਠਾ ਕਰਕੇ ਭਾਰਤ ਰਤਨ ਡਾ: ਬੀ ਅਰ ਅੰਬੇਡਕਰ ਦਾ ਬੈਨਰ ਲਗਾ ਕੇ ਸਿੱਖ ਧਰਮ, ਹਿੰਦੂ ਧਰਮ ਅਤੇ ਰਾਸ਼ਟਰ ਪਿਤਾ ਮਹਾਤਮਾ ਗਾਂਧੀ ਜੀ ਦੇ ਖਿਲਾਫ ਭੜਕਾਉ ਭਾਸ਼ਣ ਦਿੱਤਾ ਅਤੇ ਇਸ ਭਾਸ਼ਣ ਦੀਆਂ ਸੀ.ਡੀਜ਼ ਤਿਆਰ ਕਰਕੇ ਇਨ੍ਹਾਂ ਨੂੰ ਪੰਜਾਬ ਦੇ ਵੱਖਰੇ-ਵੱਖਰੇ ਸ਼ਹਿਰਾਂ ਵਿਚ ਕਮਲੇਸ਼ ਅਹੀਰ ਦੇ ਕਹਿਣ ‘ਤੇ ਹੀ ਕੁਝ ਸ਼ਰਾਰਤੀ ਅਨਸਰਾਂ ਵੱਲੋਂ ਧੜੱਲੇ ਨਾਲ ਵੰਡੀਆਂ ਜਾ ਰਹੀਆਂ ਹਨ।

ਉਨ੍ਹਾਂ ਕਿਹਾ ਕਿ ਉਕਤ ਭਾਸ਼ਣ ‘ਚ ਕਮਲੇਸ਼ ਅਹੀਰ ਨੇ ਸਿੱਖ ਧਰਮ, ਗੁਰੂਆਂ ਅਤੇ ਪੰਜ ਪਿਆਰਿਆਂ ਦਾ ਅਪਮਾਨ ਕੀਤਾ ਹੈ। ਉਕਤ ਭਾਸ਼ਣ ਵਿਚ ਭਗਵਾਨ ਰਾਮ ਅਤੇ ਲਛਮਣ ਬਾਰੇ ਵੀ ਅਪਮਾਨਜਨਕ ਟਿੱਪਣੀਆਂ ਕੀਤੀਆਂ ਗਈਆਂ ਅਤੇ ਭਗਵਾਨ ਰਾਮ ਦੇ ਪੁਤਲੇ ਸਾੜਨ ਬਾਰੇ ਵੀ ਕਿਹਾ ਗਿਆ। ਉਕਤ ਭੜਕਾਉ ਭਾਸ਼ਣ ਦੀ ਸੀ.ਡੀ ਦੇ ਰਾਹੀਂ ਪ੍ਰਚਾਰ ਨਾਲ ਦੇਸ਼ ਦੇ ਭਾਈਚਾਰੇ ਅਤੇ ਪੰਜਾਬ ਸੂਬੇ ਦੇ ਅਮਨ ਨੂੰ ਖਰਾਬ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।

ਇਸ ਰੋਸ ਮੁਜ਼ਾਹਰੇ ਵਿਚ ਸਿੱਖ ਵੈਲਫੇਅਰ ਕੌਂਸਲ, ਏਕਮ ਇੰਟਰਨੈਸ਼ਨਲ, ਸ੍ਰੀ ਸੁਖਮਨੀ ਸਾਹਿਬ ਸੇਵਾ ਸੁਸਾਇਟੀ, ਸ੍ਰੀ ਰਾਮ ਦਾਸ ਸੇਵਾ ਸੁਸਾਇਟੀ, ਮਿਸ਼ਨ ਏ ਖਾਲਸਾ ਆਰਗੇਨਾਈਜੇਸ਼ਨ, ਸਰਬ ਨੌਜਵਾਨ ਸਭਾ ਬਾਬਾ ਗਧੀਆ, ਬਾਬਾ ਦੀਪ ਸਿੰਘ ਸੇਵਾ ਸੁਸਾਇਟੀ ਖੇੜਾ ਰੋਡ, ਪ੍ਰਬੰਧਕ ਕਮੇਟੀ ਗੁਰਦੁਆਰਾ ਪ੍ਰੇਮ ਨਗਰ , ਅਖੰਡ ਕੀਰਤਨੀ ਜਥੇ, ਸੁਖਵਿੰਦਰ ਸਿੰਘ ਬਿੱਟੂ, ਮਨਜੀਤ ਸਿੰਘ ਖਾਲਸਾ, ਏਕਮ ਸਿੰਘ ਬਰਮੀ, ਮਨਜਿੰਦਰ ਸਿੰਘ ਖਾਲਸਾ, ਸਤਵਿੰਦਰ ਸਿੰਘ ਲੱਕੀ, ਹਰਦੀਪ ਸਿੰਘ, ਪਰਮਜੀਤ ਸਿੰਘ ਖਾਲਸਾ, ਸੁਖਦੇਵ ਸਿੰਘ, ਇਕਬਾਲ ਸਿੰਘ, ਹਰਪ੍ਰੀਤ ਸਿੰਘ, ਰਜਿੰਦਰ ਸਿੰਘ, ਮਨਜੀਤ ਸਿੰਘ ਹੈਪੀ, ਗੁਰਵਿੰਦਰ ਸਿੰਘ, ਮੋਹਣ ਸਿੰਘ, ਉਂਕਾਰ ਸਿੰਘ, ਨਰਿੰਦਰ ਸਿੰਘ, ਤਜਿੰਦਰ ਸਿੰਘ, ਜਸਵੀਰ ਸਿੰਘ, ਸੁਖਦੇਵ ਸਿੰਘ, ਗੁਰਬਚਨ ਸਿੰਘ, ਅਮਨਦੀਪ ਸਿੰਘ ਆਦਿ ਤੋਂ ਇਲਾਵਾ ਹੋਰ ਵੀ ਜਥੇਬੰਦੀਆਂ ਦੇ ਨੁਮਾਂਇੰਦੇ ਸ਼ਾਮਿਲ ਸਨ।

ਉਕਤ ਜਥੇਬੰਦੀਆਂ ਨੇ ਗੁਰਦੁਆਰਾ ਨਿੰਮਾਵਾਲਾ ਚੌਕ ਤੋਂ ਰੋਸ ਮੁਜ਼ਾਹਰਾ ਸ਼ੁਰੂ ਕੀਤਾ ਜੋ ਕੇ ਵੱਖ-ਵੱਖ ਬਾਜ਼ਾਰਾਂ ਅਤੇ ਜੀ.ਟੀ.ਰੋਡ ਤੋਂ ਹੁੰਦਾ ਹੋਇਆ ਤਹਿਸੀਲ ਕੰਪਲੈਕਸ ਪਹੁੰਚਿਆ ਜਿਥੇ ਐਸ.ਡੀ.ਐਮ ਅਮਰਜੀਤਪਾਲ ਅਤੇ ਤਹਿਸੀਲਦਾਰ ਅਮਨਪਾਲ ਸਿੰਘ ਨੂੰ ਮੰਗ ਪੱਤਰ ਦੇ ਕੇ ਕਮਲੇਸ਼ ਅਹੀਰ ਦੇ ਖਿਲਾਫ ਦੇਸ਼ ਧ੍ਰੋਹ ਦਾ ਮੁਕੱਦਮਾ ਦਰਜ ਕਰਨ ਅਤੇ ਐਨ.ਐਸ.ਏ ਅਧੀਨ ਕਾਰਵਾਈ ਕਰਕੇ ਹਿਰਾਸਤ ਵਿਚ ਲੈਣ ਦੀ ਮੰਗ ਕੀਤੀ। ਉਨ੍ਹਾਂ ਸਰਕਾਰ ਅਤੇ ਪ੍ਰਸ਼ਾਸਨ ਨੂੰ ਤਾੜਨਾ ਕੀਤੀ ਕਿ ਜੇਕਰ 16 ਅਗਸਤ ਤੱਕ ਕਮਲੇਸ਼ ਅਹੀਰ ਦੇ ਖਿਲਾਫ ਬਣਦੀ ਕਾਰਵਾਈ ਨਾ ਕੀਤੀ ਤਾਂ 17 ਅਗਸਤ ਨੂੰ ਫਗਵਾੜਾ ਬੰਦ ਕਰਵਾਇਆ ਜਾਵੇਗਾ।

ਅਜੀਤ ਖ਼ਬਰ ਵੈੱਬ ਪੰਨਾ

2) ਵੱਖ-ਵੱਖ ਜਥੇਬੰਦੀਆਂ ਦੇ ਸੱਦੇ ‘ਤੇ ਫਗਵਾੜਾ ਮੁਕੰਮਲ ਬੰਦ ਰਿਹਾ
ਐਸ. ਡੀ. ਐਮ. ਨੂੰ ਦਿੱਤਾ ਮੰਗ-ਪੱਤਰ

ਫਗਵਾੜਾ, 17 ਅਗਸਤ (ਹਰੀਪਾਲ ਸਿੰਘ)-ਕੈਨੇਡਾ ਵਾਸੀ ਕਮਲੇਸ਼ ਅਹੀਰ ਵੱਲੋਂ ਹਿੰਦੂ ਅਤੇ ਸਿੱਖ ਧਰਮ ਪ੍ਰਤੀ ਕੀਤੀਆਂ ਗਈਆਂ ਇਤਰਾਜ਼ਯੋਗ ਟਿੱਪਣੀਆਂ ਦੇ ਰੋਸ ਵਿਚ ਅੱਜ ਜਨਰਲ ਸਮਾਜ ਮੰਚ, ਸ੍ਰੀ ਸੁਖਮਨੀ ਸਾਹਿਬ ਸੇਵਾ ਸੁਸਾਇਟੀ, ਸਿੱਖ ਵੇਲਫੈਅਰ ਕੌਂਸਲ, ਸ੍ਰੀ ਗੁਰੂ ਰਾਮ ਦਾਸ ਸੇਵਾ ਸਿਮਰਨ ਸੁਸਾਇਟੀ, ਏਕਮ ਇੰਟਰਨੈਸ਼ਨਲ, ਅਖੰਡ ਕੀਰਤਨੀ ਜਥਾ, ਮਹਾਂਵੀਰ ਗੱਤਕਾ ਪਾਰਟੀ, ਨੌਜਵਾਨ ਸਭਾ ਬਾਬਾ ਗਧੀਆ, ਪਰਸੂਰਾਮ ਸੈਨਾਂ, ਸ਼ਿਵ ਸੈਨਾਂ, ਕਰਿਆਨਾ ਤੇ ਕਲਾਥ ਅਤੇ ਸਰਾਫ ਮਰਚੈਂਟਸ ਦੇ ਸੱਦੇ ‘ਤੇ ਫਗਵਾੜਾ ਮੁਕੰਮਲ ਤੌਰ ਤੇ ਸ਼ਾਂਤਮਈ ਬੰਦ ਰਿਹਾ।

ਸਮੂਹ ਜਥੇਬੰਦੀਆਂ ਦੇ ਨੁਮਾਂਇੰਦੇ ਰੋਸ ਵਜੋਂ ਗੁਰਦੁਆਰਾ ਨਿੰਮਾਂ ਵਾਲਾ ਤੋਂ ਜਾਪ ਕਰਦੇ ਹੋਏ ਨਿਕਲੇ ਅਤੇ ਸਾਰੇ ਸ਼ਹਿਰ ਵਿਚੋਂ ਹੁੰਦੇ ਹੋਏ ਐਸ. ਡੀ. ਐਮ. ਦਫਤਰ ਵਿਖੇ ਪਹੁੰਚੇ, ਜਿਥੇ ਉਨ੍ਹਾਂ ਮੁੱਖ ਮੰਤਰੀ ਪੰਜਾਬ ਦੇ ਨਾਮ ਮੰਗ ਪੱਤਰ ਦੇ ਕੇ ਮੰਗ ਕੀਤੀ ਕਿ ਹਿੰਦੂ ਅਤੇ ਸਿੱਖ ਧਰਮ ਦਾ ਅਪਮਾਨ ਕਰਨ ਵਾਲੀ ਕਮਲੇਸ਼ ਅਹੀਰ ਦੇ ਖਿਲਾਫ ਧਾਰਮਿਕ ਭਾਵਨਾਵਾਂ ਨਾਲ ਖਿਲਵਾੜ ਕਰਨ ਸਬੰਧੀ ਕੇਸ ਦਰਜ ਕੀਤਾ ਜਾਵੇ ਅਤੇ ਵਿਆਨਾ ਦੀ ਘਟਨਾ ਪਿਛੋਂ ਪੰਜਾਬ ਵਿਚ ਲੋਕਾਂ ਦਾ ਜਾਨੀ ਤੇ ਮਾਲੀ ਨੁਕਸਾਨ ਕਰਨ ਵਾਲਿਆਂ ਨੂੰ ਜਲਦ ਗ੍ਰਿਫਤਾਰ ਕੀਤਾ ਜਾਵੇ। ਅੱਜ ਦੇ ਰੋਸ ਮੁਜ਼ਾਹਰੇ ਦੌਰਾਨ ਨਾ ਤੇ ਕਿਸੇ ਦਾ ਪੁਤਲਾ ਸਾੜਿਆ ਗਿਆ ਅਤੇ ਨਾ ਹੀ ਕਿਸੇ ਤਰ੍ਹਾਂ ਨਾਲ ਟਰੈਫਿਕ ਜਾਮ ਕੀਤਾ ਗਿਆ। ਅੱਜ ਦੇ ਇਸ ਰੋਸ ਮਾਰਚ ਵਿਚ ਅਕਾਲੀ ਦਲ ਸ਼ਾਮਿਲ ਨਹੀਂ ਹੋਇਆ।

ਇਸ ਰੋਸ ਮਾਰਚ ਵਿਚ ਜਨਰਲ ਸਮਾਜ ਮੰਚ ਦੇ ਪ੍ਰਧਾਨ ਫਤਿਹ ਸਿੰਘ, ਨਿਰਮਲ ਸਿੰਘ, ਗਿਰੀਸ਼ ਸ਼ਰਮਾ, ਡਾ.ਅਸ਼ੋਕ ਸ਼ਰਮਾ, ਪ੍ਰੋ: ਪੀ. ਕੇ. ਬਾਂਸਲ, ਰਵਿੰਦਰ ਗੁਪਤਾ, ਅਰੁਣ ਵਰਮਾ,ਕੇ.ਕੇ ਮਲਹੋਤਰਾ, ਪਵਨ ਮਲਹੋਤਰਾ, ਮੇਘ ਰਾਜ, ਪ੍ਰਦੀਪ ਅਹੂਜਾ, ਸਾਬਕਾ ਕੌਂਸਲਰ ਅਤੇ ਭਾਜਪਾ ਆਗੂ ਕੁਸਮ ਸ਼ਰਮਾ, ਮਨਜੀਤ ਸਿੰਘ ਖਾਲਸਾ, ਸੁਖਵਿੰਦਰ ਸਿੰਘ ਬਿੱਟੂ, ਪਰਮਜੀਤ ਸਿੰਘ, ਏਕਮ ਸਿੰਘ, ਜਸਵੀਰ ਸਿੰਘ, ਤਜਿੰਦਰ ਸਿੰਘ ਬਬਲੂ, ਮਨਜਿੰਦਰ ਸਿੰਘ, ਮਨਜੀਤ ਸਿੰਘ, ਸੁਖਦੇਵ ਸਿੰਘ, ਗੁਰਜੀਤ ਸਿੰਘ ਵਾਲੀਆ, ਗੁਰਜੀਤ ਸਿੰਘ ਪਲਾਹਾ, ਕੌਂਸਲਰ ਰਾਜਵਿੰਦਰ ਸਿੰਘ ਕੁੱਕੂ, ਹਤਿੰਦਰ ਸਿੰਘ ਰਾਣਾ, ਅਮਿਤ ਸ਼ੁਕਲਾ, ਹਰਦੀਪ ਸਿੰਘ ਬਸਰਾ, ਬੱਲੂ ਵਾਲੀਆ, ਦੀਪਕ ਭਾਰਦਵਾਜ, ਸੰਜੀਵ ਜੋਨੀ, ਭਾਜਪਾ ਪ੍ਰਧਾਨ ਜਗਦੀਸ਼ ਵੀਰਜੀ ਸਮੇਤ ਜਨਰਲ ਸਮਾਜ ਦੇ ਅਨੇਕ ਨੁਮਾਇੰਦੇ ਸ਼ਾਮਿਲ ਸਨ। ਇਸ ਦੌਰਾਨ ਪੁਲਿਸ ਨੇ ਸਖ਼ਤ ਸੁਰੱਖਿਆ ਪ੍ਰਬੰਧ ਕੀਤੇ ਹੋਏ ਸਨ।

ਅਜੀਤ ਖ਼ਬਰ ਵੈੱਬ ਪੰਨਾ ਜਗ ਬਾਣੀ ਖ਼ਬਰ ਵੈੱਬ ਪੰਨਾ

3) ਏਕਸ ਜਥਾ ਅੰਤਰਰਾਸ਼ਟਰੀ ਦੇ ਬੁਲਾਰੇ ਮਨਜਿੰਦਰ ਸਿੰਘ ਖਾਲਸਾ ਨੇ 17 ਅਗਸਤ 09 ਨੂੰ ਫਗਵਾੜਾ ਅਦਾਲਤ ਸਾਹਮਣੇ ਭਾਸ਼ਣ ਦਿੱਤਾ।

4) ਕਮਲੇਸ਼ ਅਹੀਰ ਨੂੰ ਗ੍ਰਿਫ਼ਤਾਰ ਕੀਤਾ ਜਾਵੇ - ਸਿੱਖ ਜਥੇਬੰਦੀਆਂ
ਸਿੱਖ ਸੰਗਠਨ ਜਥੇਬੰਦੀਆਂ ਵਲੋਂ ਸ਼ਾਤੀ ਪੂਰਵਕ ਰੋਸ ਪ੍ਰਦਰਸ਼ਨ, ਐਸ.ਡੀ.ਐਮ ਨੂੰ ਸੌਪਿਆਂ ਮੰਗ ਪੱਤਰ

ਕਪੂਰਥਲਾ, 21 ਅਗਸਤ (ਰਜਨੀਸ਼ ਚੌਧਰੀ) : ਬੀਤੇ ਦਿਨ ਕੈਨੇਡਾ 'ਚ ਹੋਏ ਪ੍ਰੋਗਰਾਮ ਦੋਰਾਨ ਇੱਕ ਕੈਨੇਡਾ ਮਹਿਲਾ ਵਲੋਂ ਦਿੱਤੇ ਬਿਆਨਾਂ ਨੇ ਬਵਾਲ ਖੜਾ ਕਰ ਦਿੱਤਾ ਹੈ। ਜਿਸ ਕਰਕੇ ਹਿੰਦੂ ਅਤੇ ਸਿੱਖ ਸੰਗਠਨ ਵਿੱਚ ਕਾਫ਼ੀ ਰੋਸ਼ ਪਾਇਆ ਜਾ ਰਿਹਾ ਹੈ। ਜਿਸ ਕਰਕੇ ਕਪੂਰਥਲਾ ਦੇ ਸਿੱਖ ਸੰਗਠਨਾਂ ਨੇ ਸ਼੍ਰੀ ਸਟੇਟ ਗੁਰਦੁਆਰਾ ਸਾਹਿਬ ਤੋ ਸ਼ਾਤੀ ਪੂਰਵਕ ਮਾਰਚ ਕੱਢ ਕੇ ਮੁੱਖ ਮੰਤਰੀ ਦੇ ਨਾਮ ਤੇ ਐਸ.ਡੀ.ਐਮ ਤਨੂ ਕਸ਼ਅਪ ਨੂੰ ਮੰਗ ਪੱਤਰ ਸੌੰਪਿਆ। ਇਸ ਮੰਗ ਪੱਤਰ ਦੇ ਵਿੱਚ ਅਲੱਗ-ਅਲੱਗ ਸਿੱਖ ਜਥੇਬੰਦੀਆਂ ਵਲੋਂ ਮੰਗ ਕੀਤੀ ਗਈ ਕਿ ਕੈਨੇਡਾ ਦੀ ਔਰਤ ਕਮਲੇਸ਼ ਅਹੀਰ ਨੇ ਹਿੰਦੂ ਅਤੇ ਸਿੱਖ ਧਰਮ ਦੇ ਬਾਰੇ ਅਪਸ਼ਬਦ ਕਹੇ ਗਏ ਸੀ।

ਸਮੂਹ ਜਥੇਬੰਦੀਆਂ ਨੇ ਪੰਜਾਬ ਸਰਕਾਰ ਅੱਗੇ ਬੇਨਤੀ ਕੀਤੀ ਹੈ ਕਿ ਕਮਲੇਸ਼ ਅਹੀਰ ਅਤੇ ਉਸਦੇ ਸਾਥੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਜਾਵੇ ਅਤੇ ਪੰਜਾਬ ਵਿੱਚ ਆਉਣ ਤੇ ਪਾਬੰਦੀ ਲਗਾਈ ਜਾਵੇ। ਉਕਤ ਔਰਤ ਦੇ ਖਿਲਾਫ਼ ਨੈਸ਼ਨਲ ਸਕਿਉਰਟੀ ਐਕਟ ਦੇ ਅਨੁਸਾਰ ਮੁਕਦੱਮਾ ਵੀ ਚਲਾਇਆ ਜਾਵੇ ਤਾਂ ਜੋ ਆਪਸੀ ਭਾਈਚਾਰਾ ਬਣਿਆ ਰਹੇ ਅਤੇ ਪੰਜਾਬ ਵਿੱਚ ਸੁੱਖ ਸ਼ਾਤੀ ਦਾ ਮਾਹੌਲ ਕਾਇਮ ਰਹੇ। ਉਹਨਾਂ ਨੇ ਕਿਹਾ ਕਿ ਅਗਰ ਪੰਜਾਬ ਸਰਕਾਰ ਕੋਈ ਕਦਮ ਕਮਲੇਸ਼ ਅਹੀਰ ਨੂੰ ਗ੍ਰਿਫ਼ਤਾਰ ਕਰਨ ਲਈ ਨਹੀ ਚੁੱਕਦੀ ਤਾਂ ਇਸ ਸੰਘਰਸ਼ ਨੂੰ ਹੋਰ ਤੇਜ ਕੀਤਾ ਜਾਵੇਗਾ। ਇਸ ਮੌਕੇ 'ਤੇ ਨੌਜਵਾਨ ਸਿੱਖ ਸਭਾ, ਗੁਰੂ ਨਾਨਕ ਨਿਸ਼ਕਾਮ ਕੀਰਤਨ, ਇੰਟਰਨੈਸ਼ਨਲ ਸਿੱਖ ਸਭਾ, ਸਰਵ ਨੌਜਵਾਨ ਸਭਾ (ਫਗਵਾੜਾ) ਦਸ਼ਮੇਸ਼ ਖਾਲਸਾ ਦਲ ਆਦਿ ਸੰਗਠਨ ਹਾਜਰ ਸਨ।

ਅਜੀਤ ਖ਼ਬਰ ਵੈੱਬ ਪੰਨਾ ਜਗ ਬਾਣੀ ਖ਼ਬਰ ਵੈੱਬ ਪੰਨਾ

5) ਇਤਰਾਜਯੋਗ ਧਾਰਮਿਕ ਟਿੱਪਣੀਆਂ ਖਿਲਾਫ ਸਿੱਖ ਜਥੇਬੰਦੀਆਂ ਰੋਸ ਮਾਰਚ ਕੱਢਿਆ
ਕਰਤਾਰਪੁਰ,27 ਅਗਸਤ (ਗੁਰਮਲਕੀਅਤ ਸਿੰਘ ਕਾਹਲੋਂ)

ਇੱਕ ਭਾਰਤੀ ਔਰਤ ਵਲੋਂ ਵਿਦੇਸ਼ 'ਚ ਦਿਤੇ ਗਏ ਭਾਸ਼ਣ ਦੌਰਾਨ ਕਥਿੱਤ ਤੌਰ ਤੇ ਸਿੱਖ ਧਰਮ ਖਿਲਾਫ ਕੀਤੀਆਂ ਗਈਆਂ ਇਤਰਾਜਯੋਗ ਟਿੱਪਣੀਆਂ ਵਿਰੱਧ ਆਪਣਾ ਰੋਸ ਪ੍ਰਗਟਾਉਣ ਅਤੇ ਸਰਕਾਰ ਤੋਂ ਉਸਨੂੰ ਬਣਦੀ ਸਜ਼ਾ ਦਿਵਾਉਣ ਦੀ ਮੰਗ ਨੂੰ ਲੈ ਕੇ ਅੱਜ ਵਿਸ਼ਾਲ ਪੱਧਰ ਤੇ ਰੋਸ ਮਾਰਚ ਕੱਢਿਆ ਜਿਸਦੀ ਅਗਵਾਈ ਗੁਰਦਵਾਰਾ ਬੁੰਗਾ ਸਾਹਿਬ ਦਿਆਲਪੁਰ ਦੇ ਮੁੱਖ ਸੇਵਾਦਾਰ ਭਾਈ ਅਜੀਤ ਸਿੰਘ (ਦਮਦਮੀ ਟਕਸਾਲ) ਵਾਲਿਆਂ ਕੀਤੀ ਤੇ ਇਸ ਵਿਚ ਸਿੱਖ ਯੂਥ ਫੈਡਰੇਸ਼ਨ, ਸਟੂਡੈਟਸ ਐਸੋਸੀਏਸ਼ਨ ਆਫ ਇੰਡੀਆ, ਨਿਸ਼ਕਾਮ ਸੇਵਾ ਸੁਸਾਇਟੀ ਅਤੇ ਹੋਰ ਧਾਰਮਿਕ ਜਥੇਬੰਦੀਆਂ ਨੇ ਵੱਧ ਕੇ ਹਿੱਸਾ ਲਿਆ ਤੇ ਗਰਮ ਖਿਆਲੀ ਨਾਅਰੇਬਾਜੀ ਵੀ ਕੀਤੀ।

ਰੋਸ ਮਾਰਚ ਬੁੰਗਾ ਸਾਹਿਬ ਤੋਂ ਚਲ ਕੇ ਕਰਤਾਰਪੁਰ ਪਹੁੰਚਾ ਤੇ ਸ਼ਹਿਰ ਦੇ ਬਜਾਰਾਂ ਚੋਂ ਹੁੰਦੇ ਹੋਏ ਥਾਣੇ ਮੂਹਰੇ ਰੋਸ ਰੈਲੀ ਕਰਕੇ ਸਮਾਪਤ ਹੋਇਆ। ਪੁਲੀਸ ਵਲੋਂ ਇਸ ਸਬੰਧੀ ਸਖਤ ਸੁਰੱਖਿਆ ਪ੍ਰਬੰਧ ਕੀਤੇ ਗਏ ਸਨ ਤੇ ਹਲਕਾ ਡੀ ਐਸ ਪੀ ਬਲਕਾਰ ਸਿੰਘ ਸੋਹਲ ਖੁੱਦ ਇਸਦੇ ਅੱਗੇ ਅੱਗੇ ਚਲਦੇ ਰਹੇ ਤਾਂ ਜੋ ਕਿਸੇ ਸ਼ਰਾਰਤੀ ਅਨਸਰ, ਜੋ ਅਜਿਹੇ ਮੌਕਿਆਂ ਤੇ ਖੁਲ ਖੇੜਣ ਦੀ ਤਾਕ 'ਚ ਰਹਿੰਦੇ ਹਨ, ਕਾਰਣ ਕੋਈ ਅਣਸੁਖਾਂਵੀ ਘਟਨਾ ਨਾ ਵਾਪਰੇ। ਹੱਥਾਂ 'ਚ ਕਾਲੇ ਝੰਡੇ ਲੈ ਕੇ ਰੋਸ ਮਾਰਚ 'ਚ ਸ਼ਾਮਲ ਹੋਏ ਵਿਅਕਤੀਆਂ ਦੇ ਜ਼ਜਬਾਤ ਕਾਬੂ 'ਚ ਰੱਖਣ ਲਈ ਭਾਈ ਅਜੀਤ ਸਿੰਘ ਵਲੋਂ ਵਾਰ ਵਾਰ ਵਾਹਿਗੁਰੂ ਦਾ ਜਾਪ ਕਰ ਲਈ ਬੇਨਤੀਆਂ ਕੀਤੀਆਂ ਗਈਆਂ, ਜਿਸ ਕਾਰਣ ਕਈ ਵਾਰ ਗਰਮ ਹੋਇਆ ਮਹੌਲ ਸ਼ਾਂਤ ਹੋ ਜਾਂਦਾ ਰਿਹਾ।

ਰੋਸ ਰੈਲੀ ਨੂੰ ਸੰਬੋਧਨ ਕਰਦੇ ਹੋਏ ਭਾਈ ਅਜੀਤ ਸਿੰਘ ਤੇ ਗੁਰਪ੍ਰੀਤ ਸਿੰਘ ਨੇ ਕਿਹਾ ਕਿ ਜਿਸ ਬੀਬੀ ਕਮਲੇਸ਼ ਅਹੀਰ ਨੇ ਸਿੱਖਾਂ ਦੇ ਧਾਰਮਿਕ ਜ਼ਜਬਾਤ ਭੜਕਾਉਣ ਲਈ ਗੁਰੂ ਸਾਹਿਬਾਨ ਅਤੇ ਸਿੱਖ ਧਰਮ ਬਾਰੇ ਗਲਤ ਅਤੇ ਗੁਮਰਾਹਕੁੰਨ ਸ਼ਬਦਾਵਲੀ ਵਰਤੀ ਹੈ, ਉਸ ਨਾਲ ਸਿੱਖ ਹਿਰਦੇ ਵਿਲੂੰਦਰੇ ਗਏ ਹਨ ਤੇ ਕੋਈ ਵੀ ਸੱਚਾ ਸਿੱਖ ਆਪਣੇ ਧਰਮ ਜਾਂ ਗੁਰੂ ਸਾਹਿਬਾਨ ਬਾਰੇ ਅਜਿਹੀਆੰ ਗਲਤ ਗਲਾਂ ਸਹਿਣ ਨਹੀਂ ਕਰ ਸਕਦਾ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਲਗਦਾ ਹੈ ਕਿ ਇਹ ਸਾਰਾ ਕੁਝ ਇੱਕ ਸੋਚੀ ਸਮਝੀ ਸਾਜ਼ਿਸ਼ ਤਹਿਤ ਉਸ ਬੀਬੀ ਤੋਂ ਬੁਲਵਾਇਆ ਗਿਆ ਹੈ ਤੇ ਜੋਕਰ ਇਸ ਬੀਬੀ ਨੂੰ ਸਖਤ ਸਜ਼ਾ ਨਾ ਦਿਵਾਈ ਗਈ ਤਾਂ ਕਈ ਹੋਰ ਆਪਹੁਦਰੇ ਲੋਕ ਵੀ ਅਜਿਹੀਆਂ ਕਮੀਨੀਆਂ ਹਰਕਤਾਂ ਤੇ ਉੱਤਰ ਆਉਣਗੇ ਜਿਸਦਾ ਅੰਜਾਮ ਚੰਗਾ ਨਹੀਂ ਹੋਏਗਾ, ਇਸ ਲਈ ਉਹ ਮੰਗ ਕਰਦੇ ਹਨ ਕਿ ਸਰਕਾਰ ਇਸ ਸਬੰਧੀ ਸਖਤ ਕਦਮ ਚੁੱਕੇ ਅਤੇ ਉੱਕਤ ਬੀਬੀ ਵਿਰੁੱਧ ਮਾਮਲੇ ਦਰਜ ਕਰਕੇ ਸਖਤ ਸਜ਼ਾ ਦਿਵਾਈ ਜਾਏ।

ਦੂਸਰੇ ਦੇ ਧਰਮ ’ਤੇ ਇਕੱਲਿਆਂ ਬੈਠ ਕੇ ਕੋਈ ਭਾਸ਼ਣ ਦੇਣ ਦੀ ਥਾਂ ਚੰਗਾ ਹੋਵੇ ਜੇ ਬੀਬੀ ਅਹੀਰ ਮੀਡੀਏ ਦੇ ਸਾਹਮਣੇ ਮੇਜ ’ਤੇ ਬੈਠ ਕੇ ਗੱਲ ਕਰੇ
ਬੁੱਧ ਧਰਮ ਬਦਲੇ ਦੀ ਭਾਵਨਾ ’ਚੋਂ ਪੈਦਾ ਹੋਇਆ ਜਦੋਂ ਕਿ ਸਿੱਖ ਧਰਮ ਸਰਬੱਤ ਦੇ ਭਲੇ ਲਈ ਪਰਉਪਕਾਰ ਦੀ ਭਾਵਨਾ ਨਾਲ : ਪ੍ਰੋ: ਸਰਬਜੀਤ ਸਿੰਘ ਧੂੰਦਾ

ਬਠਿੰਡਾ, 3 ਸਤੰਬਰ - (ਕਿਰਪਾਲ ਸਿੰਘ) : ਦੂਸਰੇ ਦੇ ਧਰਮ ’ਤੇ ਇਕੱਲਿਆਂ ਬੈਠ ਕੇ ਕੋਈ ਭਾਸ਼ਣ ਦੇਣ ਦੀ ਥਾਂ ਚੰਗਾ ਹੋਵੇ ਜੇ ਬੀਬੀ ਕਮਲੇਸ਼ ਅਹੀਰ ਮੀਡੀਏ ਦੇ ਸਾਹਮਣੇ ਮੇਜ ’ਤੇ ਬੈਠ ਕੇ ਗੱਲ ਕਰੇ। ਇਹ ਸ਼ਬਦ ਅੱਜ ਗੁਰਦੁਆਰਾ ਬੰਗਲਾ ਸਾਹਿਬ ਨਵੀਂ ਦਿੱਲੀ ਤੋਂ ਲੜੀਵਾਰ ਚੱਲ ਰਹੀ ਕਥਾ ਦੌਰਾਨ ਗੁਰਮਤਿ ਗਿਆਨ ਮਿਸ਼ਨਰੀ ਕਾਲਜ ਦੇ ਪ੍ਰੋ: ਸਰਬਜੀਤ ਸਿੰਘ ਧੂੰਦਾ ਨੇ ਕਹੇ। ਉਨਾਂ ਕਿਹਾ ਕਿ ਹਰ ਵਿਅਕਤੀ ਨੂੰ ਹੱਕ ਹੈ ਕਿ ਉਹ ਆਪਣੇ ਧਰਮ ਦਾ ਪ੍ਰਚਾਰ ਕਿਸੇ ਵੀ ਢੰਗ ਨਾਲ ਕਰੇ ਪਰ ਆਪਣੇ ਧਰਮ ਨੂੰ ਸ੍ਰੇਸ਼ਟ ਦੱਸਣ ਲਈ ਇਹ ਕਹਿਣਾ ਕਿ ਦੂਸਰੇ ਧਰਮ ਦੇ ਕੋਈ ਮੌਲਿਕ ਸਿਧਾਂਤ ਨਹੀਂ ਬਲਕਿ ਉਸ ਨੇ ਸਾਡੇ ਧਰਮ ਦੀ ਨਕਲ ਕੀਤੀ ਹੈ, ਬਿਲਕੁਲ ਵਾਜ਼ਬ ਨਹੀਂ।

ਇੱਥੇ ਇਹ ਵਰਣਨਯੋਗ ਹੈ ਕਿ ਕੁਝ ਸਮਾਂ ਪਹਿਲਾਂ ਬੁੱਧ ਧਰਮ ਦੀ ਪ੍ਰਚਾਰਕ ਬੀਬੀ ਕਮਲੇਸ਼ ਅਹੀਰ ਨੇ ਕਿਹਾ ਸੀ ਕਿ ਸਿੱਖ ਧਰਮ ’ਚ ਕੁਝ ਵੀ ਨਵਾਂ ਨਹੀਂ ਬਲਕਿ ਬੁੱਧ ਧਰਮ ਦੀ ਨਕਲ ਹੈ। ਪ੍ਰੋ: ਧੂੰਦਾ ਨੇ ਉਨਾਂ ਇਤਰਾਜਯੋਗ ਟਿੱਪਣੀਆਂ ’ਚੋਂ ਕੁਝ ਕੁ ਦਾ ਹਵਾਲਾ ਦਿੰਦੇ ਹੋਏ ਦੱਸਿਆ ਕਿ ਬੀਬੀ ਅਹੀਰ ਅਨੁਸਾਰ ਗੁਰੂ ਗੋਬਿੰਦ ਸਿੰਘ ਜੀ ਨੇ ਪੰਜ ਪਿਆਰੇ ਕੋਈ ਨਵੇਂ ਨਹੀਂ ਸਾਜੇ, ਸਗੋਂ ਮਹਾਤਮਾ ਬੁੱਧ ਨੇ ਪਹਿਲਾਂ ਹੀ ਪੰਜ ਭਿਕਸ਼ੂ ਬਣਾਏ ਸਨ। ਸਿੱਖ ਦਾਅਵਾ ਕਰਦੇ ਹਨ ਕਿ ਉਨਾਂ ਦੇ ਧਰਮ ’ਚ ਇਸਤਰੀਆਂ ਨੂੰ ਬਰਾਬਰ ਦਾ ਸਥਾਨ ਪ੍ਰਾਪਤ ਹੈ ਪਰ ਅੱਜ ਵੀ ਇਸਤਰੀਆਂ ਨੂੰ ਦਰਬਾਰ ਸਾਹਿਬ ’ਚ ਕੀਰਤਨ ਨਹੀਂ ਕਰਨ ਦਿੱਤਾ ਜਾਂਦਾ।

ਪ੍ਰੋ: ਧੂੰਦਾ ਨੇ ਬੁੱਧ ਧਰਮ ਦੇ ਪਿੱਛੋਕੜ ’ਤੇ ਚਾਨਣਾਂ ਪਾਉਂਦੇ ਹੋਏ ਕਿਹਾ ਕਿ ਇਨਾਂ ਦੇ ਹੀ ਧਰਮ ਗੰਰਥਾਂ ਅਨੁਸਾਰ ਮਹਾਤਮਾ ਬੁੱਧ ਦਾ ਦਾਦਾ ਸਾਕਿਆਮੁਨੀ ਜਦੋਂ ਜੰਗ ਦੇ ਮੈਦਾਨ ’ਚੋਂ ਬ੍ਰਾਹਮਣ ਦਾ ਅਸ਼ੀਰਵਾਦ ਲੈਣ ਲਈ ਆਇਆ ਤਾਂ ਉਸ ਨੂੰ ਇਹ ਵੇਖ ਕੇ ਬੜਾ ਕ੍ਰੋਧ ਆਇਆ ਕਿ ਉਸ ਦੇ ਰਾਜ ਮਹਲਾਂ ’ਚ ਬ੍ਰਾਹਮਣ, ਰਾਣੀਆਂ ਨਾਲ ਰੰਗ ਰਲੀਆਂ ਮਨਾ ਰਿਹਾ ਸੀ, ਇਸ ਲਈ ਉਸ ਨੂੰ ਮਾਰਨਾ ਚਾਹੁੰਦਾ ਸੀ ਪਰ ਮਾਰ ਨਾ ਸਕਿਆ ਕਿਉਂਕਿ ਧਰਮ ਅਨੁਸਾਰ ਉਸ ਨੁੰ ਉਚ ਜਾਤੀਏ ਬ੍ਰਾਹਮਣ ’ਤੇ ਵਾਰ ਕਰਨ ਦਾ ਹੁਕਮ ਨਹੀਂ ਸੀ। ਪ੍ਰੋ: ਧੂੰਦਾ ਨੇ ਕਿਹਾ ਕਿ ਸਾਕਿਆਮੁਨੀ ਬ੍ਰਾਹਮਣ ਨੂੰ ਕਤਲ ਤਾਂ ਨਾ ਕਰ ਸਕਿਆ, ਪ੍ਰੰਤੂ ਉਸ ਦੇ ਗਿਰੇ ਆਚਰਣ ਕਾਰਨ ਉਸ ਵਿਰੁੱਧ ਵਿਦਰੋਹ ਉਤਪਨ ਹੁੰਦਾ ਰਿਹਾ ਅਤੇ ਇਸੇ ਵਿਦਰੋਹ ਵਿੱਚੋਂ ਹੀ ਬੁੱਧ ਧਰਮ ਪੈਦਾ ਹੋਇਆ, ਜਿਸ ਨੇ ਬ੍ਰਾਹਮਣ ਵਿਰੁੱਧ ਬਗਾਵਤ ਕੀਤੀ।

ਪਰ ਦੂਸਰੇ ਪਾਸੇ ਸਿੱਖ ਧਰਮ ਕਿਸੇ ਨਿਜੀ ਰੰਜ਼ਸ਼ ਕਾਰਨ ਨਹੀਂ ਬਲਕਿ ਸਰਬੱਤ ਦੇ ਭਲੇ ਲਈ ਪਰਉਪਕਾਰ ਦੀ ਭਾਵਨਾ ਨਾਲ ਪੈਦਾ ਹੋਇਆ। ਭਿਕਸ਼ੂਆਂ ਦੀ ਪੰਜ ਪਿਆਰਿਆਂ ਨਾਲ ਤੁਲਨਾ ਕਰਦੇ ਹੋਏ ਉਨਾਂ ਨੇ ਕਿਹਾ ਕਿ ਮਹਾਤਮਾ ਬੁੱਧ ਦਾ ਉਪਦੇਸ਼ ਸੀ ਕਿ ਉਨਾਂ ਨੇ ਮੰਗ ਕੇ ਖਾਣਾ ਹੈ, ਜਦੋਂ ਕਿ ਸਿੱਖਾਂ ਨੂੰ ਗੁਰੂ ਸਾਹਿਬ ਦਾ ਉਪਦੇਸ਼ ਹੈ

ਗੁਰੁ ਪੀਰੁ ਸਦਾਇ, ਮੰਗਣ ਜਾਇ॥

ਤਾ ਕੈ ਮੂਲਿ ਨ ਲਗੀਐ ਪਾਇ॥

ਘਾਲਿ ਖਾਇ ਕਿਛੁ ਹਥਹੁ ਦੇਇ॥

ਨਾਨਕ ਰਾਹੁ ਪਛਾਣਹਿ ਸੇਇ॥

ਪ੍ਰੋ: ਧੂੰਦਾ ਨੇ ਕਿਹਾ ਕਿ ਬੁੱਧ ਦੇ ਉਪਦੇਸ਼ ਸਦਕਾ ਥਾਈਲੈਂਡ ’ਚ ਇਤਨੇ ਭਿਕਸ਼ੂ ਦੇ ਰੂਪ ’ਚ ਮੰਗਤੇ ਪੈਦਾ ਹੋ ਗਏ ਕਿ ਥਾਈਲੈਂਡ ਸਰਕਾਰ ਨੂੰ ਹੀ ਉਨਾਂ ਵਿਰੁੱਧ ਕਾਨੁੰਨ ਬਣਾਉਣਾ ਪਿਆ। ਗੁਰੂ ਗੋਬਿੰਦ ਸਿੰਘ ਜੀ ਨੇ ਮੰਗ ਖਾਣੇ ਭਿਕਸ਼ੂ ਪੈਦਾ ਨਹੀਂ ਕੀਤੇ ਸਗੋਂ ਐਸਾ ਖ਼ਾਲਸਾ ਸਾਜਿਆ, ਜਿਸ ਨੇ ਦੂਸਰਿਆਂ ਦੀਆਂ ਧੀਆਂ-ਭੈਣਾਂ ਦੀ ਇੱਜ਼ਤ ਦੀ ਰਾਖੀ ਲਈ ਤਲਵਾਰ ਦੀ ਵਰਤੋਂ ਕੀਤੀ। ਔਰਤ ਸਬੰਧੀ ਬੁੱਧ ਮਤ ਦੇ ਉਪਦੇਸ਼ਾਂ ਦੀ ਗੱਲ ਕਰਦਿਆਂ ਪ੍ਰੋ: ਧੂੰਦਾ ਨੇ ਕਿਹਾ ਕਿ ਬੁੱਧ ਦਾ ਭਿਕਸ਼ੂਆਂ ਨੂੰ ਹੁਕਮ ਸੀ ਕਿ ਉਹ 4 ਫੁੱਟ ਤੋਂ ਉੱਚਾ ਨਾ ਦੇਖਣ ਤਾਂ ਕਿ ਕਦੀ ਉਨਾਂ ਦੀ ਨਜ਼ਰ ਔਰਤ ’ਤੇ ਨਾ ਪਏ ਅਤੇ ਜੇ ਨਜ਼ਰ ਪੈ ਵੀ ਜਾਵੇ ਤਾਂ ਉਸ ਨੂੰ ਛੂਹਣਾ ਨਹੀਂ।

ਉਨਾਂ ਦੱਸਿਆ ਕਿ ਮਹਾਤਮਾ ਬੁੱਧ ਦੀ ਚਾਚੀ ਗੌਤਮੀ, ਜਿਸ ਨੇ ਬੁੱਧ ਦੀ ਪਾਲਣਾ ਕੀਤੀ ਸੀ, ਨੇ ਬੁੱਧ ਤੋਂ ਗੁਰ ਦੀਖਿਆ ਦੀ ਮੰਗ ਕੀਤੀ ਤਾਂ ਬੁੱਧ ਨੇ ਕਿਹਾ ਕਿ ਚਾਚੀ! ਔਰਤਾਂ ਨੂੰ ਗੁਰੂ ਦੀਖਿਆ ਨਹੀਂ ਸੀ ਦੇਣੀ ਪਰ ਤੂੰ ਕਿਉਂਕਿ ਮੇਰੀ ਮਾਂ ਮਰਨ ਪਿੱਛੋਂ ਮੈਨੂੰ ਪਾਲਿਆ ਹੈ, ਇਸ ਲਈ ਤੈਨੂੰ ਦੀਖਿਆ ਦੇ ਰਿਹਾਂ ਹਾਂ ਪਰ ਸੁਣ! ਉਸ ਤਰਾਂ ਤਾਂ ਬੁੱਧ ਧਰਮ ਨੇ 5 ਹਜ਼ਾਰ ਸਾਲ ਚੱਲਣਾ ਸੀ ਪਰ ਹੁਣ ਕਿਉਂਕਿ ਭਿਖਸ਼ੂਆਂ ਵਿੱਚ ਔਰਤ ਸਾਮਲ ਹੋ ਗਈ ਹੈ, ਇਸ ਲਈ ਸਿਰਫ਼ 500 ਸਾਲ ਹੀ ਚੱਲੇਗਾ।

ਦੂਸਰੇ ਪਾਸੇ ਸਿੱਖ ਧਰਮ ’ਚ ਇਸਤਰੀ ਨੂੰ ਗੁਰੂ ਨਾਨਕ ਸਾਹਿਬ ਨੇ ਬਰਾਬਰ ਦਾ ਸਥਾਨ ਦੇ ਕੇ ਸਤਿਕਾਰ ਦਿੰਦਿਆਂ ਕਿਹਾ ਕਿ

ਸੋ ਕਿਉ ਮੰਦਾ ਆਖੀਐ,

ਜਿਤੁ ਜੰਮਹਿ ਰਾਜਾਨ॥

ਉਨਾਂ ਦੱਸਿਆ ਕਿ ਗੁਰੂ ਨਾਨਕ ਸਾਹਿਬ ਨੇ ਤਾਂ ‘‘

ਇਸੁ ਜਗ ਮਹਿ ਪੁਰਖੁ ਏਕੁ ਹੈ,

ਹੋਰ ਸਗਲੀ ਨਾਰਿ ਸਬਾਈ॥’’

ਕਹਿ ਕੇ ਪ੍ਰਮਾਤਮਾ ਨੂੰ ਪਤੀ ਅਤੇ ਆਪਣੇ ਸਮੇਤ ਸਾਰੇ ਹੀ ਵਿਅਕਤੀਆਂ ਨੂੰ ਪ੍ਰਮਾਤਮਾ ਦੀਆਂ ਪਤਨੀਆਂ ਦੇ ਰੂਪ ਵਿੱਚ ਪੇਸ਼ ਕਰਦਿਆਂ ਫੁਰਮਾਇਆ : ‘‘

ਆਵਹੁ ਭੈਣੇ ਗਲ ਮਿਲਹ ਅੰਕਿ ਸਹੇਲੜੀਆਹ॥

ਮਿਲਿ ਕੈ ਕਰਹ ਕਹਾਣੀਆ ਸੰਮ੍ਰਥ ਕੰਤ ਕੀਆਹ॥

ਪ੍ਰੋ: ਧੂੰਦਾ ਨੇ ਕਿਹਾ ਕਿ ਜਿਹੜਾ ਗੁਰੂ ਆਪਣੇ ਆਪ ਨੂੰ ਵੀ ਇਸਤਰੀ ਦੇ ਰੂਪ ’ਚ ਪੇਸ਼ ਕਰਦਾ ਹੈ, ਉਹ ਆਪਣੀਆਂ ਦੂਸਰੀਆਂ ਇਸਤਰੀ ਭੈਣਾਂ ਨੁੰ ਮੰਦਾ ਕਿਸ ਤਰ੍ਹਾਂ ਆਖ ਸਕਦੇ। ਉਨਾਂ ਕਿਹਾ ਕਿ ਇਹ ਸਾਡੇ ਕਾਬਜ਼ ਧਾਰਮਿਕ ਆਗੂਆਂ ਦੀ ਘਟੀਆ ਸੋਚ ਤਾਂ ਹੋ ਸਕਦੀ ਹੈ, ਜਿਹੜੇ ਇਸਤਰੀ ਜਾਤੀ ਨੂੰ ਨੀਵਾਂ ਜਾਂ ਪਲੀਤ ਸਮਝ ਕੇ ਹਰਿਮੰਦਰ ਸਾਹਿਬ ’ਚ ਕੀਰਤਨ ਨਹੀਂ ਕਰਨ ਦਿੰਦੇ, ਵੈਸੇ ਗੁਰੂ ਨਾਨਕ ਦੇ ਧਰਮ ’ਚ ਇਸਤਰੀ ਨਾਲ ਕੋਈ ਵਿਤਕਰਾ ਨਹੀਂ।

ਪ੍ਰੋ: ਧੂੰਦਾ ਨੇ ਕਿਹਾ ਕਿ ਗੁਰਮਤਿ ਦੀਆਂ ਧਾਰਨੀ ਬਹੁਤ ਸਾਰੀਆਂ ਜਥੇਬੰਦੀਆਂ ਤਾਂ ਇਸਤਰੀਆਂ ਨੂੰ ਪੰਜ ਪਿਆਰਿਆਂ ’ਚ ਵੀ ਸ਼ਾਮਲ ਕਰ ਰਹੀਆਂ ਹਨ, ਇਸ ਲਈ ਇਹ ਕਹਿਣਾ ਠੀਕ ਨਹੀਂ ਕਿ ਸਿੱਖ ਧਰਮ ’ਚ ਇਸਤਰੀ ਨੂੰ ਬਰਾਬਰ ਦਾ ਦਰਜ਼ਾ ਪ੍ਰਾਪਤ ਨਹੀਂ ਹੈ। ਉਨਾਂ ਸਮੂੰਹ ਸਿੱਖਾਂ ਨੂੰ ਅਪੀਲ ਕੀਤੀ ਕਿ ਉਹ ਖ਼ੁਦ ਗੁਰੂ ਸਿਧਾਂਤ ’ਤੇ ਪਹਿਰਾ ਦੇਣ ਤੇ ਸੁਚੇਤ ਹੋ ਕੇ ਸਿੱਖ ਵਿਰੋਧੀ ਹੋ ਰਹੇ ਪ੍ਰਚਾਰ ਦਾ ਜਵਾਬ ਵੀ ਦਲੀਲ ਨਾਲ ਦੇਣ। ਪ੍ਰੋ: ਧੂੰਦਾ ਨੇ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਇਸ ਗੱਲੋਂ ਧੰਨਵਾਦ ਕੀਤਾ ਕਿ ਇਸ ਦੀਆਂ ਸਟੇਜਾਂ ’ਤੇ ਪ੍ਰਚਾਰਕਾਂ ਨੂੰ ਸੱਚ ਬੋਲਣ ਦੀ ਅਜ਼ਾਦੀ ਹੈ ਨਹੀਂ ਤਾਂ ਆਮ ਪੰਥਕ ਸਟੇਜਾਂ ’ਤੇ ਪ੍ਰਚਾਰਕਾਂ ’ਤੇ ਪਾਬੰਦੀ ਹੈ ਕਿ ਉਹ ਅਜਿਹਾ ਕੁਝ ਨਾ ਬੋਲਣ, ਜਿਸ ਕਾਰਨ ਉਨਾਂ ਦੀਆਂ ਵੋਟਾਂ ਦਾ ਕੁਝ ਨੁਕਸਾਨ ਹੁੰਦਾ ਹੋਵੇ।

... ਅੱਗੇ ਪੜ੍ਹੋ

ਕਮਲੇਸ਼ ਨੂੰ ਡਾ. ਸੁਖਪ੍ਰੀਤ ਸਿੰਘ ਉਧੋਕੇ ਜੀ ਦੇ ਜਵਾਬ

ਵੀਡੀਓ, ਆਡੀਓ, ਲਿਖਤੀ ਜਵਾਬ

1) ਵੀਡੀਓ ਜਵਾਬ (ਪੇਸ਼ਕਰਤਾ: udhoke)

2.0) ਆਡੀਓ ਜਵਾਬ (ਪੇਸ਼ਕਰਤਾ: neverforget2425)

2.1) ਕਮਲੇਸ਼ ਅਹੀਰ ਦੀ ਸਪੀਚ ਦਾ ਜਵਾਬ (ਪੇਸ਼ਕਰਤਾ: WakeUpKhalsa.com)

3) ਲਿਖਤੀ ਜਵਾਬ:

3.0) ਸਿੱਖਾਂ ਖਿਲਾਫ਼ ਜ਼ਹਿਰ ਉਗਲਦੀ ਤਕਰੀਰ ਦੀ ਮਲਿਕਾ - ਬੀਬਾ ਕਮਲੇਸ਼

3.1) ਮਾਫ਼ੀ ਨਾ ਕਾਫ਼ੀ ਹੈ
ਕਨੇਡਾ ਨਿਵਾਸੀ ਅੰਬੇਡਕਰ ਮਿਸ਼ਨ ਦੀ ਪ੍ਰਚਾਰਕ ਅਤੇ ਬੋਧੀ ਪ੍ਰਚਾਰਕ ਕਮਲੇਸ਼ ਅਹੀਰ ਵੱਲੋਂ ਆਪਣਾ ਲਿਖਤੀ ਅਤੇ ਵੀਡੀਓ ਰੂਪ ਵਿਚ ਮਾਫ਼ੀਨਾਮਾ ਭੇਜਿਆ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਕਮਲੇਸ਼ ਅਹੀਰ ਦੇ ਭਾਸ਼ਣ ਦੇ ਪ੍ਰਤੀਕਰਮ ਵਜੋਂ ਸਿੱਖ ਟੂ ਖ਼ਾਲਸਾ ਵਿਚ ਇਕ ਲੇਖ਼ ਪ੍ਰਕਾਸ਼ਿਤ ਕੀਤਾ ਗਿਆ ਸੀ ਅਤੇ ਇਸ ਦਾ ਵੀਡੀਓ ਜਵਾਬ ਵੀ ਦਿੱਤਾ ਗਿਆ ਸੀ। ਕਮਲੇਸ਼ ਅਹੀਰ ਦਾ ਜੋ ਮੁਆਫ਼ੀਨਾਮਾ ਸੰਪਾਦਕ ਨੂੰ ਭੇਜਿਆ ਗਿਆ ਉਹ ਮਾਫੀਨਾਮਾ ਵੀ ਪ੍ਰਵਾਨਗੀ ਸੰਗਤਾਂ ਅਤੇ ਸਿੱਖ ਜੱਥੇਬੰਦੀਆਂ ਨੇ ਦੇਣੀ ਹੈ ਨਾ ਕਿ ਇਕੱਲੇ ਸੰਪਾਦਕ ਨੇ ਜੋ ਮਾਫੀਨਾਮਾ (ਸਪੱਸ਼ਟੀਕਰਨ) ਸੰਗਤਾਂ ਦੀ ਕਚਹਿਰੀ ਵਿਚ ਅਰਪਿਤ ਹੈ।

ਦੂਸਰੀ ਗੱਲ ਮਾਫੀਨਾਮਾ ਜੋ ਵੀਡੀਓ ਰਾਹੀਂ ਆਇਆ ਹੈ ਉਸ ਵਿਚ ਸਿੱਖਾਂ ਪ੍ਰਤੀ ਵਰਤੀ ਗਲਤ ਸ਼ਬਦਾਵਲੀ ਦੀ ਜਿੱਥੇ ਲੁਕਵੇਂ ਢੰਗ ਨਾਲ਼ ਮਾਫ਼ੀ ਮੰਗੀ ਹੈ ਉੱਥੇ ਨਾਲ਼ ਹੀ ਆਪਣੇ ਕਥਨ ਨੂੰ ਸਿੱਧ ਕਰਨ ਲਈ ਕੁਝ ਬੋਧੀ ਲਿਖ਼ਤਾਂ ਦੇ ਹਵਾਲੇ ਵੀ ਦਿੱਤੇ ਹਨ ਜੋ ਕਿ ਹੋਰ ਵੀ ਚਿੰਤਾ ਦਾ ਵਿਸ਼ਾ ਹੈ। ਕਿਉੰਕਿ ਹੁਣ ਅਜਿਹੀਆਂ ਬੋਧੀ ਪੁਸਤਕਾਂ ਉਪਰ ਵੀ ਧਿਆਨ ਕੇਂਦਰਿਤ ਕਰਨਾ ਪਵੇਗਾ।

ਤੀਸਰੀ ਗੱਲ ਜੋ ਤਿੰਨਾ ਹੀ ਮਾਫੀਨਾਮਿਆਂ (ਦੋ ਲਿਖਤੀ ਅਤੇ ਇੱਕ ਵੀਡੀਓ) ਵਿਚ ਉੱਭਰ ਕੇ ਸਾਹਮਣੇ ਆਇਆ ਹੈ ਉਸ ਵਿਚੋਂ ਉਹਨਾਂ ਸੁਚੇਤ ਸਿੱਖ ਵੀਰਾਂ ਜਿਨ੍ਹਾਂ ਨੇ ਇਸ ਦੀ ਪੰਥ ਵਿਰੋਧੀ ਤਕਰੀਰ ਲੱਭ ਕੇ ਇੰਟਰਨੈੱਟ ਉਪਰ ਪਾਈ ਹੈ ਉਹਨਾਂ ਨੂੰ ਬਾਰ-ਬਾਰ ਸ਼ਰਾਰਤੀ ਅਨਸਰ ਕਹਿ ਕੇ ਸੰਬੋਧਿਤ ਕੀਤਾ ਗਿਆ ਹੈ ਸੋ ਇਸ ਮਾਫ਼ੀਨਾਮੇ ਅਰਥਾਤ ਸਪੱਸ਼ਟੀਕਰਨ ਬਾਰੇ ਸੰਗਤਾਂ/ਗੁਰਦੁਆਰਾ ਕਮੇਟੀਆਂ ਅਤੇ ਖਾਸ ਕਰਕੇ ਓਨਟਾਰੀਓ ਗੁਰਦੁਆਰਜ਼ ਕਮੇਟੀ ਨੂੰ ਇਕ ਮੀਟਿੰਗ ਬੁਲਾ ਕੇ ਖਾਸ ਘੋਖ ਕਰਨ ਦੀ ਜ਼ਰੂਰਤ ਹੈ।

ਚੌਥੀ ਗੱਲ ਇਹ ਹੈ ਕਿ ਕਮਲੇਸ਼ ਅਹੀਰ ਨੇ ਆਪਣੇ ਸਪੱਸ਼ਟੀਕਰਨਾਂ ਵਿੱਚ ਬਾਰ-ਬਾਰ ਭਗਤ ਰਵਿਦਾਸ ਜੀ ਬਾਰੇ ਸਤਿਗੁਰੂ ਰਵਿਦਾਸ ਅਤੇ ਗੁਰੂ ਨਾਨਕ ਸਾਹਿਬ ਪ੍ਰਤੀ ਗੁਰੂ ਨਾਨਕ ਸ਼ਬਦ ਦੀ ਵਰਤੋਂ ਕੀਤੀ ਹੈ ਜ਼ਿਕਰਯੋਗ ਹੈ ਕਿ ਇਸ ਵੱਖਰੀ ਸਤਿਗੁਰੂ ਪ੍ਰੰਪਰਾ ਤੋਂ ਹੀ ਡੇਰੇਦਾਰੀ ਅਤੇ ਵੱਖਰੇਪਨ ਦਾ ਅਧਾਰ ਜਨਮ ਲੈਂਦਾ ਹੈ ਅਤੇ ਇੱਥੋਂ ਹੀ ਦਲਿਤ ਸਿੱਖ ਸਮਾਜ ਵਿਚ ਤਰੇੜ ਉਭਰਦੀ ਹੈ ਅਜਿਹੀ ਸ਼ਬਦਾਵਲੀ ਦਾ ਆਰੰਭ ਜਿਤੇ ਸੰਘ ਪੱਖੀ ਜੱਥੇਬੰਦੀਆਂ ਨੇ ਕੀਤਾ ਉੱਥੇ ਨਾਲ਼ ਹੀ ਸਿੱਖ ਵਿਚਾਰਧਾਰਾ ਤੋਂ ਵਿਹੜੇ ਡੇਰੇਦਾਰ ਵਰਤ ਰਹੇ ਹਨ।

ਕਮਲੇਸ਼ ਅਹੀਰ ਦੇ 2 ਲਿਖਤੀ, 1 ਵੀਡੀਓ ਮਾਫ਼ਨਾਮਾ
... ਅੱਗੇ ਪੜ੍ਹੋ

ਪਹਿਲੇ ਸੱਚੇ ਸਿੱਖ ਦਾ ਦਲੀਲ ਅਤੇ ਅਰਥ ਭਰਪੂਰ ਵੀਡੀਓ ਜਵਾਬ

... ਅੱਗੇ ਪੜ੍ਹੋ

ਜਨਤਾ ਦੇ ਸੇਵਕ ਬਨਾਮ ਮਾਡਰਨ ਰਾਜੇ ਅਜੋਕੇ ਨੇਤਾ - ਰਾਜਵੀਰ

ਸੱਭ ਤੋਂ ਪਹਿਲਾਂ ਮੈ ਸਰਦਾਰ ਸਤਨਾਮ ਸਿੰਘ ਬੱਬਰ ਜਰਮਨੀ ਦਾ ਸਿੱਖ ਧਰਮ ਬਾਰੇ ਜਾਣਕਾਰੀ ਦੇਣ ਅਤੇ ਬੁੱਧ ਧਰਮ ਅਤੇ ਸਿੱਖ ਧਰਮ ਵਿਚ ਫਰਕ ਨੂੰ ਬਹੁਤ ਹੀ ਸਪੱਸ਼ਟ ਤਰੀਕੇ ਨਾਲ ਦਰਸਾਉਣ ਲਈ ਧੰਨਵਾਦੀ ਹਾਂ । ਸ਼੍ਰੀ ਵਿਸ਼ਾਲ, ਇਟਲੀ ਨੇ ਜਿਸ ਤਰਾਂ ਆਪਣੇ ਵਿਚਾਰ ਬੀਬੀ ਦੇ ਇਸ ਬੇਹੂਦਾ ਭਾਸ਼ਣ ਵਾਰੇ ਦਿੱਤੇ ਹਨ ਉਨਾਂ ਨਾਲ ਮੈ ਪੂਰੀ ਤਰਾਂ ਨਾਲ ਸਹਿਮਤ ਹਾਂ । ਇਹਨਾਂ ਸਾਰਿਆਂ ਦੀ ਵਿਚਾਰ ਗੋਸ਼ਟੀ ਤੋਂ ਇਹ ਪੂਰੀ ਤਰਾਂ ਸਪਸ਼ੱਟ ਹੋ ਗਿਆ ਹੈ ਕਿ ਇਸ ਬੀਬੀ ਦਾ ਭਾਸ਼ਣ ਬਿਲਕੁੱਲ ਬੇਬੁਨਿਆਦ ਹੈ ਇਸ ਬੀਬੀ ਦੀ ਜਾਣਕਾਰੀ ਵਿਚ ਵੀ ਕਮੀ ਹੈ ।

ਕਿਸੇ ਵੀਰ ਦਾ ਮੇਰੇ ਤੋਂ ਬੜੇ ਹੀ ਟਾਂਚ ਵਾਲੇ ਤਰੀਕੇ ਨਾਲ ਪੁਛਿਆ ਕਿ ਮੈ ਇੱਕ ਸਿੱਖ ਲੜਕੀ ਹਾਂ ਪਰ ਮੈਨੂੰ ਬਰਾਹਮਣ ਜਾਤੀ ਲਈ ਵਰਤੇ ਗਏ ਸ਼ਬਦ "ਕੁੱਤੇ" ਦਾ ਇੱਨਾਂ ਕਿਉ ਦੁਖ ਲੱਗਾ ਹੈ । ਮੈ ਸਰਦਾਰ ਬੱਬਰ ਜੀ ਵਰਗੀ ਧਰਮ ਦੀ ਜਾਣਕਾਰੀ ਦੇ ਮਾਮਲੇ ਵਿੱਚ ਬੁਧਜੀਵੀ ਵਿਦਵਾਨ ਨਹੀਂ ਹਾਂ ਅਤੇ ਭਾਵੇਂ ਕਿ ਧਰਮ ਦੇ ਮਾਮਲੇ ਵਿਚ ਮੇਰੀ ਜਾਣਕਾਰੀ ਉਨਾਂ ਨਾਲੋਂ ਕੋਹਾਂ ਘੱਟ ਹੈ ਪਰ ਇਸ ਦੇ ਬਾਵਜੂਦ ਵੀ ਮੈ ਇਸ ਗੱਲ ਨੂੰ ਸਪਸ਼ਟ ਕਰਦੇ ਹੋਏ ਇਹ ਕਹਿਣਾ ਚਾਹੁਂਦੀ ਹਾਂ ਕਿ ਨੌਵੇਂ ਪਾਤਸ਼ਾਹ ਸ੍ਰੀ ਗੁਰੂ ਤੇਗ ਬਹਾਦਰ ਜੀ ਨੇ ਹਿਂਦੂ ਧਰਮ ਦੀ ਰੱਖਿਆ ਲਈ ਕੁਰਬਾਨੀ ਕੀਤੀ । ਗੁਰੂ ਜੀ ਨੇ ਅਸਲ ਵਿਚ ਮਨੁਖੱਤਾ ਦੇ ਅਧਿਕਾਰਾਂ ਦੀ ਰੱਖਿਆ ਲਈ ਕੁਰਬਾਨੀ ਦਿੱਤੀ ਅਤੇ ਕਸ਼ਮੀਰੀ ਪਡਿੰਤਾਂ ਦੀ ਜਗ੍ਹਾ ਕਿਸੇ ਹੋਰ ਧਰਮ ਦੇ ਲੋਕ ਵੀ ਇਹੋ ਜਿਹੀ ਮੁਸ਼ਕਲ ਵਿਚ ਹੁੰਦੇ ਤਾਂ ਵੀ ਗੁਰੂ ਜੀ ਪਿੱਛੇ ਨਾ ਹਟਦੇ । ਜਿਸ ਤੋਂ ਭਾਵ ਇਹੀ ਹੈ ਕਿ ਹਰ ਮਨੁੱਖ ਨੂੰ ਉਸਦੀ ਇੱਛਾ ਅਨੁਸਾਰ ਧਰਮ ਅਪਨਾਉਣ ਦੀ ਆਗਿਆ ਹੈ ਜੋ ਕਿ ਸਾਡੇ ਦੇਸ਼ ਦੇ ਸੰਵਿਧਾਨ ਹੁਣ ਸਿਰਫ 59 ਕੁ ਸਾਲ ਪਹਿਲਾਂ ਲਿਖਿਆ ਗਿਆ ਹੈ ਅਤੇ ਅਪਣੇ ਧਰਮ ਦੀ ਰੱਖਿਆ ਕਰਨਾ ਵੀ ਹਰ ਮਨੁੱਖ ਦਾ ਫਰਜ਼ ਹੈ ।

ਜੇ ਸਾਡੇ ਗੁਰੂ ਜੀ ਹਿਂਦੂ ਧਰਮ ਦੀ ਰੱਖਿਆ ਲਈ ਸ਼ਹੀਦ ਹੋ ਸਕਦੇ ਹਨ ਤਾਂ ਇਸ ਦਾ ਮਤਲਬ ਸਿੱਖ ਕੌਮ ਦਾ ਫਰਜ਼ ਹੈ ਕਿ ਬੀਬੀ ਵਲੋਂ ਗਲਤ ਭਾਸ਼ਾ ਦੀ ਵਰਤੋਂ ਅਤੇ ਮਰਿਆਦਾ ਦੀ ਉਲੰਘਣਾ ਕਰਨ ਦੀ ਗਲਤ ਜੁਰਅੱਤ ਨੂੰ ਨਜ਼ਰਅਂਦਾਜ਼ ਨਹੀਂ ਕੀਤਾ ਜਾ ਸਕਦਾ। ਜੇ ਅਸੀਂ ਇਸ ਬੀਬੀ ਦੀ ਇਸ ਗਲਤੀ ਨੂੰ ਨਜ਼ਰਅੰਦਾਜ਼ ਕਰਦੇ ਹਾਂ ਤਾਂ ਇਸ ਤੋੰ ਭਾਵ ਹੈ ਕਿ ਸਾਨੂੰ ਸਾਡੇ ਗੁਰੂ ਜੀ ਵਲੋਂ ਦਿੱਤੀ ਗਈ ਕੁਰਬਾਨੀ ਦੀ ਕੋਈ ਕਦਰ ਨਹੀਂ ਹੈ । ਇਸ ਬੀਬੀ ਨੁੰ ਕਿਸੇ ਧਰਮ ਦੀ ਨਿੰਦਾ ਜਾਂ ਤੁਲਨਾ ਕਰਨ ਦਾ ਕੋਈ ਅਧਿਕਾਰ ਨਹੀਂ ਹੈ । ਇਸ ਬੀਬੀ ਵਲੋਂ ਖੁੱਲੇ ਸ਼ਬਦਾਂ ਵਿਚ ਸਿੱਖ ਅਤੇ ਹਿਂਦੂ ਧਰਮ ਦਾ ਮਜ਼ਾਕ ਉਡਾਇਆ ਗਿਆ ਹੈ ਅਤੇ ਗਲਤ ਤਰੀਕੇ ਨਾਲ ਟਾਂਚਾ ਗਈਆਂ ਹਨ । ਬੀਬੀ ਦੀ ਇਸ ਘਟੀਆ ਹਿਮਾਕਤ ਨੂੰ ਸਹਿਜੇ ਹੀ ਨਜ਼ਰਅਂਦਾਜ਼ ਨਹੀਂ ਕੀਤਾ ਜਾ ਸਕਦਾ ਅਤੇ ਬੀਬੀ ਵਲੋਂ ਭੇਜਿਆ ਗਏ ਸਪਸ਼ਟੀਕਰਨ ਇਸ ਗੱਲ ਨੂੰ ਨਹੀਂ ਸਪਸ਼ਟ ਕਰਦਾ ਕਿ ਬੀਬੀ ਮਾਫੀ ਮੰਗ ਰਹੀ ਹੈ ਕਿਉਂਕਿ ਉਸ ਵਿਚ ਬੀਬੀ ਆਪਣੇ ਆਪ ਨੂੰ ਹੀ ਸਹੀ ਸਾਬਤ ਕਰਨ ਦੀ ਕੋਸ਼ਿਸ ਕਰ ਰਹੀ ਹੈ ।

ਬੀਬੀ ਕਹਿ ਰਹੀ ਹੈ ਕਿ ਯੂਟਿਊਬ ਤੇ ਵੀਡੀੳ ਕੱਟ ਵੱਢ ਕੇ ਗਲਤ ਤਰੀਕੇ ਨਾਲ ਪਾਈ ਗਈ ਹੈ । ਇਸ ਕਰਕੇ ਇਸ ਬੀਬੀ ਦੀ ਜਾਣਕਾਰੀ ਲਈ ਮੈ ਦੱਸਣਾ ਚਾਹੁਦੀ ਹਾਂ ਕਿ ਭੈਣਜੀ ਸੱਭ ਤੋੰ ਪਹਿਲਾਂ ਇਸ ਵੀਡੀੳ ਦੀ ਪੂਰੀ ਡੀ.ਵੀ.ਡੀ ਅਬੇਂਦਕਰਮੂਵਮੈਂਟ ਨਾਮੀ ਯੂਟਿਊਬ ਚੈਨਲ ਵਲਂ ਪਾਈ ਗਈ ਸੀ । ਉਸ ਚੈਨਲ ਵਲੋਂ ਬੀਬੀ ਦੇ ਭਾਸ਼ਣ ਦੇ ਨਾਲ ਨਾਲ ਅਬੇਂਦਕਰ ਮੂਵਮੈਂਟ ਨਾਲ ਸੰਬੰਧਤ ਹੋਰ ਵੀਡੀੳ ਅਤੇ ਬੀਬੀ ਦੀ ਹੀ ਭਾਸ਼ਣ ਵਿਚ ਰਿਕਮੈਂਡ ਕੀਤੀ ਹੋਈ ਹਿਂਦੀ ਫਿਲਮ ਤੀਸਰੀ ਅਜ਼ਾਦੀ ਵੀ ਪਾਈ ਗਈ ਸੀ । ਤੀਸਰੀ ਅਜ਼ਾਦੀ ਫਿਲਮ ਜਿਸਦਾ ਅਧਾਰ ਪੁਰਾਣੇ ਸਮੇਂ ਵਿਚ ਮਨੂਂਵਾਦੀ ਬ੍ਰਹਾਮਣਾਂ ਵਲੋਂ ਕੀਤਾ ਜਾਂਦਾ ਅਤਿੱਆਚਾਰ ਸੀ ਅਤੇ ਬੀਬੀ ਨੇ ਆਪਣਾ ਪੂਰਾ ਭਾਸ਼ਣ ਇਸ ਫਿਲਮ ਦੀ ਹੂ ਬ ਹੂ ਤਰਜ ਤੇ ਦੇ ਦਿੱਤਾ । ਪਰ ਜੋ ਇਸ ਨੇ ਮਸਾਲਾ ਫਿਲਮ ਤੋਂ ਬਿਨਾਂ ਆਪਣੇ ਕੋਲੋਂ ਆਪਣੇ ਭਾਸ਼ਣ ਵਿਚ ਲਾਇਆ ਉਹ ਵਿਵਾਦ ਦਾ ਵਿਸ਼ਾ ਬਣ ਗਿਆ । ਜੇ ਬੀਬੀ ਕਹਿੰਦੀ ਹੈ ਕਿ ਕੱਟ ਵੱਡ ਕੀਤੀ ਹੈ ਤਾਂ ਅਬੇਂਦਕਰ ਮੂਵਮੈਂਟ ਵਾਲਿਆਂ ਨੂੰ ਕਹੋ ਕਿ ਵੀਡੀੳ ਦੁਬਾਰਾ ਪਾਈ ਜਾਵੇ ਕਿੳਕਿ ਇਹ ਦੱਸਣਾ ਵੀ ਜ਼ਰੂਰੀ ਹੈ ਕਿ ਜਿਵੇਂ ਹੀ ਮੀਡੀਆ ਪੰਜਾਬ ਵਿਚ ਬੀਬੀ ਦੇ ਘਟੀਆ ਭਾਸ਼ਣ ਵਾਰੇ ਖਬਰ ਲੱਗੀ ਸਾਰੀਆਂ ਵੀਡੀੳ ਯੂਟਿਊਬ ਤੋਂ ਖਤਮ ਕਰ ਦਿੱਤੀਆਂ ਗਈਆਂ।

ਇਹ ਗੱਲ ਮੰਨਣਯੋਗ ਹੈ ਕਿ ਕੋਈ ਵੀ ਅਜਿਹੀ ਫਿਲਮ ਦੇਖੇਗਾ ਤਾਂ ਜਿਸ ਜ਼ਮਾਨੇ ਦੀ ਉਹ ਫਿਲਮ ਬਣੀ ਹੈ ਉਸਦੀ ਜਿਂਦਗੀ ਜੀਣ ਲੱਗ ਪਵੇਗਾ ਅਤੇ ਉਹ ਗੱਲ ਦਿਮਾਗ ਤੇ ਅਸਰ ਕਰ ਜਾਂਦੀ ਹੈ ਜਿਵੇਂ ਕਿ 1984 ਦੇ ਦੰਗਿਆ ਅਤੇ ਸਿੱਖਾਂ ਉੱਤੇ ਕੀਤੇ ਅਤਿਆਚਾਰਾਂ ਨਾਲ ਸੰਬੰਧਤ ਫਿਲਮਾਂ ਦੇਖਣ ਤੋੰ ਬਾਅਦ ਮਨ ਵਿਚ ਨਫਰਤ ਪੈਦਾ ਹੋ ਜਾਂਦੀ ਹੈ । ਪਰ ਇਹ ਸਭ ਕੁਝ ਕੁ ਰਾਜਸੀ ਨੇਤਾਵਾਂ ਦੀ ਵਜ੍ਹਾ ਨਾਲ ਹੁਂਦਾ ਹੈ ਪੁਰਾਣੇ ਜ਼ਮਾਨੇ ਵਿਚ ਇਹ ਸਭ ਕੁਝ ਰਾਜੇ ਮਹਾਰਾਜੇ ਕਰਦੇ ਸਨ ਅਤੇ ਅਜਕੱਲ ਜਨਤਾ ਦੇ ਚੁਣੇ ਹੋਏ ਅਖੌਤੀ ਸੇਵਕ ਜੋ ਕਿ ਜੋ ਸਾਡੇ ਤੇ ਰਾਜ ਕਰਦੇ ਹਨ ਅਤੇ ਉਨ੍ਹਾਂ ਨੂੰ ਅਸੀਂ ਮਾਡਰਨ ਰਾਜੇ ਮਹਾਰਾਜੇ ਵੀ ਕਹਿ ਸਕਦੇ ਹਾਂ । ਮਾਡਰਨ ਰਾਜੇ ਮਹਾਰਜਿਆਂ ਦਾ ਨਾਂ ਤੇ ਕੋਈ ਧਰਮ ਹੈ ਅਤੇ ਨਾਂ ਹੀ ਜਾਤ । ਉਨਾਂ ਦਾ ਬੱਸ ਇਕ ਧਰਮ ਹੈ ਕੁਰਸੀ ।

ਸਾਡੇ ਮਾਡਰਨ ਜਨਤਾ ਦੇ ਸੇਵਕ ਬਨਾਮ ਮਹਾਰਾਜਿਆ ਵਿਚ ਦਲਿਤ, ਹਿੰਦੂ , ਸਿੱਖ ਅਤੇ ਮੁਸਲਿਮ ਸ਼ਾਮਲ ਹਨ । ਜਦ ਤੱਕ ਇਨ੍ਹਾਂ ਦਾ ਰਾਜਨੀਤੀ ਦਾ ਕਾਰੋਬਾਰ ਵਧੀਆ ਚੱਲਦਾ ਹੈ ਨਾਂ ਤੇ ਇਨ੍ਹਾਂ ਨੂੰ ਨਾਂ ਤੇ ਧਰਮ ਯਾਦ ਆਉਂਦਾ ਹੈ ਨਾ ਜਾਤ ਅਤੇ ਨਾਂ ਹੀ ਅਪਣਾ ਧਰਮ ਜਾਂ ਜਾਤੀ ਦੇ ਲੋਕ ਜਿਨ੍ਹਾਂ ਦੀਆਂ ਵੋਟਾਂ ਸਦਕਾ ਪੰਜ ਸਾਲ ਮਹਾਰਾਜੇ ਬਨਣ ਦਾ ਮੌਕਾ ਮਿਲਿਆ ਹੁਂਦਾ ਹੈ । ਪੁਰਾਣੇ ਜ਼ਮਾਨੇ ਵਿਚ ਵੋਟਿੰਗ ਸਿਸਟਮ ਤੇ ਹੁਂਦਾ ਨਹੀਂ ਸੀ ਪਰ ਉਨ੍ਹਾਂ ਰਾਜਿਆਂ ਤੇ ਅੱਜ ਦੇ ਰਾਜਿਆਂ ਵਿਚ ਕੁਝ ਖਾਸ ਫਰਕ ਨਹੀਂ ਹੈ । ਫਿਰ ਸਾਡੇ ਮਾਡਰਨ ਰਾਜਿਆਂ ਨੂੰ ਧਰਮ ਕਦੋਂ ਯਾਦ ਆਉਂਦਾ ਹੈ , ਪੰਜ ਸਾਲ ਬਾਅਦ, ਜਦੋੰ ਪੰਜ ਸਾਲ ਦੇਸ਼ ਨੂੰ ਚੰਗੀ ਤਰਾਂ ਖਾ ਕਿ ਇੱਕ ਵਾਰ ਹੋਰ ਖਾਣ ਦਾ ਮੌਕਾ ਪਾਉਣ ਦੀ ਕੋਸ਼ਿਸ਼ ਵਿਚ ਇਹ ਲੋਕ ਫਿਰ ਧਰਮ ਅਤੇ ਜਾਤੀ ਦੇ ਮੁੱਦੇ ਉਠਾਉਂਦੇ ਹਨ ।

ਜਿਹੜੇ ਹਾਰ ਜਾਂਦੇ ਹਨ ਅਤੇ ਜਿਨ੍ਹਾਂ ਤੇ ਫਿਰ ਰਿਸ਼ਵਤਖੋਰੀ, ਹੇਰਾਫੇਰੀ ਅਤੇ ਘਪਲੇ ਦੇ ਇਲਜ਼ਾਮ ਲਗਦੇ ਹਨ, ਉਹ ਧਰਮ ਅਤੇ ਜਾਤ ਦਾ ਸਹਾਰਾ ਲੈ ਕਿ ਅਪਣਾ ਬਚਾਅ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ । ਜਿਵੇਂ ਪਿੱਛੇ ਜਿਹੇ ਇਕ ਦਲਿਤ ਨੇਤਾ ਨੇ ਕਿਹਾ ਕਿ ਉਸਦਾ 1200 ਕਰੋੜ ਦੇ ਘੋਟਾਲੇ ਚਿ ਕੋਈ ਹੱਥ ਨਹੀਂ ਹੈ ਬਲਕਿ ਦਲਿਤ ਹੋਣ ਦੀ ਵਜ੍ਹਾ ਕਰਕੇ ਬਿਨ੍ਹਾਂ ਵਜ੍ਹਾ ਉਸਦਾ ਨਾਮ ਇਸ ਘਪਲੇ ਵਿਚ ਘੜੀਸਿਆ ਜਾ ਰਿਹਾ ਹੈ ,ਕੋਈ ਇਸ ਲੀਡਰ ਤੋਂ ਪੁੱਛੱਣ ਵਾਲਾ ਹੋਵੇ ਕਿ ਭਾਜੀ ਤੁਸੀਂ ਇਕੋ ਇਲਾਕੇ ਵਿਚੋ 4 - 5 ਵਾਰ ਜਿੱਤੇ ਅਤੇ ਕਰੀਬ 10 ਸਾਲ ਮਂਤਰੀ ਰਹੇ ਹੋ ਉਦੋਂ ਤੇ ਤੁਸੀਂ ਕਿਹਾ ਨਹੀਂ ਕਿ ਮੈ ਦਲਿਤ ਹਾਂ ।

ਇੱਕ ਮੁਸਲਿਮ ਖਿਡਾਰੀ ਨੇ ਮੈਚ ਫਿਕਸਿੰਗ ਵਿਚ ਫਸ ਜਾਣ ਤੇ ਕਿਹਾ ਕਿ ਉਸਨੂੰ ਇਸ ਸਕੈਂਡਲ ਵਿਚ ਇਸ ਕਰਕੇ ਫਸਾਇਆ ਜਾ ਰਿਹਾ ਹੈ ਕਿਉਂਕਿ ਉਹ ਘੱਟ ਗਿਣਤੀ ਵਿੱਚ ਹੈ । ਕੋਈ ਪੁੱਛੇ ਕਿ ਪਾਕਿਸਤਾਨ ਨਾਲੋਂ ਜ਼ਿਆਦਾ ਮੁਸਲਿਮ ਤੇ ਭਾਰਤ ਵਿਚ ਨੇ ਫਿਰ ਉਹ ਘੱਟ ਗਿਣਤੀ ਕਿਸ ਤਰ੍ਹਾਂ ਹੋਇਆ । ਸਾਡੇ ਦੇਸ਼ ਦੇ ਇਕ ਹਿੰਦੂ ਪਰਿਵਾਰ ਦੀ ਪੋਤੀ ਦੋਹਤੀ ਜਿਨ੍ਹਾਂ ਦਾ ਪਰਿਵਾਰ 62 ਸਾਲ ਤੋਂ ਸਾਡੇ ਦੇਸ਼ ਤੇ ਰਾਜ ਕਰ ਰਿਹਾ ਹੈ ਨੇ ਚੋਣ ਪ੍ਰਚਾਰ ਦੌਰਾਨ ਕਿਹਾ ਕਿ ਮੇਰੀ ਦਾਦੀ ਦੀ ਮਿਹਨਤ ਅਤੇ ਕੁਰਬਾਨੀ ਦਾ ਫਲ ਉਹ ਝੋਲੀ ਫਿਲਾ ਕਿ ਮੰਗ ਰਹੀ ਹੈ ਕੋਈ ਪੁੱਛੇ ਕਿ ਬੀਬੀ ਜੀ 50 ਸਾਲ ਤੋਂ ਆਪਦਾ ਪਰਿਵਾਰ ਹੀ ਤਾਂ ਸਾਡੇ ਦੇਸ਼ ਤੇ ਸਿੱਧੇ ਜਾਂ ਅਸਿੱਧੇ ਰੂਪ ਵਿਚ ਰਾਜ ਕਰ ਰਿਹਾ ਹੈ , ਹੋਰ ਤੁਹਾਨੂੰ ਸਾਡੇ ਦੇਸ਼ ਦੀ ਗਰੀਬ ਜਨਤਾ ਕੀ ਦੇ ਸਕਦੀ ਹੈ ਜਦਕਿ ਜਿਸ ਨੂੰ ਤੁਸੀਂ ਆਪਣੀ ਦਾਦੀ ਦੀ ਕੁਰਬਾਨੀ ਕਹਿ ਰਹੇ ਹੋ ਉਸ ਦਾਦੀ ਜੀ ਦੀ ਵਜ੍ਹਾ ਨਾਲ ਇੱਕ ਧਰਮ ਦੇ ਲੋਕਾਂ ਦੀਆ ਧਾਰਮਿਕ ਭਾਵਨਾਵਾਂ ਨੂੰ ਬਹੁਤ ਠੇਸ ਪਹੁਂਚੀ ਸੀ ਅਤੇ ਕੁਝ ਗਰਮ ਖੂਨ ਵਾਲੇ ਧਰਮ ਦੇ ਰਖਵਾਲੇ ਨੋਜੁਆਂਨਾ ਤੋੰ ਆਪਦੀ ਦਾਦੀ ਜੀ ਦੀ ਇਹ ਗਲਤੀ ਮਾਂਫ ਨਹੀਂ ਕਰ ਹੋਈ । ਇਸੇ ਤਰ੍ਹਾਂ ਹੀ ਸਿੱਖ ਨੇਤਾਵਾਂ ਨੂੰ 1984 ਦੇ ਦੰਗੇ ਪੀੜਤ ਲੋਕਾਂ ਦਾ ਦਰਦ ਸਿਰਫ ਚੋਣਾਂ ਦੇ ਸਮੇਂ ਹੀ ਜਾਗਦਾ ਹੈ ਅਤੇ ਉਨਾਂ ਨੂੰ ਇਨਸਾਫ ਦਿਵਾਉਣ ਦੀ ਚੇਸ਼ਟਾ ਵੀ ਬੱਸ ਉਂਨੇ ਕੁ ਸਮੇਂ ਲਈ ਜਾਗਦੀ ਹੈ । ਮੇਰੇ ਕਹਿਣ ਤੋਂ ਭਾਵ ਕਿ ਅੱਜ ਭਾਰਤ ਦੇ ਕਾਨੂਂਨ ਵਿਚ ਕੋਈ ਜਾਤੀਵਾਦ ਨਹੀਂ ਹੈ ਅਤੇ ਜੇ ਕਿਤੇ ਕੋਈ ਫਸਾਦ ਪੈਦਾ ਹੁਂਦਾ ਹੈ ਤਾਂ ਇਹ ਸੱਭ ਲੀਡਰਾਂ ਦੀ ਦੇਣ ਹੈ।

ਬੀਬੀ ਕਮਲੇਸ਼ ਅਹੀਰ ਦੁਆਰਾ ਦਿੱਤੇ ਗਏ ਸਪੱਸ਼ਟੀਕਰਨ ਵਿਚ ਇਸ ਬੀਬੀ ਦੁਆਰਾ ਇਹ ਕਿਹਾ ਗਿਆ ਕਿ ਉਹ ਬ੍ਰਾਹਮਣਵਾਦ ਦੇ ਖਿਲਾਫ ਹਨ ਅਤੇ ਨਾਲ ਹੀ ਇਸ ਬੀਬੀ ਨੇ ਕਿਹਾ ਕਿ ਉਹ ਮਹਾਨ ਵਿਦਵਾਨ ਰਾਵਣ ਦੇ ਪੈਰੋਕਾਰ ਹਨ ਅਤੇ ਬੀਬੀ ਵਲੋਂ ਸ੍ਰੀ ਰਾਮ ਚੰਦਰ ਜੀ ਦੇ ਰਾਜ ਨੂੰ ਕਾਤਲ ਰਾਜ ਦੱਸਿਆ ਗਿਆ । ਬੀਬੀ ਜੀ ਗੱਲ ਇਸ ਤਰਾਂ ਹੈ ਕਿ ਬਚਪਨ ਵਿਚ ਰਮਾਇਣ ਤਾਂ ਅਸੀ ਵੀ ਦੇਖੀ ਸੀ , ਜਿਥੋਂ ਤੱਕ ਮੈਨੂੰ ਯਾਦ ਹੈ ਸ੍ਰੀ ਰਾਮ ਚੰਦਰ ਜੀ ਕਸ਼ਤਰੀਆ ਸਨ ਅਤੇ ਮਹਾਨ ਵਿਦਵਾਨ ਰਾਵਣ ਬ੍ਰਹਾਮਣ ਸੀ । ਭਾਵ ਕਿ ਬੀਬੀ ਜੀ ਇਸ ਗੱਲ ਨੂੰ ਸਪਸੱਟ ਕਰੋ ਕਿ ਤੁਸੀ ਬ੍ਰਹਾਮਣ ਰਾਵਣ ਦੇ ਪੈਰੋਕਾਰ ਹੋ ਜਾਂ ਫਿਰ ਬ੍ਰਹਾਮਣਵਾਦ ਦੇ ਖਿਲਾਫ ।

ਚਲੋ ਜੇ ਮੈ ਗਲਤ ਹੋਵਾਂ ਤਾਂ ਮੈ ਖਿਮਾ ਦੀ ਜਾਚਕ ਹਾਂ ਕਿਉਂਕਿ ਮੈਂਨੂ ਹਿੰਦੂ ਧਰਮ ਦੀ ਕੋਈ ਵਧੇਰੇ ਜਾਣਕਾਰੀ ਨਹੀਂ ਹੈ ਪਰ ਇਨਸਾਨੀਅਤ ਅਤੇ ਮਨੁਖਤਾ ਦੇ ਨਾਤੇ ਸ੍ਰੀ ਰਾਮ ਚੰਦਰ ਜੀ ਦੀ ਜਿੱਤ ਨੂੰ ਬੁਰਾਈ ਤੇ ਸਚਾਈ ਦੀ ਜਿੱਤ ਨਾਲ ਜਾਣਿਆ ਜਾਂਦਾ ਹੈ । ਕੁਰਕਸ਼ੇਤਰ ਦੇ ਯੁੱਧ ਨੂੰ ਧਰਮ ਯੁਧ ਆਖਿਆ ਜਾਂਦਾ ਹੈ ਕਿਉਂਕਿ ਹੋ ਸਕਦਾ ਬੀਬੀ ਆਪਣੇ ਅਗਲੇ ਭਾਸ਼ਣ ਦੀ ਪ੍ਰੇਰਨਾ ਮਹਾਂ ਭਾਰਤ ਤੋਂ ਲਵੇ ਅਤੇ ਦੁਰਯੋਦਨ ਦੀ ਸਾਈਡ ਲੈਣ ਲੱਗ ਪਵੇ। ਇਹ ਜੋ ਅਸੀ ਕਿਤਾਬਾਂ ਵਿਚ ਪੜਿਆ ਅਤੇ ਰਮਾਇਣ ਵਿਚ ਦੇਖਿਆ ਮੈਂ ਉਹ ਵਰਣਨ ਕੀਤਾ ਹੈ। ਸ਼ਾਇਦ ਬੀਬੀ ਨੇ ਕੋਈ ਵੱਖਰੀ ਕਿਤਾਬ ਜਾਂ ਇਤਿਹਾਸ ਪੜਿਆ ਹੋਵੇ ਜਾਂ ਨਵੇਂ ਨੂੰ ਸਿਰਜਣ ਦੀ ਕੋਸ਼ਿਸ ਕਰ ਰਹੀ ਹੋਵੇ। ਪਰ ਇਹ ਜਿਹੜਾ ਮਰਜ਼ੀ ਇਤਿਹਾਸ ਸਿਰਜੇ ਪਰ ਕਿਸੇ ਦੇ ਧਰਮ ਨੂੰ ਨਾਂ ਤੇ ਟਾਂਚ ਕਰੇ, ਨਾਂ ਮਜ਼ਾਕ ਉਡਾਵੇ ਅਤੇ ਨਾਂ ਹੀ ਗਲਤ ਸ਼ਬਦਾਵਲੀ ਦੀ ਵਰਤੋਂ ਕਰੇ।

ਸਿੱਖ ਧਰਮ ਅਤੇ ਬੁੱਧ ਧਰਮ ਵਾਰੇ ਜੋ ਟਿੱਪਣੀਆ ਬੀਬੀ ਵਲੋਂ ਕੀਤੀਆਂ ਗਈਆਂ ਹਨ ਅਤੇ ਉਨਾਂ ਨੂੰ ਰਲਗੱਡ ਕਰਨ ਦੀ ਬੀਬੀ ਵਲੋਂ ਪੂਰੀ ਕੋਸ਼ਿਸ਼ ਅਧੂਰੀ ਜਾਣਕਾਰੀ ਦੇ ਨਾਲ ਕੀਤੀ ਗਈ ਹੈ ਉਸਦਾ ਜਵਾਬ ਸ: ਸਤਨਾਮ ਸਿੰਘ ਬੱਬਰ ਵਲੋਂ ਅਤੇ ਰੇਡੀੳ ਹਮਸਫਰ ਅਤੇ ਯੂਟਿਊਬ ਤੇ ਵੀ ਦਿੱਤਾ ਜਾ ਚੁੱਕਾ ਹੈ ਜੋ ਕਿ ਬੀਬੀ ਦੀ ਸਿੱਖ ਧਰਮ ਉਪਰ ਧਾਰਨਾ ਅਤੇ ਵਿਚਾਰਾਂ ਦੇ ਨਾਲ ਮੇਲ ਨਹੀਂ ਖਾਂਦਾ ਅਤੇ ਜਿਸ ਤੋੰ ਪਤਾ ਲਗਦਾ ਹੈ ਕਿ ਬੀਬੀ ਨੇ ਮਨਘੜਤ ਕਹਾਣੀ ਬਣਾ ਕਿ ਸੁਣਾ ਦਿੱਤੀ ਅਤੇ ਬੀਬੀ ਦੀ ਜਾਣਕਾਰੀ ਇਸ ਮਾਮਲੇ ਵਿਚ ਘੱਟ ਹੈ ਅਤੇ ਇਸ ਸੱਭ ਉਸਨੇ ਪ੍ਰਚਾਰ ਨਹੀਂ ਬਲਕਿ ਪਬਲੀ ਸਿਟੀ ਲੈਣ ਲਈ ਯਤਨ ਹੈ।

ਜੇ ਮੈ ਕੁਝ ਗਲਤ ਕਿਹਾ ਹੋਵੇ ਜਾਂ ਜੋ ਮੈ ਲਿਖਿਆ ਹੈ ਉਸ ਸੰਬੰਧ ਵਿਚ ਮੇਰੀ ਜਾਣਕਾਰੀ ਘੱਟ ਹੋਵੇ ਤਾਂ ਮੈ ਖਿਮਾ ਦੀ ਜਾਚਕ ਹਾਂ।

ਰਾਜਵੀਰ ਕੌਰ, ਸਪੇਨ

ਲੇਖ ਲਿੰਕ

... ਅੱਗੇ ਪੜ੍ਹੋ